Beto Lenda Buya Kumenga Bantu ya Nkaka!

Kana nde ve, beto ke ndima nde nge me monaka dezia mutindu bo me mengaka muntu ya nkaka. Ntangu yonso, beto ke waka bansangu ya bantu yina ke mengaka bantu ya nkaka to ke zolaka bo ve ata fioti sambu bo kele ve insi mosi ti bo, mpusu mosi ti bo to sambu bo kele bantu ya dibundu ya nkaka. Mambu yai me salaka nde, baguvernema ya nkaka kutula bansiku ya kupesa ndola ya ngolo na bantu yonso yina ke sala mambu ya mutindu yai.

Mbala mingi, bantu yina bo ke mengaka ke mengaka mpi bantu ya nkaka. Diaka, mbala mingi bantu yina bo ke sadilaka mambu ya mbi ke sosaka mpi kusadila bantu ya nkaka mambu ya mbi.

Mbala ya nkaka nge me monaka to nge me waka dezia mutindu bantu ke vandaka ti bangindu ya mbi sambu na bantu ya nkaka, mutindu bo ke tadilaka bantu ya nkaka, mutindu bo ke monaka bantu ya nkaka mpamba, mutindu bo ke fingaka bantu ya nkaka mpi mutindu bo ke sosaka kusala bantu ya nkaka mbi. Ata mpidina, kumenga kele kikalulu mosi ya mbi kibeni. Mbala mingi kana muntu ke menga muntu ya nkaka, yo lenda pusa yandi na kubula muntu yango, na kusala yandi nku to nkutu kufwa yandi.

Zulunalu yai ta pesa mvutu na bangiufula ya ke landa mpi yo ta songa beto mutindu beto lenda buya kikalulu ya kumenga bantu ya nkaka. Bangiufula yango yo yai:

• Sambu na nki kikalulu ya kumenga bantu ya nkaka kele mingi?

• Inki mutindu kikalulu yai ya kulanda kumenga bantu lenda mana?

• Keti kilumbu kele kikalulu yai ta vanda diaka ve ata fioti?