MUTINDU YA KUBUYA KUMENGA BANTU YA NKAKA

1 | Kupona-pona ve

Biblia Ke Tuba Nde:

“Nzambi ke pona-ponaka ve, kansi na konso dikanda yandi ke ndimaka muntu yina ke tinaka yandi boma mpi ke salaka mambu ya mbote.”—BISALU 10:34, 35.

Mambu Yina Yo Ke Tendula:

Yehowaa Nzambi ke sambisaka beto ve na kutadila insi na beto, mutindu beto kele, kulere ya mpusu na beto to mutindu beto ke zingaka. Kansi yandi ke tulaka dikebi na bangindu mpi banzala yina beto ke vandaka ti yo. Biblia ke tuba diaka nde: “Muntu ke monaka yina ke monikaka na meso, kansi Yehowa ke monaka na ntima.”—1 Samuele 16:7.

Mambu ya Nge Lenda Sala:

Ata beto lenda zaba ve bantu mbote bonso Nzambi, beto lenda landa mbandu na yandi ya kukonda kupona-pona. Sala kikesa ya kutadila muntu yandi mosi na kisika ya kuvukisa kimvuka ya bantu. Kana nge me mona nde nge kele ti bangindu ya mbi sambu na bantu ya nkaka, mu mbandu bantu yina nge kele ve ti bo mpusu mosi to insi mosi, samba Nzambi mpi lomba yandi na kusadisa nge na kukatula bangindu yina ya mbi. (Nkunga 139:23, 24) Kana nge samba Yehowa na masonga yonso mpi nge lomba yandi na kusadisa nge na kubuya kikalulu ya kupona-pona, vanda ti kundima nde yandi ta wa kisambu na nge mpi yandi ta sadisa nge.—1 Piere 3:12.

a Yehowa kele zina ya Nzambi.—Nkunga 83:18.

“Mono me lutisaka ntete ve ntangu ti mundele mosi na ngemba yonso . . . Bubu yai, mono kele na kati ya kimvuka ya bampangi ya ntoto ya mvimba.”—TITUS

Mambu ya Masonga Yina Salamaka—TITUS

Nungaka Kikalulu ya Kumenga Bantu

Titus vandaka na kimvuka mosi ya babandi yina vandaka ve kusepela ti bansiku ya kukonda masonga yina bamfumu tulaka sambu na bantu yina vandaka ve mpusu mosi. Yandi ke tuba nde: “Beto zolaka kukwenda na mbanza bisika yina bo buyisaka bantu-ndombe na kukuma, mu mbandu na ba otele mpi na bisika yina bantu ke nwaka malafu sambu beto banda bitumba.” Titus ke tuba nde yandi vandaka kumenga bantu ya nkaka. Yandi ke yika nde: “Ntangu yonso kana mono ke swana ti muntu mosi, mono vandaka muntu ya ntete ya kubula muntu yango.”

Titus yantikaka kusoba ntangu yandi bandaka kulonguka Biblia ti Bambangi ya Yehowa. Ntangu yandi vandaka kutanga Biblia, yo vandaka kupusa yandi na kuyindula. Mingi-mingi yandi vandaka kusepela ti mambu yina Biblia ke tubaka nde Nzambi ta sala na nsi-ntoto ya mpa na bilumbu ke kwisa. Nsi-ntoto yina “lufwa ta vandaka diaka ve; mawa, bidilu, mpi mpasi ta vandaka diaka ve. Mambu ya ntama me vila.”—Kusonga 21:3, 4.

Ntete, yo vandaka mpasi sambu Titus kubika kikalulu ya kumenga bantu ya nkaka. Yandi ke tuba nde: “Yo vandilaka mono mpasi na kusoba mutindu na mono ya kuyindula mpi ya kusala mambu.” Kansi mambu yina yandi longukaka na Bisalu 10:34, 35, yina ke tubaka nde Nzambi ke pona-ponaka ve sadisaka yandi mingi.

Inki mambote yandi bakaka? Yandi ke tuba nde: “Mono kumaka kundima nde Bambangi ya Yehowa kele na dibundu ya kieleka ntangu mono monaka zola yina bo vandaka kumonisilana kukonda kutala bampusu ya nitu. Ntangu mono vandaka me baka ntete ve mbotika, Mbangi ya Yehowa mosi ya mundele bingaka mono na nzo na yandi sambu na kudia. Mono ndimaka ve nde yo lenda salama sambu mono me lutisaka ntete ve ntangu ti mundele mosi na ngemba yonso kansi kilumbu yina beto diaka na nzo na yandi. Bubu yai, mono kele na kati ya kimvuka ya bampangi ya ntoto ya mvimba.”