1 | Kisambu ‘Beno Losa Basusi na Beno Yonso na Yandi’
BIBLIA KE TUBAKA NDE: ‘Beno losa basusi na beno yonso na [Nzambi] sambu yandi ke kudibanzaka sambu na beno.’—1 PIERE 5:7.
Yo Ke Tendula Nki?
Yehowa Nzambi ke lomba beto na kusonga yandi mambu yonso ya kele bonso kilo na zulu ya mabanza mpi bantima na beto. (Nkunga 55:22) Beto lenda samba yandi sambu na konso kima yina, yo vanda ya fioti to ya nene. Kana diambu mosi ke yangisa beto, yo ke yangisaka mpi Yehowa. Kusamba Yehowa kele kima ya mfunu mingi ya kusala sambu na kuvanda ti ngemba ya mabanza.—Bafilipi 4:6, 7.
Inki Mutindu Yo Lenda Sadisa Beto?
Ntangu beto ke nwana ti maladi ya kuniokwama na mabanza, beto lenda kudiwa beto mosi. Bantu ya nkaka ke bakisaka ve ntangu yonso mambu ya mpasi ya beto ke kutana ti yo. (Bingana 14:10) Kansi kana beto ke songa Nzambi na masonga yonso mutindu beto ke kudiwa, beto ta zwa muntu ya ta vanda pana sambu na kuwidikila beto na mawete yonso mpi kubakisa beto. Yehowa ke monaka beto, yandi ke zaba bampasi na beto mpi mambu ya ke yangisa beto mpi yandi ke zolaka nde beto samba yandi sambu na konso kima yina ke yangisa beto.—2 Bansangu 6:29, 30.
Kusolula ti Yehowa na kisambu ta sadisa beto na kukuma kundima kibeni nde yandi ke kudiyangisaka sambu na beto. Beto lenda samba mutindu muyimbi-bankunga sambaka nde: “Nge me mona mpasi na mono; nge me zaba mpasi na mono ya ngolo.” (Nkunga 31:7) Kuzaba nde Yehowa ke monaka mambu ya mpasi yina beto ke kutanaka ti yo lenda sadisa beto na kukangila yo ntima. Kansi yandi ke sukaka ve kaka na kumona bampasi na beto. Yandi ke bakisaka bampasi yina beto ke kutana ti yo kuluta bantu yonso mpi yandi ke pesaka beto kikesa mpi ke lembikaka beto na nzila ya Biblia.