Beto Yedisa Mayele na Beto na Kisalu ya Kusamuna​—Sala Mvutukilu ya Mpa

SAMBU NA NKI YO KELE MFUNU: Bantu mingi yina ke sepelaka ti nsangu ya Kimfumu ke sosaka kuzaba kieleka na yina me tala Nzambi. (Yez 55:6) Sambu na kulonga bo, beto fwete vutukila bo mbala na mbala. Bantu ke kutana ti bampasi ya mutindu na mutindu, yo yina beto fwete soba mutindu na beto ya kulonga. Kansi, beto lenda sala yo kana beto ke kudibongisa mbote mpi ke zaba sambu na nki beto ke kwenda kutala konso muntu; lukanu na beto fwete vanda ya kuyantika kulonguka Biblia ti yandi.

MUTINDU YA KUSALA YO:

• Sala yonso sambu na kuvutuka kukonda kusukinina, ziku na nima ya mwa bilumbu.—Mat 13:19

• Vanda mawete mpi luzitu. Kuvanda ve makambu ngolo

• Pesa ntete mbote ti kiese. Binga muwi na zina na yandi. Yibusa yandi sambu na nki nge me vutukila yandi—ziku sambu na kupesa yandi mvutu na ngiufula mosi, sambu na kunatila yandi zulunalu ya mpa, sambu na kusonga yandi site Internet na beto, sambu na kusonga yandi video mosi, to sambu na kulonguka Biblia ti yandi. Kana yandi me tubila diambu ya nkaka, soba mambu ya nge ta tuba.—Fil 2:4

• Sambu na kulosa masa na nkeni ya kieleka yina kele na ntima na yandi, songa yandi ngindu mosi ya Biblia mpi bikila yandi mukanda. (1Bk 3:6) Sala kinduku ti yandi

• Tula fondasio sambu na mvutukilu ya mpa