ZINGA MUTINDU BAKRISTU FWETE ZINGA

Sadisa Bantu Yina Ke Sambilaka Ve na Kuzaba Ngangi na Bo

Keti nge ke vandaka ti badute ya kulonga bantu yina ke sambilaka ve nsangu ya mbote, mbala ya nkaka sambu nge ke yindulaka nde bo ta ndima ve nsangu yango? Kana mpidina, kuvila ve nde bantu mingi yina vandaka kusambila ve, yo vanda bantu yina vandaka kukwikila ve nde Nzambi kele, me kumaka Bambangi ya Yehowa. Mbala mingi, yo lombaka kaka nde muntu kutendudila bo mambu ya ke monisa kibeni nde Nzambi kele.—Bar 1:20; 10:14.

BENO TALA VIDEO KUVILA VE NDE BANTU YINA ME KONDA LUKWIKILU LENDA KUMA TI YO—BANTU YINA KE SAMBILAKA VE MPI NA NIMA BENO PESA MVUTU NA NGIUFULA YAI:

Inki mutindu mbandu ya mpangi Tommaso ke sadisa nge na kuvanda ti bangindu ya mbote ntangu nge ke longa bantu yina ke sambilaka ve?

Your answer

Mutindu ya Kusala Yo

Kana muntu mosi me tuba nde yandi ke kwikilaka ve na Nzambi, vanda mawete, tuba na mayele yonso mpi tula kibeni dikebi na bangindu na yandi mpi na mutindu yandi ke kudiwa sambu na yo. (2Tm 2:24) Tubila mambu yina lenda sepedisa yandi. Keti yandi ke ndima nde nge tubila mambu yina me pusaka bantu mingi na kukuma kukwikila na Ngangi? Kana mpidina, sadila mikanda mpi bavideo yina ke tubilaka mambu yina. Na Bisadilu Sambu na Kulonga, bo me yikaka kamukanda La vie a-t-elle été créée ? mpi kamukanda Kisina ya Luzingu—Bangiufula Tanu ya Me Fwana na Kuyula sambu beto zwa yo kukonda mpasi.

Ntete, nge lenda yindula nde nge ta kuka ve kulonga muntu yina ke kwikilaka ve na Nzambi ya kieleka. Kana mpidina, nge lenda songa nsamuni mosi ya kele ti eksperiansi na kusadisa nge. Kuvila mpi ve nde Yehowa lenda sadisa beto na kusimba bantima ya bantu yina me fwana ata na luyantiku bo ke ndima ve nde yandi kele.—Bis 13:48.