Sadisa Balongoki na Nge ya Biblia na Kubuya Bikalulu ya Mbi

Bantu yina kele ti bikalulu ya mbote ke vandaka ti kinduku ya ngolo ti Yehowa. (1Pi 1:14-16) Kana balongoki ya Biblia me bika bikalulu ya mbi, bo ta vanda ti sante ya mbote, bo ta sadila mbongo na bo mbote mpi bo ta vanda ti dibuta ya kiese.

Tendudila balongoki mbote-mbote minsiku ya Yehowa, songa bo mfunu na yo mpi mambote yina bo ta baka kana bo ke sadila yo. Sadisa balongoki ya Biblia na kusoba mutindu na bo ya kuyindula. Yo ta sadisa bo na kusala mambu yina Yehowa ke zolaka. (Efe 4:22-24) Sadisa bo na kuzaba nde Yehowa lenda sadisa bo na kusala diaka ve mambu ya mbi yina bo salaka na bilumbu me luta. (Fil 4:13) Songa bo na kulomba lusadisu ya Yehowa ntangu ntima na bo ke pusa bo na kusala kima mosi ya mbi. Sadisa bo na kuzaba mambu yina lenda pusa bo na kusala mbi mpi mutindu bo lenda tina yo. Lomba bo na kusala mambu ya mbote. Nge ta vanda na kiese ntangu nge ta mona mutindu Yehowa ke sadisa balongoki ya Biblia na kusala bansoba.

SONGA VIDEO SADISA BALONGOKI NA NGE YA BIBLIA NA KUBUYA BIKALULU YA MBI MPI NA NIMA BENO PESA BAMVUTU NA BANGIUFULA YAI:

• 

  Inki mutindu bankuluntu mpi Neeta tudilaka Jade ntima?

• 

  Inki mutindu Neeta sadisaka Jade?

• 

  Inki mutindu Jade sosaka lusadisu ya Yehowa?