DISOLO YA LUZINGU

Mono Me Sala Mambu Yina Yo Lombaka nde Mono Sala

DISOLO YA DON RIDLEY

NA NSUNGI ya bamvula kuluta 30, mpangi Donald Ridley sambaka mambu ya Bambangi ya Yehowa na batribinale. Yandi salaka kisalu mosi ya mfunu. Yandi vandaka kusadisa bantu, minganga mpi bazuzi na kubakisa nde mbefo kele ti nswa ya kubuya nde bo vutula yandi ve menga. Yandi sadisaka Bambangi ya Yehowa na kununga mambu mingi na batribinale ya nene na États-Unis. Banduku na yandi vandaka kubinga yandi Don; yandi vandaka kusala ngolo, yandi vandaka muntu ya kudikulumusa mpi yandi vandaka ti kikalulu ya kuditambika.

Na 2019, minganga tubaka nde Don ke bela maladi ya banere yina bantu ke belaka ve mingi mpi yo ke manaka ve. Maladi yango kumaka ngolo nswalu mpi na Augusti 16, 2019, yandi fwaka. Yai disolo na yandi.

Mono butukaka na mbanza Saint Paul, na provense ya Minnesota na États-Unis na 1954. Dibuta na beto vandaka ve bamvwama, bo vandaka mpi ve bansukami. Beto vandaka kusamba na dibundu ya Katolika ya Roma. Beto kele bana tanu na dibuta na beto mpi mono kele mwana ya zole. Mono tangaka na ekole ya Katolika mpi mono vandaka servant. Kansi mono zabaka ve mambu mingi ya Biblia. Ata mono vandaka kukwikila nde Nzambi muntu gangaka bima yonso, mono vandaka kundima ve nde Dibundu ya Katolika ta sadisa mono na kusambila Nzambi.

MUTINDU MONO LONGUKAKA KIELEKA

Bambangi ya Yehowa kwisaka na nzo na mono na mvula ya ntete yina mono yantikaka kutanga na William Mitchell, iniversite yina ke longaka mambu ya bansiku. Mono vandaka kuyobisa bilele mpi mpangi-bakala yina ti nkento na yandi ndimaka nde bo ta vutukila mono kilumbu ya nkaka sambu beto solula. Ntangu bo vutukaka, mono yulaka bo bangiufula yai zole: “Sambu na nki bantu ya mbi ke zingaka mbote kuluta bantu ya mbote?” mpi “Inki bantu fwete sala sambu bo vanda na kiese?” Bo pesaka mono mukanda Kieleka Yina Ke Nataka na Luzingu ya Mvula na Mvula mpi Biblia—Mbalula ya Nsi-Ntoto ya Mpa; yo vandaka kusema mpi yo vandaka kulere ya masa ya saka-saka. Mono ndimaka kulonguka Biblia mpi yo sadisaka mono na kuzaba mambu mingi. Mono waka kiese mingi ntangu mono zabaka nde Kimfumu ya Nzambi kele luyalu yina ta yidika mambu ya bantu awa na ntoto. Mono bakisaka nde kimfumu ya bantu me kuka ve kutula ngemba awa na ntoto sambu ntoto me fuluka ti bampasi mpi mambu mingi ya mbi.

Na luyantiku ya 1982 mono kudipesaka na Yehowa mpi na nima, kaka na mvula yina mono bakaka mbotika na lukutakanu ya Distrike yina salamaka na nzo mosi ya nene na mbanza Saint Paul. Lukutakanu yango vandaka ti ntu-diambu, “Kieleka ya Kimfumu.” Na mposo yina landaka, mono vutukaka na nzo yina, kisika beto salaka lukutakanu ya distrike sambu na kusala ekzame yina bo ke salaka sambu na kukuma avoka. Na luyantiku ya Oktobri, bo songaka mono nde mono me nunga ekzame yina mpi mono me kuma avoka.

Na lukutakanu ya distrike yina beto salaka, mono kutanaka ti mpangi Mike Richardson ya betele ya Brooklyn mpi yandi songaka mono nde bo me kangula biro yina ke talaka mambu ya bansiku na babiro ya ke twadisaka kisalu ya Bambangi ya Yehowa na ntoto ya mvimba. Mono yibukaka disolo ya muntu ya Etiopia ya kele na Bisalu 8:36 mpi mono kudiyulaka nde: ‘Inki ke kanga mono nzila ya kusala na Biro Yina Ke Talaka Mambu ya Bansiku?’ Yo yina mono fulusaka formilere yina bo ke fulusaka sambu na kusala na Betele.

Bibuti na mono waka ve kiese mutindu mono kumaka Mbangi ya Yehowa. Papa yulaka mono sambu na kuzaba kana bo ta futaka mono mbongo yina bo ke futaka ba-avoka. Mono tendudilaka yandi nde mono ta vanda volontere mpi konso ngonda, bo ta pesaka mono 75 dolare, ntalu ya mbongo yina bo vandaka kupesa bampangi yina ke salaka na Betele na ntangu yina.

Mono kwendaka ve mbala mosi na Betele sambu yo lombaka nde mono manisa ntete bisalu yina mono vandaka kusala na tribinale. Yo yina, na 1984 mono yantikaka kisalu na mono na Betele ya Brooklyn na New York. Bo tindaka mono na Biro Yina Ke Talaka Mambu ya Bansiku. Mayele yina mono bakaka na tribinale sadisaka mono na kusala mbote kisalu na mono.

BETO YIDIKAKA STANLEY, NZO YINA BO VANDAKA KUSALA BATEYATRE

Stanley, kisika yina bo vandaka kusala bateyatre na 1983. — Stanley, nzo ya bateyatre, mutindu yo vandaka ntete ntangu beto sumbaka yo

Na Novembri 1983, beto sumbaka Stanley, nzo yina bo vandaka kusala bateyatre na Mbanza Jersey na New Jersey. Bampangi lombaka nswa sambu beto yidika kura mpi masa na nzo yango. Ntangu bampangi solulaka ti bamfumu ya mbanza, bo songaka bo nde bo ke zola kuyidika Stanley, nzo yina bo vandaka kusala bateyatre sambu yo kuma nzo mosi ya balukutakanu ya nene ya Bambangi ya Yehowa. Kansi bamfumu ya mbanza buyaka. Bo tubaka nde nsiku ya mbanza ke tubaka nde banzo ya lusambu fwete vanda kaka kisika yina bantu ke zingaka kansi yo fwete vanda ve kisika bantu ke salaka mumbongo. Yo yina, sambu Stanley vandaka kisika yina bantu ke salaka mumbongo, bamfumu ya mbanza buyaka kupesa beto nswa ya kuyidika yo. Bampangi nataka diambu yango na tribinale kansi tribinale buyaka kutadila diambu yango.

Ntangu organizasio nataka diambu yango na tribinale ya nene, mono vandaka ti mposo mosi na Betele. Sambu mono salaka bamvula zole na tribinale ya Saint Paul na Minnesota, mono yikanaka dezia ti mambu ya mutindu yai. Avoka na beto mosi tubaka nde Stanley vandaka kisika yina bantu vandaka kusala mambu mingi mu mbandu, bo vandaka kusonga bafilme mpi kubula ba consert. Kansi sambu na nki beno ke mona mbi nde yo kuma kisika ya kusala mambu ya Nzambi? Tribinale ya nene tadilaka diambu yango mpi bo tubaka nde tribinale ya Mbanza Jersey zitisaka ve nswa na beto na mambu ya me tala lusambu. Tribinale ya nene songaka bamfumu ya mbanza na kupesa beto nswa ya kuyidika nzo yina mpi banda kilumbu yina, mono yantikaka kumona mutindu Yehowa vandaka kusadila organizasio na yandi sambu na kusamba na batribinale sambu na mambote ya kisalu na yandi. Mono vandaka na kiese mingi sambu mono vandaka na kati ya bampangi yina sambaka na tribinale sambu na kununga diambu yina.

Bampangi yantikaka kisalu ya ngolo ya kuyidika nzo yina mpi na Septembri 8, 1985, bo pesaka bana ya nzo-nkanda ya 79 ya Gileadi maplome, kisika yina kumaka Nzo ya Balukutakanu ya Nene na Mbanza Jersey, kiteso ya mvula mosi na nima ya kuyidika yo. Mono waka kiese mingi na kupesa maboko na kisalu yai ya Yehowa mpi mono ke waka kiese mingi kuluta yina mono vandaka ti yo ntangu mono vandaka kusala na tribinale na ntwala ya kusala na Betele. Mono zabaka ve nde Yehowa ta sadila mono sambu na kusamba mambu mingi na batribinale.

MUTINDU MONO NWANINAKA BANSWA YA BAMPANGI YA KUBUYA MENGA

Na bamvu 1980, mbala mingi minganga mpi balupitalu mingi vandaka kuzitisa ve nswa ya Mbangi ya Yehowa ya mbuta ya kutula yandi ve menga ntangu bo ke sansa yandi. Bankento ya mavumu vandaka kuniokwama mingi sambu bazuzi vandaka kuyindula nde nkento kele ve ti nswa ya kubuya nde bo vutula yandi ve menga. Bo vandaka kuyindula nde kana bo vutula yandi ve menga, nkento yina ta fwa mpi mwana ta bikala yandi mosi.

Na Desembri 29, 1988, mpangi-nkento Denise Nicoleau butaka mwana-bakala mpi na nima ya kubuta, menga basikaka yandi mingi kibeni. Sambu luzingu na yandi kumaka na kigonsa, munganga tubaka nde bo vutula yandi menga kansi mpangi Nicoleau buyaka. Kilumbu yina landaka, lupitalu lombaka nswa na zuzi mosi sambu bo vutula mpangi-nkento yina menga. Zuzi yina solulaka ve ti mpangi Nicoleau to bakala na yandi kansi yandi pesaka lupitalu nswa ya kuvutula mpangi Nicoleau menga.

Na Kitanu, Desembri 30 minganga ya lupitalu vutulaka mpangi-nkento Nicoleau menga ata yandi buyaka mpi bakala na yandi ti bantu ya nkaka ya dibuta na bo yina vandaka na lweka ya mbeto na yandi. Na nkokila, bo kangaka bampangi mingi ya dibuta ya mpangi Nicoleau mpi bankuluntu kiteso ya zole sambu bo salaka kibaka mosi na lweka ya mpangi Nicoleau sambu bo vutula yandi ve menga. Na suka ya kilumbu ya Mposo Desembri 31, bazulunalu, baradio mpi batelevizio ya Mbanza New York tubilaka mutindu bo kangaka bampangi yina.

Don Ridley ti Philip Brumley. — Mono ti Philip Brumley ntangu beto vandaka baleke

Na Kintete na suka, mono solulaka ti Milton Mollen, zuzi mosi ya tribinale ya nene. Mono songaka yandi mambu yonso yina salamaka mpi mono monisaka yandi pwelele nde zuzi tulaka diboko na mukanda yina lombaka nde bo vutula mpangi Nicoleau menga kukonda kuwidikila yandi. Zuzi Mollen songaka mono na kukwisa na biro na yandi na nkokila sambu beto solula mambu yango mpi beto tala mambu yina nsiku ke tubaka sambu na diambu yango. Mpangi Philip Brumley, nkengi na mono ya kisalu fidisaka mono na biro ya zuzi Mollen na nkokila yina. Zuzi Mollen songaka zuzi ya lupitalu na kukwisa mpi. Masolo na beto vandaka ngolo mingi. Yo yina, mpangi Brumley sonikilaka mono na papie nde “kulumusa ndinga.” Yo vandaka ndongisila mosi ya mbote sambu mono vandaka kutuba ngolo kibeni sambu na kumonisa nde avoka ya lupitalu yina salaka mbi.

Richard Moake, Gregory Olds, Paul Polidoro, Philip Brumley, Don Ridley, mpi Mario Moreno na nganda ya Tribinale ya Nene ya États-Unis. — Banda na diboko ya kimama tii na diboko ya kitata: Richard Moake, Gregory Olds, Paul Polidoro, Philip Brumley, mono ti Mario Moreno—ba-avoka ya organizasio na kilumbu yina beto vandaka kusamba na Tribinale ya Nene ya États-Unis sambu na diambu ya *Watchtower na bwala Stratton*.—Tala *Telama! ya Kifalansa* ya *Yanuari 8, 2003*

Na nima ya ngunga mosi, zuzi Mollen tubaka nde beto ta tubila diambu yango mbasi na suka. Ntangu beto vandaka kubasika na biro ya zuzi Mollen, yandi tubaka nde “mbasi, avoka ya lupitalu ta tela meso.” Yo ke tendula nde yo ta vanda ve pete sambu avoka yina kumonisa kibeni nde lupitalu vandaka ti nswa ya kuvutula mpangi Nicoleau menga na ngolo. Yo vandaka bonso nde Yehowa vandaka kuzabisa mono nde beto ta nunga diambu yina. Mono yitukaka na kumona mutindu Yehowa vandaka kusadila beto sambu na kusala luzolo na yandi.

Beto salaka na mpimpa sambu na kuyidika mambu yina beto ta tuba na suka. Tribinale yina vandaka kibeni pene-pene ya Betele ya Brooklyn. Yo yina, bampangi mingi yina vandaka kusala na Biro Yina Ke Talaka Mambu ya Bansiku kwendaka na makulu. Na nima ya kuwidikila beto, bazuzi iya tubaka nde yo lombaka ve nde bo vutula mpangi Nicoleau menga mpi bo buyaka nsiku yina ya kuvutula muntu menga. Tribinale ya nene nungisaka mpangi Nicoleau mpi bo tubaka nde yo kele mbi na kutula diboko na mukanda yina ke lomba nde bo vutula mbefo menga kukonda kuwidikila yandi.

Ntangu fioti na nima, tribinale ya nene ya New York ndimaka nswa ya mpangi Nicoleau ya kusansa yandi kukonda nde bo vutula yandi menga. Yo vandaka diambu ya ntete na mambu iya yina beto nataka na batribinale ya nene mpi beto nungaka mambu yango. Mono vandaka na kiese ya kuvanda na kati ya bampangi yina sambaka mambu yango. (Tala lupangu “Mambu Yina Beto Nungaka na Batribinale ya Nene.”) Mono salaka mpi ti ba-avoka ya nkaka ya Betele sambu na kusamba mambu ya me tala kufwa makwela, nani ta vanda ti bana kana makwela me fwa mpi mambu ya me tala banzo mpi mapangu.

Mambu Yina Beto Nungaka na Batribinale ya Nene

Na diambu ya Ernestine Gregory na 1989, Tribinale ya Nene ya Illinois tubaka nde leke yina kele ti bamvula na nsi ya 18 mpi ya kele ya kuyela, kele ti nswa ya kubaka lukanu yandi mosi ya kubuya nde bo vutula yandi ve menga.

Na diambu ya nkaka, kaka na 1989, Tribinale ya Nene ya Florida tubaka nde mbuta yina ke bakisa mbote-mbote mambu yina kele kigonsa, kele ti nswa ya kubuya nde bo vutula yandi ve menga.

Na diambu ya mpangi-nkento Nicoleau na 1990, Cour d’appel ya provense ya New York (tribinale ya kuluta nene ya provense) tubaka nde bambuta yina ke bakisa mbote-mbote mambu yina kele kigonsa, kele ti nswa ya kupona lusansu yina bo ke zola mpi nswa ya kubuya nde bo vutula bo ve menga.

Na diambu ya nkaka diaka na 1996, Tribinale ya Nene ya Connecticut tubaka nde mama yina kele Mbangi ya Yehowa kele ti nswa ya kupona diambu yina bo ta sala na nitu na yandi mpi nswa ya kubuya nde bo vutula yandi ve menga.

MAKWELA MPI LUZINGU NA MONO YA DIBUTA

Don Ridley ti nkento na yandi, Dawn. — Mono ti nkento na mono Dawn

Ntangu mono kutanaka ti Dawn yina kumaka nkento na mono, yandi vandaka kusansa bana na yandi tatu yandi mosi sambu makwela na yandi fwaka. Yandi vandaka kusala kisalu ya kinsuni mpi yandi vandaka mupasudi-nzila. Yandi kutanaka ti mambu mingi ya mpasi na luzingu na yandi mpi mono sepelaka mingi ti lukanu na yandi ya kusadila Yehowa. Na 1992, beto salaka Lukutakanu ya Distrike yina salamaka na Mbanza New York, yo vandaka ti ntu-diambu, “Bantu Yina Ke Nataka Nsemo.” Mono songaka mpangi Dawn nde beto talana sambu na makwela. Beto kwelanaka mvula mosi na nima. Kuvanda ti nkento yina ke tulaka Yehowa na kisika ya ntete na luzingu na yandi mpi ya ke sekisaka bantu kele dikabu ya me katuka na Yehowa. Dawn pesaka mono lufutu ya mbote na bilumbu yonso ya luzingu na beto.—Bing. 31:12.

Ntangu beto kwelanaka, mwana na yandi ya ntete vandaka ti bamvula 16, ya zole bamvula 13 mpi ya nsuka bamvula 11. Mono vandaka kuzola kuvanda tata ya mbote sambu na bo, yo yina mono vandaka kutanga mbote-mbote mpi kusadila mambu yonso yina mono vandaka kutanga na mikanda na beto yina ke tubilaka mutindu ya kuvanda tata ya mbote yina ke sansa bana ya nkento na yandi. Na nsungi ya bamvula, beto kutanaka ti mambu ya mpasi kansi mono sepelaka mingi sambu bana yina kumaka kutudila mono ntima, bo kumaka banduku na mono mpi mono kumaka tata yina bo vandaka kuzola. Beto vandaka kusepela nde banduku ya bana na beto kukwisa na nzo mpi beto vandaka kusepela kuvanda ti bo.

Na 2013, beto kwendaka ti Dawn na Wisconsin, provense mosi ya États-Unis sambu na kusadisa bibuti yina kumaka minunu. Diambu ya kuyituka kele nde kisalu na mono ya Betele sukaka ve. Bo lombaka mono na kulanda kusala bonso volontere ya ntangu fioti sambu na kusamba mambu ya organizasio na batribinale.

DIAMBU MOSI YA KUKONDA KUKANA SALAMAKA

Na Septembri 2018, mono kumaka kukosula mingi na ntwala ya kutuba. Munganga talaka mono kansi yandi zabaka ve diambu yina vandaka kusala nde mono kosula ntete na ntwala ya kutuba. Na nima, munganga ya nkaka songaka mono na kusolula ti munganga yina ke talaka mambu ya banere. Na Yanuari 2019, munganga ya nkaka tubaka nde ziku mono kele ti maladi mosi yina bantu mingi ke belaka ve mpi nde na ntangu mosi buna, yo lenda panzana na nitu ya mvimba.

Bilumbu tatu na nima, mono bukanaka diboko ya kitata ntangu mono vandaka kusala nsaka na baglase na neige. Mono vandaka kusala mingi nsaka yai mpi mono vandaka kuzola yo. Mono bakisaka nde mono ta kuka diaka ve kunikisa diboko na mono. Maladi yina mono vandaka na yo kumaka ngolo nswalu mpi na mutindu ya kuyituka, yo salaka nde mono kuka diaka ve kutuba, kunikana mpi kumina ata kima mosi.

Mono kele na kiese mingi ya kusadisa dibundu ya Yehowa na kisalu na mono ya kiavoka. Mono kele mpi na kiese mingi mutindu mono sonikaka masolo mingi na bazulunalu yina minganga, ba-avoka mpi bazuzi ke tangaka. Mono salaka mpi badiskure mingi na baseminere ya minganga na ntoto ya mvimba sambu na kunwanina banswa ya Bambangi ya Yehowa ya kupona nde bo sala bo operasio kukonda nde bo vutula bo menga mpi bo sansa bo kukonda menga. Yo yina mono ke tuba mutindu Luka tubaka na mukanda ya Luka 17:10 nde: ‘Mono kele mpika ya mpamba. Mono me sala mambu yina yo lombaka nde mono sala.’