DISOLO YA KULONGUKA 49
Keti Yehowa Ta Pesa Mvutu na Bisambu na Mono?
“Beno ta binga mono, beno ta kwisa, mpi beno ta samba mono, ebuna mono ta wa beno.”—YER. 29:12.
NKUNGA 41 Wa Kisambu na Mono
MAMBU YINA DISOLO YAI KE TUBILAa
1-2. Sambu na nki beto lenda yindula nde Yehowa ke pesa ve mvutu na bisambu na beto?
“WA KIESE mingi kibeni na Yehowa, ebuna yandi ta pesa nge banzala ya ntima na nge.” (Nk. 37:4) Yo kele lusilu mosi ya mbote kibeni. Keti beto fwete yindula nde Yehowa ta pesa beto konso kima yina beto ke lomba yandi kaka na ntangu yina beto ke lomba yo? Sambu na nki beto fwete kudiyula ngiufula yina? Beto tadila bambandu ya ke landa. Mpangi-nkento mosi ya me kwelaka ntete ve ke samba sambu yandi kota Nzo-Nkanda ya Bansamuni ya Kimfumu. Kansi bamvula mingi me luta bo ke binga yandi kaka ve. Mpangi-bakala mosi ya leke ke samba Yehowa na kubelula yandi na maladi mosi ya ngolo sambu yandi sala diaka mingi na dibundu. Kansi yandi ke beluka kaka ve. Bibuti mosi ya Bakristu ke samba nde mwana na bo kubikala kaka na kieleka. Kansi mwana yango me baka lukanu ya kuyambula kusadila Yehowa.
2 Mbala ya nkaka nge mpi me lombaka dezia Yehowa kima mosi kansi yandi me pesaka nge yo ve. Yo yina, nge lenda yindula nde Yehowa ke pesaka mvutu kaka na bisambu ya bantu ya nkaka kansi ve na bisambu na nge. To nge lenda yindula nde mbala ya nkaka nge salaka kima mosi ya mbi. Mpangi-nkento Janiceb vandaka mpi kuyindula mutindu yina. Yandi ti bakala na yandi sambaka Yehowa sambu bo kuma kusala na Betele. Yandi ke tuba nde: “Mono vandaka kundima kibeni nde bo ta binga beto na Betele ntama mingi ve.” Kansi bamvula mingi me lutaka mpi bo me bingaka bo ve na Betele. Mpangi Janice ke tuba nde: “Mono vandaka mawa-mawa mpi mono vandaka kubakisa ve ata kima mosi. Mono vandaka kudiyula nki kima mono salaka yina sepedisaka ve Yehowa. Mono sambaka mingi sambu beto kuma kusala na Betele. Sambu na nki yandi pesaka ve mvutu na bisambu na mono?”
3. Inki beto ta tubila na disolo yai?
3 Bantangu ya nkaka, beto ke kudiyulaka kana Yehowa ke waka kibeni bisambu na beto. Ata bansadi ya nkaka ya Yehowa ya ntangu ya ntama kudiyulaka mpi mutindu yina. (Yobi 30:20; Nk. 22:2; Hab. 1:2) Inki lenda ndimisa nge nde Yehowa ta pesa mvutu na bisambu na nge? (Nk. 65:2) Sambu na kupesa mvutu na ngiufula yina, beto ta pesa ntete mvutu na bangiufula yai tatu: (1) Inki Yehowa ta sala? (2) Inki Yehowa ke zola nde beto sala? (3) Sambu na nki yo lenda lomba nde beto soba mambu yina beto ke lomba?
INKI YEHOWA TA SALA?
4. Mutindu Yeremia 29:12 ke monisa yo, Yehowa ke sila beto nki?
4 Yehowa ke sila nde yandi ta wa bisambu na beto. (Tanga Yeremia 29:12.) Nzambi na beto ke zolaka beto sambu beto ke sadilaka yandi na mutindu ya mbote, yo yina ntangu yonso yandi ke tulaka dikebi na bisambu na beto. (Nk. 10:17; 37:28) Kansi yo ke tendula ve nde yandi ta pesa beto konso kima yina beto ke lomba yandi. Beto lenda vingila tii na nsi-ntoto ya mpa na ntwala nde beto baka bima ya nkaka yina beto ke lombaka yandi.
5. Inki Yehowa ke tadilaka na ntwala ya kupesa mvutu na bisambu na beto? Tendula.
5 Yehowa ke tadilaka kana bima yina beto ke lomba ke wakana ti lukanu na yandi. (Yez. 55:8, 9) Lukanu na yandi kele mpi nde ntoto ya mvimba kufuluka ti bantu yina ke sadila yandi na kiese mpi na bumosi na nsi ya luyalu na yandi. Kansi Satana ke tubaka nde bantu ta vanda na kiese mingi kana bo ke kudiyala bo mosi. (Kuy. 3:1-5) Sambu na kumonisa nde mambu yina Satana tubaka kele ya luvunu, Yehowa me bikaka nde bantu kudiyala bo mosi. Kansi luyalu ya bantu me natilaka bo bampasi mingi yina beto ke mona bubu yai. (Lon. 8:9) Beto ke zaba nde Yehowa ta katula ve bampasi yina yonso bubu yai. Kana Yehowa kukatula yo, bantu ya nkaka lenda yindula nde luyalu ya bantu kele ya mbote mpi nde bo lenda kuka kukatula bampasi yonso.
6. Sambu na nki beto fwete ndima kibeni nde Yehowa ta pesa mvutu na zola yonso mpi na mutindu ya mbote?
6 Beto lenda lomba Yehowa bima ya mutindu mosi kansi yandi pesa mvutu na mitindu ya kuswaswana. Mu mbandu, ntangu ntotila Ezekiasi belaka ngolo, yandi lombaka Yehowa na kubelula yandi mpi Yehowa belulaka yandi. (2 Bant. 20:1-6) Kansi ntangu ntumwa Polo bondilaka Yehowa na kukatula yandi “nsende na nsuni,” yo ke monana nde yo vandaka maladi mosi yina yandi vandaka ti yo, Yehowa katulaka yandi yo ve. (2 Bak. 12:7-9) Beto tadila mpi mbandu ya ntumwa Yakobo ti ntumwa Piere. Ntotila Erode zolaka kufwa bo yonso zole. Bampangi na dibundu sambaka sambu na Piere mpi ntembe kele ve nde bo sambaka mpi sambu na Yakobo. Erode fwaka Yakobo kansi wanzio mosi gulusaka Piere. (Bis. 12:1-11) Beto lenda kudiyula nde: ‘Sambu na nki Yehowa gulusaka Piere kansi Yakobo ve?’ Biblia ke tubila yo ve.c Beto ke ndima kibeni nde mambu yonso yina Yehowa ke salaka ke “kondaka ve lunungu ata fioti.” (Kul. 32:4) Mpi beto ke zaba nde Yehowa vandaka kuzola bo yonso zole, Piere ti Yakobo. (Kus. 21:14) Bantangu ya nkaka, Yehowa lenda pesa mvutu na bisambu na beto na mutindu yina beto yindulaka ve. Kansi beto ke ndimaka kibeni nde bamvutu ya Yehowa na bisambu na beto ke vandaka kaka ya zola mpi ya lunungu, yo yina beto ke kudiyangisaka ve na mutindu yandi ta pesa beto mvutu.—Yobi 33:13.
7. Inki beto fwete sala ve mpi sambu na nki?
7 Beto ke sosaka ve kufwanisa mambu yina beto ke kutana ti yo ti ya bantu ya nkaka. Mu mbandu, beto lenda lomba Yehowa kima mosi kansi yandi pesa beto yo ve mutindu beto lombaka yandi. Kansi na nima, beto lenda wa nde muntu ya nkaka lombaka mpi kima ya mutindu mosi mpi yo ke monana nde Yehowa pesaka yandi yo. Yo kuminaka mpangi Anna. Yandi vandaka kusamba sambu bakala na yandi Matthew kubeluka na maladi ya kansere. Kaka na ntangu yina, bampangi ya nkaka zole ya minunu vandaka mpi ti kansere. Anna sambaka mingi sambu na bakala na yandi mpi sambu na bampangi yina zole. Bampangi yina zole belukaka kansi bakala na yandi fwaka. Ntete, mpangi Anna kudiyulaka kana Yehowa muntu sadisaka bampangi yina na kubeluka. Kana mpidina, sambu na nki Yehowa sadisaka ve mpi bakala na yandi na kubeluka mutindu yandi vandaka kulomba yo? Ya kieleka, beto ke zaba ve sambu na nki bampangi yina zole belukaka. Kansi beto ke zaba nde Yehowa ta manisa bampasi yonso mpi yandi kele ti mpusa ya ngolo ya kufutumuna banduku na yandi yonso yina me fwaka.—Yobi 14:15.
8. (a) Mutindu Yezaya 43:2 ke monisa yo, nki mutindu Yehowa ke sadisaka beto? (b) Inki mutindu kisambu lenda sadisa beto ntangu beto ke kutana ti bampasi? (Tala video Kisambu Ke Sadisaka Beto na Kukanga Ntima na Bampasi.)
8 Yehowa ta sadisa beto ntangu yonso. Yehowa kele Tata na beto ya zola mpi yandi ke zolaka ve nde beto mona mpasi. (Yez. 63:9) Kansi yandi ke salaka ve nde beto kutana ve ti bampasi yina beto lenda fwanisa ti bamasa to baludimi ya tiya. (Tanga Yezaya 43:2.) Kansi yandi ke sila beto nde yandi ta sadisa beto ‘na kuluta na kati’ na yo. Mpi ata beto me kutana ti bampasi ya nki mutindu, yandi ta bika ve nde yo kanga beto nzila ya kusadila yandi. Yehowa ke pesaka beto mpi mpeve santu na yandi sambu yo sadisa beto na kukanga ntima. (Luka 11:13; Bafil. 4:13) Yo yina, beto fwete ndima nde yandi ta pesa beto bima yina beto kele ti yo kibeni mfunu sambu na kukanga ntima mpi kulanda kusadila yandi na mutindu ya mbote.d
INKI YEHOWA KE ZOLA NDE BETO SALA?
9. Inki mutindu Yakobo 1:6, 7 ke ndimisa beto nde Yehowa ta sadisa beto?
9 Yehowa ke zola nde beto tudila yandi ntima. (Baeb. 11:6) Bantangu ya nkaka, beto lenda kudiyangisa mingi mpi kuyindula nde beto ta kuka ve kukangila bampasi na beto ntima. Beto lenda yantika mpi kuyindula nde Yehowa ta sadisa beto ve. Kansi Biblia ke tuba nde beto lenda “mata na kibaka” ti ngolo ya Nzambi. (Nk. 18:29) Yo yina, na kisika ya kukuma ti badute, beto fwete samba Yehowa na ntima ya mvimba mpi kundima kibeni nde yandi ta pesa mvutu na bisambu na beto.—Tanga Yakobo 1:6, 7.
10. Pesa mbandu ya mambu yina beto fwete sala na kuwakana ti bisambu na beto.
10 Yehowa ke zola nde beto sala mambu na kuwakana ti bisambu na beto. Mu mbandu, mpangi mosi lenda samba Yehowa sambu mfumu na yandi ya kisalu kundima kupesa yandi konzie sambu yandi kwenda na lukutakanu ya distrike. Inki mutindu Yehowa lenda pesa mvutu na kisambu na yandi? Yehowa lenda pesa mpangi yina kikesa ya kusolula ti mfumu na yandi ya kisalu. Kansi yo ta lomba nde mpangi yango kukwenda na mfumu yina sambu yandi solula ti yandi. Yo lenda lomba mpi nde yandi sala yo mbala na mbala. Yandi lenda songa mpi mfumu yango kana mpila ta vanda sambu yandi sala mpi kilumbu ya nkaka na kisika ya kilumbu yina. Diaka, yandi lenda songa mfumu yango na kuzenga yandi mbongo ya bilumbu yina yandi ta sala ve.
11. Sambu na nki beto fwete samba mbala na mbala sambu na mambu yina beto kele ti mfunu na yo?
11 Yehowa ke zola nde beto samba mbala na mbala sambu na mambu yina beto kele ti yo mfunu. (1 Bate. 5:17) Mambu yina Yezu tubaka ke monisa nde Yehowa lenda pesa beto ve bima ya nkaka yina beto ke lomba yandi kaka na ntangu yina beto ke lomba yo. (Luka 11:9) Yo yina, kuyambula ve. Samba na ngolo yonso mpi mbala na mbala. (Luka 18:1-7) Kana beto ke landa kusamba sambu na kima mosi, Yehowa ta mona nde beto kele kibeni ti mfunu na yo. Beto ta monisa mpi nde beto ke tula ntima nde yandi ta sadisa beto.
SAMBU NA NKI YO LENDA LOMBA NDE BETO SOBA MAMBU YINA BETO KE LOMBA?
12. (a) Inki kele ngiufula mosi yina beto fwete kudiyula sambu na mambu yina beto ke lomba mpi sambu na nki? (b) Inki mutindu bisambu na beto fwete monisa luzitu sambu na Yehowa? (Tala lupangu “Keti Bisambu na Mono Ke Monisaka nde Mono Ke Zitisaka Yehowa?”)
12 Kana beto ke baka ve bima yina beto ke lomba na kisambu, beto lenda kudiyula bangiufula yai tatu. Ya ntete, ‘Keti mono ke lomba kima ya mbote?’ Mbala mingi, beto ke yindulaka nde beto ke zabaka bima yina beto ke vandaka kibeni ti yo mfunu. Kansi bima ya nkaka ya beto ke lombaka ke vandaka ve mpenza yina beto ke vandaka ti yo mfunu mingi. Kana beto ke samba Yehowa sambu na diambu mosi, mbala ya nkaka kele ti mutindu ya nkaka ya kuluta mbote ya kuyidika yo kuluta yina beto ke lomba yandi. Diaka, bima ya nkaka yina beto ke lombaka lenda wakana ve ti luzolo ya Yehowa. (1 Yoa. 5:14) Beto baka mbandu ya bibuti yina beto tubilaka na paragrafe ya ntete. Bo lombaka Yehowa na kusadisa mwana na bo na kubikala na kieleka. Yo lenda monana bonso nde bo lombaka kima ya mbote. Kansi Yehowa ke pusaka beto ve na kusadila yandi na kingolo-ngolo. Yandi ke zolaka nde beto yonso kupona na kusadila yandi, yo vanda beto to bana na beto. (Kul. 10:12, 13; 30:19, 20) Yo yina, bibuti yina lenda lomba Yehowa na kusadisa bo na kusimba ntima ya mwana na bo sambu yandi zola yandi mpi kukuma nduku na Yandi.—Bing. 22:6; Baef. 6:4.
13. Mutindu Baebreo 4:16 ke monisa yo, nki ntangu Yehowa ta sadisa beto? Tendula.
13 Ngiufula ya zole kele, ‘Keti yo kele ntangu ya mbote sambu na Yehowa na kupesa mono kima yina mono ke lomba?’ Beto lenda yindula nde Yehowa fwete pesa beto nswalu kima yina beto ke lomba yandi. Ya kieleka, beto ke ndima kibeni nde Yehowa ke zaba ntangu ya mbote ya kusadisa beto. (Tanga Baebreo 4:16.) Kansi, kana beto me baka ve kima yina beto lombaka Yehowa, beto lenda yindula nde yandi me buya kupesa beto yo. Mbala ya nkaka mvutu na yandi kele nde yandi ta pesa beto yo na nima. Beto tadila mbandu ya mpangi-bakala yina ya leke ya vandaka kusamba sambu Yehowa kubelula yandi na maladi na yandi. Kana Yehowa belulaka yandi na mutindu ya kuyituka, Satana lendaka kutuba nde mpangi yina ke landa kusambila Yehowa kaka sambu yandi belulaka yandi. (Yobi 1:9-11; 2:4) Diaka, Yehowa me tulaka dezia ntangu yina yandi ta katula bamaladi yonso. (Yez. 33:24; Kus. 21:3, 4) Beto lenda yindula ve nde yandi ta belula beto na mutindu ya kuyituka bubu yai. Yo yina, mpangi yina lendaka kulomba Yehowa na kupesa yandi ngolo mpi ngemba ya mabanza sambu na kukanga ntima na maladi yina mpi kulanda kusadila yandi na mutindu ya mbote.—Nk. 29:11.
14. Mbandu ya mpangi Janice ke longa nge nki?
14 Beto baka mbandu ya mpangi Janice yina sambaka sambu na kusala na Betele. Bamvula 5 lutaka na ntwala nde yandi bakisa nde Yehowa pesaka mvutu na bisambu na yandi na mutindu yina yandi yindulaka ve. Yandi ke tuba nde: “Yehowa sadilaka ntangu yina sambu na kulonga mono mpi kusadisa mono na kukuma Mukristu ya mbote. Yo lombaka nde mono kuma ti lukwikilu ya ngolo na Yehowa. Yo lombaka mpi nde mono kuma kulonguka mbote-mbote Biblia. Diaka, yo lombaka nde mono bakisa nde mono fwete vanda na kiese ntangu mono ke sadila Yehowa konso kisika yina mono kele.” Na nima, bo tindaka mpangi Janice ti bakala na yandi na kisalu ya nziunga. Mpangi Janice ke yindula diaka bantangu yina lutaka mpi ke tuba nde: “Yehowa pesaka mvutu na bisambu na mono na mutindu yina mono yindulaka ve. Yo bakaka mwa ntangu na ntwala nde mono bakisa nde mvutu yina Yehowa pesaka mono vandaka kado ya mbote. Mono ke pesa yandi mersi sambu na zola mpi ntima-mbote yina yandi me monisilaka mono.”
Kana nge ke yindula nde Yehowa ke pesa ve mvutu na bisambu na nge, samba sambu na mambu ya nkaka (Tala paragrafe 15)f
15. Sambu na nki yo lenda lomba nde beto samba ve kaka sambu na kima mosi buna? (Tala mpi bifwanisu ya ke wakana ti paragrafe yai.)
15 Ngiufula ya tatu kele nde, ‘Keti mono fwete lomba kima ya nkaka?’ Yo kele mbote na kulomba Yehowa kima yina beto kele mpenza ti yo mfunu. Kansi bantangu ya nkaka yo kele mbote na kubika nde Yehowa kupesa beto mvutu na mutindu yina yandi me zola. Beto baka mbandu ya mpangi-nkento yina vandaka kusamba sambu na kukota Nzo-Nkanda ya Bansamuni ya Kimfumu. Yandi zolaka kukota nzo-nkanda yina sambu na kusadisa konso kisika yina mpusa vandaka mingi. Yo yina, na kisika ya kusamba sambu bo binga yandi na nzo-nkanda yina, yandi lenda lomba Yehowa na kusadisa yandi na kubakisa mabaku ya nkaka yina yandi lenda sadila Yehowa mingi. (Bis. 16:9, 10) Yandi lenda yula nkengi ya nziunga na bo kana kele ti dibundu yina kele ti mfunu ya bapasudi-nzila mingi. To yandi lenda sonikila Betele sambu na kuzaba kisika yina mpusa ya bansamuni ya Kimfumu kele mingi.e
16. Inki beto fwete ndima?
16 Mutindu beto me mona yo, beto ke ndima kibeni nde Yehowa ta pesa mvutu na bisambu na beto na zola mpi na mutindu ya mbote. (Nk. 4:3; Yez. 30:18) Bantangu ya nkaka, Yehowa lenda pesa beto mvutu na mutindu yina beto yindulaka ve. Kansi Yehowa ta konda ve kupesa mvutu na bisambu na beto. Yandi ke zolaka beto mingi kibeni. Diaka, yandi ta yambula beto ve ata fioti. (Nk. 9:10) Yo yina, landa ‘kutudila yandi ntima ntangu yonso,’ mpi kangula ntima na nge na ntwala na yandi na kisambu.—Nk. 62:8.
NKUNGA 43 Kisambu ya Kuvutula Matondo
a Disolo yai ke tubila sambu na nki beto fwete ndima kibeni nde Yehowa ta pesa mvutu ntangu yonso na bisambu na beto na zola yonso mpi na mutindu ya mbote.
b Beto me soba bazina ya nkaka.
c Tala disolo “Tudila Yehowa Ntima na Mambu Yonso?” na Nzozulu ya Nkengi ya février 2022 balut. 3-6.
d Sambu na kuzaba mambu mingi ya me tala mutindu Yehowa ke sadisaka beto na kukanga ntima na bampasi, tala video Kisambu Ke Sadisaka Beto na Kukanga Ntima na Bampasi na jw.org.
e Kana nge ke zola kusala na teritware ya Betele ya nkaka, tala mukanda Beto Me Vukana Sambu na Kusala Luzolo ya Yehowa, kapu 10, bapar. 6-9.
f NTENDULA YA BIFWANISU: Bampangi zole ya bankento ke samba na ntwala ya kufulusa formilere ya kukota Nzo-Nkanda ya Bansamuni ya Kimfumu. Na nima, bo me binga mosi kansi ya nkaka ve. Na kisika ya kulemba nitu sambu bo me binga yandi ve, mpangi yina ke samba Yehowa sambu yandi sadisa yandi na kubakisa mabaku ya nkaka ya kusadila Yehowa mingi. Na nima, yandi ke sonikila Betele mukanda sambu na kusala bonso volontere kisika yina mpusa kele mingi.