Luzingu ya Mbote Yina Bantu Yonso Ke Zolaka Kuvanda ti Yo

Kansi bantu mingi ke ndimaka ve nde luzingu na bo ta vanda mutindu bo ke zolaka nde yo vanda. Mambu bonso maladi yai ya me panzana na ntoto ya mvimba ya bo ke binga COVID-19 yina me basika na kintulumukina me bebisa luzingu ya bantu mingi. Yo me sala nde kinsukami kukuma mingi mpi nkutu yo me fwa bantu mingi. Mambu yai ke pusa bantu na kudiyangisa mpi na kuyindula nde luzingu na bo ta vanda ve mbote na bilumbu ke kwisa.

Sambu bantu ke zaba ve mutindu luzingu na bo ta vanda mbasi, bo ke sosa ti nzala ya ngolo kima yina lenda twadisa bo sambu na bilumbu ke kwisa bo vanda ti luzingu ya mbote. Bantu ya nkaka ke yindulaka nde sambu luzingu na bo kuvanda mbote mutindu bo ke zolaka, bo fwete kuma ti mbongo mingi mpi kubula bansaka ya shanse. Bantu mingi ke sosaka kulonguka mingi mpi kuvanda ti kimvwama. Bo ke yindulaka nde bima yai ta sala nde bo zwa bima yina bo kele ti yo mfunu. Bantu ya nkaka diaka ke yindulaka nde kuvanda muntu ya mbote lenda sadisa bo na kuvanda ti luzingu ya mbote na bilumbu ke kwisa.

Keti mambu yai ya beto me tubila lenda pesa nge luzingu yina nge ke zolaka kuvanda ti yo? Sambu na kuzwa mvutu, nge fwete tadila bangiufula yai:

• Kele ti mambu yina lenda sadisa nge na kuzaba kibeni mutindu luzingu na nge ta vanda. Inki mambu?

• Keti mbongo mpi kulonguka mingi lenda pesa nge luzingu ya mbote na bilumbu ke kwisa?

• Keti kuvanda muntu ya mbote lenda pesa nge luzingu ya mbote na bilumbu ke kwisa?

• Wapi nge lenda zwa kima mosi ya kutudila ntima sambu nge vanda ti luzingu ya mbote na bilumbu ke kwisa?

Nimero yai ya Nzozulu ya Nkengi lenda sadisa nge na kuzwa bamvutu.