Malongi ya Kubaka na Luzingu ya Samuele

Samuele kangamaka kaka na Yehowa luzingu na yandi ya mvimba. Ntangu yandi vandaka mwana, yandi buyaka kukuma ti bikalulu ya mbi bonso Ofni ti Fineasi, bana ya Eli. (1Sa 2:22-26) Ntangu Samuele vandaka kuyela, Yehowa landaka kuvanda ti yandi. (1Sa 3:19) Ntangu yandi kumaka mbuta, yandi landaka kusadila Yehowa mpi kukangama kaka na yandi, ata bana na yandi landaka ve mbandu na yandi.—1Sa 8:1-5.

Mbandu ya Samuele ke longa beto inki? Kana nge kele leke, zaba nde Yehowa me zaba mbote bampasi ya nge ke kutana ti yo mpi mutindu nge ke kudiwa. Yandi lenda sadisa nge na kuvanda kikesa. (Yez 41:10, 13) Kana nge kele kibuti mpi mwana na nge ke sadila ve Yehowa, mbandu ya Samuele lenda pesa nge kikesa. Yandi lendaka ve kupusa na kingolo-ngolo bana na yandi yina kumaka bambuta na kuzitisa bansiku ya Yehowa. Yandi bikaka mambu na maboko ya Yehowa mpi yandi landaka kubikala ya kukangama na Yehowa mpi kusepedisa ntima ya Tata na yandi yai ya zulu. Mbala ya nkaka, mbandu na nge ya mbote ta pusa mwana na nge na kuvutukila Yehowa.

TALA VIDEO MALONGI YINA BETO KE BAKA NA MBANDU YA—SAMUELE, MPI NA NIMA BENO PESA BAMVUTU NA BANGIUFULA YAI:

• 

  Inki mutindu Samuele monisaka kikesa ntangu yandi vandaka mwana?

• 

  Inki mutindu Danny monisaka kikesa?

• 

  Inki mbandu ya mbote Samuele pesaka ntangu yandi kumaka mununu?

• 

  Inki mbandu ya mbote bibuti ya Danny pesaka yandi?