Keti Mbongo mpi Kulonguka Mingi Lenda Sala nde Nge Vanda ti Luzingu ya Mbote na Bilumbu Ke Kwisa?

Bantu mingi ke yindulaka nde bantu yina me longukaka mingi mpi yina kele ti mbongo mingi ta vanda ti luzingu ya mbote na bilumbu ke kwisa. Bo ke ndimaka nde bantu lenda vanda ti kisalu ya mbote, dibuta ya mbote mpi ta zinga kisika ya mbote kaka kana bo me longuka mingi. Bo ke yindulaka diaka nde kana muntu me longuka mingi yandi ta zwa kisalu ya mbote mpi bantu yina kele ti mbongo mingi ke vandaka na kiese.

MAMBU YINA BANTU MINGI KE SALAKA

Zhang Chen yina ke zingaka na Chine ke tuba nde: “Mono vandaka kundima nde kana mono me kota iniversite, mono ta kuma ti mbongo mingi mpi mono ta zwa kisalu ya mbote mpi mono ta vanda ti luzingu ya mbote.”

Sambu na kuvanda ti luzingu ya mbote, bantu mingi ke zolaka kukota iniversite yina me zabanaka to bo ke zolaka kukwenda kutanga na bansi ya nkaka. Bantu vandaka kusala bavoyage mingi sambu na kukwenda na bansi ya nkaka tii kuna bamfumu ya baluyalu kangaka banzila sambu na maladi yai ya COVID-19. Bamvula kiteso ya 10 me luta, kimvuka mosi salaka bansosa mpi bo monaka nde bantu yina vandaka kukwenda na bansi ya nkaka sambu na kukwenda kusala banzo-nkanda ya nda vandaka bantu ya Azia.

Mbala mingi bibuti ke salaka ngolo sambu bana na bo kukwenda kusala banzo-nkanda ya nda na bansi ya nkaka. Qixiang yina ke zingaka na Taïwan, ke tuba nde: “Bibuti na mono vandaka ve ti mbongo mingi kansi bo tindaka beto iya na États-Unis sambu na kukota iniversite.” Sambu na kufutila bo mbongo na iniversite, bibuti na bo kumaka ti bamfuka mingi kaka bonso bibuti ya nkaka.

KETI BO KE VANDAKA TI LUZINGU YA MBOTE?

Leke mosi na kati na bo me lemba, ke kudiyangisa mpi me vanda na ntwala ya ordinatere na yandi na kati-kati ya mpimpa. — Bantu mingi yina ke salaka banzo-nkanda ya nda mpi yina kele ti kimvwama mingi ke kutanaka ti mambu ya mpasi

Bantangu ya nkaka kana muntu me longuka mingi yandi lenda vanda ti luzingu ya mbote kansi yo ke vandaka ve mutindu yina ntangu yonso. Mu mbandu, na nima ya kusala kisalu ya ngolo bamvula mingi mpi kubaka bamfuka mingi kaka sambu na kufuta mbongo ya iniversite, bo ke zwaka ve kisalu ya mbote yina bo vandaka kuyindula. Zulunalu mosi [Singapore’s Business Times] ya Rachel Mui ke tuba nde: “Bantu mingi yina me salaka banzo-nkanda ya nda ke zwaka ve bisalu.” Jianjie muntu mosi yina me longukaka mingi yina ke zingaka na Taïwan, ke tuba nde: “Bantu mingi ke salaka ve bisalu yina bo longukaka na iniversite.”

Kansi bayina ke zwaka kisalu ya bo longukaka na iniversite, bo ke zingaka ve mutindu bo vandaka kuyindula. Niran salaka iniversite na Angleterre. Ntangu yandi vutukaka na bwala na bo na Thaïlande, yandi zwaka kisalu yina yandi longukaka na iniversite. Yandi ke tuba nde: “Mono vandaka kuyindula nde nzo-nkanda yina mono salaka ta sadisa mono na kuzwa kisalu ya mbote yina bo ta futaka mono mbongo mingi. Kansi, yo vandaka kulomba nde mono sala bantangu mingi mpi mono sala ngolo sambu na kuzwa mbongo mingi. Nsuka-nsuka bo katulaka mono ti bantu ya nkaka na kisalu. Mono bakisaka nde kele ve ti kisalu ya mbote.”

Ata bantu yina kele ti mbongo mingi to bantu yina ke zingaka mbote, bo ke kutanaka ti bampasi na mabuta na bo, bo ke belaka mpi bo ke kutanaka ti bampasi ya mbongo. Katsutoshi yina ke zingaka na Japon ke tuba nde: “Mono vandaka ti mbongo mingi kansi mono vandaka ve na kiese sambu bantu mingi vandaka kuwila mono kimpala mpi bo vandaka kusadila mono mambu ya mbi.” Lam, yina ke zingaka na Vietnam ke tuba nde: “Bantu mingi ke sosaka kukuma ti mbongo mingi, bo ke yindulaka nde bo ta vanda na ngemba. Kansi, mbala mingi bo ke kudiyangisa mingi, bo ke belaka mpi bo ke kumaka kuniokwama na mabanza.”

KULONGUKA MINGI MPI KUVANDA TI MBONGO MINGI KE PESAKA VE MUNTU KIESE

Ya kieleka, bantu ke vandaka ti mfunu ya kusala banzo-nkanda ya nda mpi kukuma ti mbongo mingi sambu yo sadida bo ti mabuta na bo. Kansi, yo ke monisa ve nde bo ta vanda ti luzingu ya mbote na bilumbu ke kwisa. Sambu na nki? Beto tala mambu yina Biblia ke tuba.

NTANGU YONSO KULONGUKA MINGI LENDA SALA VE NDE MUNTU KUVANDA TI LUZINGU YA MBOTE.

“Bantu ya ntinu ke nungaka ve ntangu yonso na nsaka ya kubaka ntinu, . . . bantu ya ngangu ke vandaka ve ntangu yonso na bimvwama, bantu yina kele ti nzayilu ke nungaka ve ntangu yonso, sambu ntangu mpi mambu ya kukonda kukana ke kuminaka bo yonso.”—LONGI 9:11.

Ata muntu yina me longukaka mingi, ke nungaka ve ntangu yonso na mambu yina yandi ke salaka. Sambu yandi ta kuka ve kusala mambu ya nkaka. Yandi ta kuka ve kumanisa mpasi ya mbongo, mubulu ya politiki mpi kubuyisa bantu na kuyindudila yandi mambu ya mbi.

KIMVWAMA KE VANDAKA VE MVULA NA MVULA.

“Kudilembisa ve sambu na kubaka kimvwama. Yambula mpi monisa mayele ya kubakisa mambu. Kana nge losa meso kuna, yo kele ve pana, sambu yo ta tandula kibeni mapapu bonso ngo-zulu mpi ta pumbuka na zulu.”—BINGANA 23:4, 5.

Mbongo lenda tanina muntu. Kansi, lutaninu yina ta vanda ve mvula na mvula. Nge lenda vidisa mbongo yina yonso kaka na mwa ntangu fioti. Bisumbula ya lugangu, mu mbandu: Kunikana ya ntoto, nzo me yokama tiya mpi mupepe ya ngolo lenda sala nde muntu kuvidisa mbongo to nzo na yandi.

MBALA MINGI MBONGO KE NATAKA BAMPASI.

“Bima mingi yina mvwama kele na yo ke pesaka yandi ve nzila ya kulala.”—LONGI 5:12.

Franklin yina ke zingaka na Hong Kong kutanaka ti mambu ya verse yai ke tubila. Yandi salaka banzo-nkanda ya nda mpi zwaka kisalu mosi ya mbote. Na nima yandi kumaka mfumu na kisika yina yandi vandaka kusala. Yandi ke tuba nde: “Mono kumaka ti basusi ya mingi mpi yo kumaka kuyangisa nitu na mono. Mono kumaka kudiyangisa mingi mpi mono vandaka kukuka diaka ve kulala.” Nsuka-nsuka, yandi vandaka kukuka diaka ve kusala kisalu. Yandi ke tuba diaka nde: “Mono sosaka kuzaba sambu na nki mono salaka mutindu yina mpi yo pusaka mono na kudiyula bangiufula mingi ya me tala luzingu.”

“Kudilembisa ve sambu na kubaka kimvwama.”—BINGANA 23:4

Bonso Franklin, bantu mingi ke tubaka nde kele ti bima mingi ya mfunu na luzingu kuluta kusala banzo-nkanda ya nda mpi kuvanda ti kimvwama. Na kisika ya kusosa bima mingi ya kuzingila, bantu mingi ke sosaka kusadisa bantu ya nkaka mpi kusadila bo mambu ya mbote sambu na kuvanda ti luzingu ya mbote na bilumbu ke kwisa. Keti kusala mambu yai yonso lenda sala nde bo vanda ti luzingu ya mbote na bilumbu ke kwisa? Disolo ya ke landa ta pesa mvutu na ngiufula yai.