Sambu na Nki Bantu Ke Mengaka Bantu ya Nkaka?

Sambu na nki na nsi-ntoto yai bantu ke landa kaka kumenga bantu ya nkaka? Sambu na kuzaba kikuma yina ke pusaka bo na kumenga bantu ya nkaka, beto sosa ntete kuzaba ngogo kumenga ke tendula nki, sambu na nki bantu ke mengaka bantu ya nkaka mpi sambu na nki kikalulu yai me panzanaka na ntoto ya mvimba.

Kumenga Muntu Ke Tendula Nki?

Kumenga muntu ya nkaka kele kuzola yandi ve ata fioti to kuvanda ti kimbeni sambu na muntu mosi to sambu na kimvuka mosi buna ya bantu. Kikalulu yai kele mbi mingi kuluta kuwila muntu mosi makasi sambu na ntangu mosi buna.

MAMBU YINA KE SALAKA NDE BANTU KUMENGA BANTU YA NKAKA

Bantu ke bandaka kumenga bantu ya nkaka sambu na bikuma mingi. Bantu lenda banda kumenga bantu ya nkaka kaka sambu bantu yango kele bantu ya kimvuka mosi buna ata bantu yango me sala ve kima mosi ya mbi. Bo lenda menga bantu yango sambu bo lenda yindula nde bantu yonso ya kimvuka yango kele bantu ya mbi, bo kele kigonsa to nde bo lenda soba ve. Diaka, bo lenda tadila bantu yango bonso bantu mpamba, bonso kigonsa to bonso bantu yina ke nata bampasi. Bo lenda sadila bantu yina bo ke menga mambu ya mubulu, bo lenda monisila bo kukonda lunungu to bo lenda sadila bo mambu ya nkaka yina lenda sala nde kimbeni kuyantika na bantima ya bantu.

MUTINDU KIKALULU YA KUMENGA BANTU KE PANZANAKA

Muntu lenda menga bantu ya nkaka ata yandi me kutanaka ntete ve ti bantu yango. Mu mbandu, mbala mingi bantu ke kumaka kutadila bantu ya nkaka mutindu dibuta na bo to banduku na bo ke tadilaka bantu yango. Yo yina, kana muntu mosi ya dibuta ke mengaka kimvuka mosi ya bantu, na mbala mosi bantu yonso ya dibuta ta kuma mpi kutadila bantu yango mutindu mosi.

Kana beto bakisa mutindu kikalulu yai ya kumenga bantu ya nkaka ke panzanaka, pana beto ta zaba sambu na nki bantu mingi ke mengaka bantu ya nkaka. Kansi kele mpi ti mambu ya nkaka yina ke salaka nde bantu kumenga bantu ya nkaka. Sambu na kubakisa yo, beto fwete zaba ntete mutindu kikalulu yai ya mbi yantikaka. Biblia lenda sadisa beto na kuzaba mutindu yo yantikaka.

BIBLIA KE MONISAKA MUTINDU KIKALULU YA KUMENGA BANTU YANTIKAKA

Kifwanisu ya batolo-tolo zole ya me baluka mosi na lweka ya yina ya nkaka. Yo ke monisa mambu yina ke salaka nde bantu kumenga bantu ya nkaka. 1. Bansangu ya luvunu, kimvuka mosi ya bantu, internet, televizio to bazulunalu. 2. Kukonda kuzaba mambu ya me tala mutindu bantu ya nkaka ke zingaka, mpusu na bo mpi dibundu na bo. 3. Boma sambu luzingu na bo lenda soba, bo lenda vidisa bima na bo to sambu bo me zaba ve mambu yina lenda kumina bo. 4. Kumenga bantu ya nkaka, kuvanda ti bangindu ya mbi sambu na bantu ya nkaka, kukabula-kabula mpi mubulu.

KIKALULU YAI YA MBI YANTIKAKA VE NA BANTU. Yo yantikaka ntangu wanzio mosi na zulu yina bo kumaka kubinga Satana Diabulu buyaka kulemfukila Nzambi. Diabulu “vandaka muntu ya ke fwaka bantu ntangu yandi yantikaka” kubuya kulemfukila Nzambi. Satana ke landa kupusa bantu na kumenga mpi na kusala bantu ya nkaka mbi “sambu yandi kele muntu ya luvunu mpi tata ya luvunu.” (Yoane 8:44; 1 Yoane 3:11, 12) Biblia ke bingaka yandi muntu ya mbi, ya makasi mpi ya nku.—Yobi 2:7; Kusonga 12:9, 12, 17.

YO KE VANDAKA VE MPASI SAMBU MUNTU YA KUKONDA KUKUKA KUMENGA MUNTU YA NKAKA. Adami muntu ya ntete landaka Satana mpi yandi salaka disumu. Diambu yai me salaka nde bantu yonso kukuma bantu ya masumu mpi ya kukonda kukuka. (Baroma 5:12) Kaini mwana ya ntete ya Adami mengaka mpangi na yandi Abele mpi fwaka yandi. (1 Yoane 3:12) Kansi ata mpidina, bantu mingi ke zolaka bantu ya nkaka mpi ke wilaka bo mawa. Sambu beto kele bantu ya masumu, bantu mingi ke kabaka ve, ke lulaka bantu ya nkaka mpi ke vandaka lulendo. Bikalulu yai ke salaka nde bantu kumenga bantu ya nkaka.—2 Timoteo 3:1-5.

MUNTU YINA KE ZOLAKA VE BANTU YINA KELE VE KITESO MOSI TI YANDI KE MENGAKA BANTU YA NKAKA. Nsi-ntoto yai ya beto ke zinga ke salaka nde kikalulu ya kumenga bantu kukuma mingi ntangu yo ke pusaka bantu na kuwila ve bantu ya nkaka mawa, na kuvanda nku mpi na kuvanda ti bikalulu ya mbi. Kukonda kuwila bantu ya nkaka, kuvanda ti bangindu ya mbi sambu na bantu, mafingu, kupesa bantu ya nkaka mpasi mpi kikuluna ke salama sambu “nsi-ntoto ya mvimba kele na nsi ya kiyeka ya muntu ya mbi,” Satana Diabulu.—1 Yoane 5:19.

Kansi katula kutubila mutindu kikalulu yai ya mbi yantikaka, Biblia ke tubilaka mpi mambu ya nkaka. Yo ke tubilaka mpi mambu ya kusala sambu na kubuya kikalulu yai.