Banani Kele Banduku na Nge na Internet?

Nduku kele “muntu yina me kangamaka ti muntu ya nkaka sambu bo ke zolanaka.” Mu mbandu, Yonatani ti Davidi kumaka banduku ya ngolo, ntangu Davidi fwaka Goliati. (1Sa 18:1) Konso muntu fwete monisa bikalulu yina ta sala nde muntu ya nkaka kukuma nduku na yandi. Bantu ke kumaka banduku ya ngolo kana bo me zabana mbote-mbote. Sambu na kuzaba muntu ya nkaka, mbala mingi yo ke lombaka ntangu mpi bikesa. Kansi, na Internet, bantu lenda kuma “banduku” kukonda kusala bikesa. Yo ke lombaka kaka kuniema buto mosi imene. Sambu na Internet bantu ke bumbaka kimuntu na bo, bo ke yidikaka mbote-mbote na ntwala mambu yina bo ta tuba mpi bo ke ponaka bima ya kutula sambu bantu ya nkaka kumona nde bo kele bantu ya mbote. Kansi, yo kele mbote na kupona bantu yina nge ta ndima nde bo kuma banduku na nge. Kana muntu mosi ya nge me zaba ve me lomba nge na Internet na kukuma nduku na yandi, kuwa ve boma ya kubuya kukuma nduku na yandi nde yo ta sala yandi mpasi. Sambu na kutina bigonsa yina bo lenda kutana ti yo na Internet, bantu ya nkaka me buyaka kusadila yo. Kansi, kana nge me baka lukanu ya kusadila Internet, nki nge fwete vila ve?

SONGA VIDEO VANDA MAYELE NTANGU NGE KE SOLULA TI BANTU NA INTERNET, MPI NA NIMA BENO PESA BAMVUTU NA BANGIUFULA YAI:

• 

  Inki nge fwete tadila ntete na ntwala ya kutula bafoto na Internet to ya kusonika kima mosi?

• 

  Sambu na nki nge fwete pona mbote banduku na nge na Internet?

• 

  Sambu na nki nge fwete tadila mbote bantangu yina nge ta lutisa na Internet?—Efe 5:15, 16