Ntangu Kikalulu ya Kumenga Bantu ya Nkaka Ta Vanda Diaka Ve Ata Fioti

NZAMBI TA KATULA MAMBU YONSO YINA KE SALAKA NDE BANTU KUMENGA BANTU YA NKAKA

1. 1. SATANA DIABULU. Satana kele wanzio ya mbi yina lemfukaka ve na Nzambi. Yandi muntu ke pusaka bantu na kumenga bantu ya nkaka bubu yai. Nzambi ta fwa yandi mpi bantu yonso yina ke mengaka bantu ya nkaka bonso yandi.—Nkunga 37:38; Baroma 16:20.

2. 2. NSI-NTOTO YA MBI YA SATANA. Nzambi ta katula mambu yonso ya mbi yina ke pusaka bantu na kumenga bantu ya nkaka. Mu mbandu, yandi ta katula bantu yonso ya politiki ya luvunu mpi bantwadisi ya mabundu yina ke pusaka bantu na kumenga bantu ya nkaka. Nzambi ta katula mpi mambu ya mumbongo ya bwimi, kufuta avoka mpi kimuyibi.—2 Piere 3:13.

3. 3. KUKONDA KUKUKA. Biblia ke tuba nde, bantu yonso me kumaka ya kukonda kukuka. Bo ke vandaka ti kikalulu ya kuyindula mambu ya mbi mpi nzala ya kusala mambu ya mbi. (Baroma 5:12) Kumenga bantu ya nkaka kele mosi na kati ya bikalulu yango ya mbi. Nzambi ta sadisa beto na kukatula bikalulu yai yonso ya mbi na bantima na beto mpi yandi ta katula dibela kikalulu yai ya kumenga bantu ya nkaka.—Yezaya 54:13.

BIBLIA KE TUBA NDE NZAMBI TA KATULA KIKALULU YA KUMENGA BANTU AWA NA NTOTO

1. 1. BO TA SADILA DIAKA VE ATA MUNTU MOSI DIAMBU YA MBI. Kimfumu ya Nzambi ta yala ntoto ya mvimba. Yo ta vanda luyalu ya lunungu mpi yo ta yala kukonda nsuka awa na ntoto. (Daniele 2:44) Kuvanda ti bangindu ya mbi sambu na bantu mpi kubuya bantu ya nkaka ta vanda diaka ve. Nzambi ta katula mambu yonso ya kukonda lunungu yina bantu ke kutana ti yo bubu yai.—Luka 18:7.

2. 2. BANTU YONSO TA ZINGA NA NGEMBA. Mubulu mpi bitumba ta vanda diaka ve. (Nkunga 46:9) Bantu yonso na ntoto ta zinga na ngemba mpi ntoto ta kuma kisika mosi ya mbote ya kuzinga.—Nkunga 72:7.

3. 3. BANTU YONSO TA VANDA YA KUKUKA MPI BO TA ZINGA MVULA NA MVULA. Bantu ta zolaka bantu ya nkaka. (Matayo 22:39) Ata muntu mosi ve ta kudiyangisa mu mbandu sambu na bangindu ya mbi to sambu yandi me yindula diambu mosi buna. (Yezaya 65:17) Ntangu kikalulu ya kumenga bantu ya nkaka ta vanda diaka ve, bantu “ta wa kiese mingi kibeni na ngemba ya mingi.” —Nkunga 37:11.

Keti nge ta zola kuzinga na nsi-ntoto ya mutindu yai? Bubu yai, minsiku ya Biblia ke sadisa bantu mingi na kukatula kikalulu ya kumenga bantu ya nkaka. (Nkunga 37:8) Yai kele mambu yina Bambangi ya Yehowa mingi ke sala na ntoto ya mvimba. Ata mutindu na bo ya kuzinga kele ve kiteso mosi mpi bo ke zingaka ve kisika mosi, bo kele na bumosi mpi bo ke zolanaka.—Yezaya 2:2-4.

Bambangi ya Yehowa ta vanda na kiese ya kusonga nge mutindu nge lenda kanga ntima na mambu ya kukonda lunungu mpi na kikalulu ya kumenga bantu ya nkaka. Mambu ya nge ke longuka lenda sadisa nge na kukatula malembe-malembe kikalulu ya kumenga bantu ya nkaka kansi na kumonisila bo zola. Nge ta longuka mutindu ya kuzola bantu ya nkaka ata bantu yina ke pesaka ve mersi to ke mengaka bantu ya nkaka. Diambu ya kiese kele nde banda bubu, nge ta vanda na kiese mpi nge ta vanda ti kinduku ya mbote ti bantu ya nkaka. Kima ya kuluta mfunu kele nde, nge ta zaba mambu yina nge lenda sala sambu na kukota na Kimfumu ya Nzambi. Kuna, kikalulu ya kumenga bantu ya nkaka ta vanda diaka ve. —Nkunga 37:29.