Inki Mutindu Yehowa Ke Pesaka Mvutu na Bisambu na Beto?

1-2. Inki beto lenda kudiyula na yina me tala bisambu?

KETI nge me kudiyulaka dezia kana Yehowa ke pesaka mvutu na bisambu na nge? Kana mpidina, nge kele ve nge mosi. Bampangi mingi mpi ke yindulaka mutindu yina, mingi-mingi kana bo ke kutana ti bampasi. Kana beto ke kutana ti bampasi, beto mpi lenda kudiyula kana Yehowa ke pesaka kibeni mvutu na bisambu na beto.

² Beto tadila diaka bikuma yina ke ndimisa beto nde Yehowa ke pesaka mvutu na bisambu ya bansadi na yandi. (1 Yoa. 5:15) Beto ta pesa mpi mvutu na bangiufula yai: Sambu na nki bantangu ya nkaka beto lenda yindula nde Yehowa ke pesa ve mvutu na bisambu na beto? Inki mutindu Yehowa ke pesaka mvutu na bisambu na beto bubu yai?

YEHOWA LENDA PESA MVUTU NA MUTINDU YINA BETO VANDAKA KUYINDULA VE

3. Sambu na nki Yehowa ke zolaka nde beto samba yandi?

³ Biblia ke tubaka nde Yehowa ke zolaka beto mingi mpi yandi ke bakaka beto na valere. (Agai 2:7; 1 Yoa. 4:10) Yo yina yandi ke songa beto na kulomba yandi lusadisu na kisambu. (1 Pie. 5:6, 7) Yandi ke zola kusadisa beto na kukangama ngolo na yandi mpi na kukanga ntima na bampasi yina beto ke kutana ti yo.

4. Inki ke ndimisa beto nde Yehowa ke pesaka mvutu na bisambu ya bansadi na yandi? (Tala mpi kifwanisu ya ke wakana ti paragrafe yai.)

⁴ Mbala mingi, Biblia ke monisaka nde Yehowa pesaka bamvutu na bisambu ya bansadi na yandi. Keti mbandu mosi ke kwisila nge na mabanza? Beto tadila mbandu ya ntotila Davidi. Yandi vandaka ti bambeni mingi ya ngolo na luzingu na yandi mpi mbala na mbala yandi vandaka kulomba lusadisu ya Yehowa na kisambu. Kilumbu mosi yandi sambaka Yehowa nde: “O Yehowa, wa kisambu na mono; wa kisambu ya mono ke sala sambu na kulomba lusadisu. Na kwikama na nge mpi na lunungu na nge, pesa mono mvutu.” (Nk. 143:1) Yehowa pesaka mvutu na bisambu ya Davidi. (1 Sam. 19:10, 18-20; 2 Sam. 5:17-25) Yo yina Davidi tubaka ti kundima yonso nde: “Yehowa kele pene-pene ya bantu yonso yina ke bingaka yandi.” Beto mpi fwete ndima mpidina.​—Nk. 145:18.

5. Na ntangu ya ntama, keti ntangu yonso Yehowa vandaka kupesa bamvutu na bisambu ya bansadi na yandi na mutindu yina bo vandaka kuyindula? Pesa mbandu. (Tala mpi kifwanisu ya ke wakana ti paragrafe yai.)

⁵ Yehowa lenda pesa mvutu na bisambu na beto na mutindu yina beto yindulaka ve. Yo kuminaka mpi ntumwa Polo. Yandi lombaka Nzambi na kukatula yandi “nsende na nsuni.” Polo sambaka Yehowa mbala tatu sambu yandi katula yandi yo. Keti Yehowa pesaka mvutu na bisambu yina? Ee, kansi ve na mutindu yina Polo vandaka kuyindula. Na kisika ya kukatula mpasi yina, Yehowa pesaka Polo ngolo yina yandi vandaka ti yo mfunu sambu na kulanda kusadila yandi na mutindu ya mbote.​—2 Bak. 12:7-10.

6. Sambu na nki bantangu ya nkaka beto lenda yindula nde Yehowa ke pesa ve mvutu na bisambu na beto?

⁶ Bantangu ya nkaka, Yehowa lenda pesa beto mpi mvutu na mutindu yina beto yindulaka ve. Beto fwete ndima kibeni nde Yehowa ke zaba mutindu ya kuluta mbote ya kusadisa beto. Nkutu yandi lenda “sala mingi kibeni kuluta mambu yonso yina beto ke lombaka to ke yindulaka na kuwakana ti ngolo na yandi yina ke salaka na beto.” (Baef. 3:20) Yo yina, yandi lenda pesa mvutu na bisambu na beto na ntangu to na mutindu yina beto yindulaka ve.

7. Sambu na nki yo lenda lomba nde beto soba mambu yina beto ke samba sambu na yo? Pesa mbandu.

⁷ Beto lenda soba mambu yina beto ke samba sambu na yo ntangu beto ke bakisa mbote-mbote luzolo ya Yehowa. Beto tadila mbandu ya mpangi Martin Poetzinger. Ntangu fioti na nima ya makwela na yandi, bo tulaka yandi na kisika yina bo vandaka kupesa bantu bisalu ya ngolo na Allemagne. Ntete, yandi sambaka Yehowa na kusadisa yandi na kubasika na kisika yina sambu yandi sadisa nkento na yandi mpi sambu yandi vutukila kulonga nsangu ya mbote. Kansi na nima ya bamposo zole, yandi monaka ve ata kima mosi yina monisaka nde yandi lendaka kubasika na kisika yina. Yo yina yandi yantikaka kusamba nde: “Pardo Yehowa songa mono mambu yina nge ke zola nde mono sala.” Yandi yantikaka kuyindula mambu yina bampangi ya nkaka yina vandaka mpi na kisika yina, vandaka kukutana ti yo. Bampangi mingi vandaka kudiyangisa mingi sambu na bankento mpi bana na bo. Mpangi Poetzinger sambaka diaka Yehowa nde: “Mersi Yehowa sambu na mukumba yai ya mpa. Sadisa mono na kupesa bampangi kikesa.” Yandi lutisaka bamvula uvwa yina landaka na bisika yina bo vandaka kupesa bantu bisalu ya ngolo mpi yandi vandaka kupesa bampangi kikesa.

8. Inki kima ya mfunu beto fwete vila ve ntangu beto ke samba?

⁸ Beto fwete vila ve nde Yehowa kele ti lukanu mpi yandi ta lungisa yo na ntangu yina yandi mosi me tulaka. Lukanu na yandi kele ya kukatula kimakulu mambu yonso yina ke salaka nde bantu kumona mpasi bubu yai. Mu mbandu, bisumbula ya lugangu, maladi mpi lufwa. Yehowa ta lungisa lukanu na yandi na nzila ya Kimfumu na yandi. (Dan. 2:44; Kus. 21:3, 4) Kansi bubu yai, Yehowa me bikaka nde Satana kuyala nsi-ntoto.b (Yoa. 12:31; Kus. 12:9) Kana Yehowa kusala kima mosi sambu na kukatula bampasi bubu yai, yo lenda monana bonso nde Satana ke yala mbote. Kansi awa ya beto ke vingila nde Yehowa kulungisa balusilu na yandi, yo ke tendula ve nde yandi ke sadisaka beto ve. Beto tala mwa mambu yina Yehowa ke salaka sambu na kusadisa beto.

MUTINDU YEHOWA KE PESAKA MVUTU NA BISAMBU NA BETO BUBU YAI

9. Inki mutindu Yehowa ke sadisaka beto ntangu beto ke zola kubaka balukanu? Pesa mbandu.

⁹ Yandi ke pesaka beto mayele. Yehowa ke tuba nde yandi ta pesa beto mayele yina beto kele ti yo mfunu sambu na kubaka balukanu ya mbote. Beto ke vandaka ti mfunu ya mayele ya Nzambi, mingi-mingi ntangu beto ke baka balukanu yina ta soba luzingu na beto ya mvimba. Mu mbandu, lukanu ya kukwela to ya kukwela ve. (Yak. 1:5) Beto tadila mbandu ya mpangi-nkento Mariac yina kele mpumpa. Yandi vandaka mupasudi-nzila mpi yandi vandaka kusadila Yehowa na kiese yonso ntangu yandi kutanaka ti mpangi-bakala mosi. Yandi ke tuba nde: “Kinduku na beto yantikaka kukuma ngolo, yo yina beto kumaka kuzolana mingi. Mono zabaka nde mono fwete baka lukanu ya mbote. Mono sambaka mingi sambu na diambu yina. Mono vandaka ti mfunu ya lutwadisu ya Yehowa kansi mono zabaka mpi nde Yehowa ta bakila mono ve lukanu.” Yandi bakisaka nde Yehowa pesaka mvutu na kisambu na yandi mutindu yandi pesaka yandi mayele. Inki mutindu? Yandi salaka bansosa na mikanda na beto mpi yandi zwaka masolo yina sadisaka yandi na kuzwa bamvutu na bangiufula na yandi. Yandi sadilaka mpi bandongisila ya mbote yina mama na yandi yina vandaka kusadila Yehowa na mutindu ya mbote pesaka yandi. Bandongisila yina sadisaka mpangi Maria na kutadila diaka mawi na yandi. Nsuka-nsuka yandi bakaka lukanu ya mbote kibeni.

10. Mutindu Bafilipi 4:13 ke monisa yo, nki Yehowa ta sala sambu na kusadisa bansadi na yandi? Pesa mbandu. (Tala mpi kifwanisu ya ke wakana ti paragrafe yai.)

¹⁰ Yandi ke pesaka beto ngolo ya kukanga ntima. Yehowa ta pesa beto ngolo ya kukanga ntima na bampasi na beto mutindu yandi pesaka ntumwa Polo. (Tanga Bafilipi 4:13.) Beto tala mutindu Yehowa sadisaka mpangi Benjamin na kukanga ntima na bampasi yina yandi kutanaka ti yo. Mpangi Benjamin ti dibuta na yandi zingaka bantangu mingi na Afrika na bisika yina bantu ya me tina babwala na bo sambu na kigonsa ke zingaka. Yandi ke tuba nde: “Mono vandaka kusamba Yehowa mbala na mbala sambu yandi pesa mono ngolo ya kusala mambu yina ke sepedisa yandi. Yehowa pesaka mvutu na bisambu na mono sambu yandi pesaka mono ngemba ya mabanza, kikesa ya kulanda kulonga nsangu ya mbote mpi mikanda yina sadisaka mono na kubikala ngolo na kimpeve.” Yandi ke tuba diaka nde: “Mono vandaka kutanga masolo ya Bambangi ya Yehowa mpi mono longukaka mutindu Yehowa sadisaka bo na kukanga ntima na bampasi mpi yo sadisaka mono na kulanda kusadila Yehowa na mutindu ya mbote.”

11-12. Inki mutindu Yehowa lenda sadila dibuta na beto ya kimpeve sambu na kupesa mvutu na bisambu na beto? (Tala mpi kifwanisu ya ke wakana ti paragrafe yai.)

¹¹ Yandi ke sadilaka dibuta na beto ya kimpeve. Na mpimpa ya nsuka ya luzingu ya Yezu awa na ntoto, yandi sambaka mingi kibeni. Yandi sambaka Yehowa sambu yandi bika ve nde bantu kuyindula nde bo ke pesa yandi ndola sambu yandi me vweza Nzambi. Na kisika nde Yehowa kusala kima yina Yezu lombaka yandi, yandi tindaka wanzio mosi sambu na kupesa Yezu kikesa. (Luka 22:42, 43) Yehowa lenda pusa mpi mpangi na beto mosi na kubinga beto na telefone to na kutala beto sambu na kupesa beto kikesa. Beto yonso fwete sosa mabaku ya kutubila bampangi na beto “ndinga ya mbote.”​—Bing. 12:25.

¹² Beto tadila mbandu ya mpangi Miriam. Bamposo fioti na nima ya lufwa ya bakala na yandi, mpangi Miriam vandaka yandi mosi na nzo. Yandi vandaka mawa-mawa mpi yandi vandaka kuniokwama na mabanza. Yandi vandaka kuyambula ve kudila mpi yandi vandaka ti mfunu ya kusolula ti muntu. Yandi ke tuba nde: “Mono vandaka ve ti ngolo ya kubinga ata muntu mosi yo yina mono sambaka Yehowa. Kaka ntangu yina mono vandaka kudila mpi kusamba, telefone na mono dilaka. Nkuluntu mosi yina vandaka nduku na beto muntu vandaka kubinga mono.” Nkuluntu yina ti nkento na yandi pesaka mpangi Miriam kikesa. Yandi ke ndima kibeni nde Yehowa muntu pusaka mpangi yina na kubinga yandi.

13. Pesa mbandu ya ke monisa nde Yehowa lenda sadila bantu yina ke sambilaka yandi ve sambu na kupesa mvutu na bisambu na beto.

¹³ Yandi lenda sadila bantu yina ke sambilaka yandi ve. (Bing. 21:1) Bantangu ya nkaka, Yehowa ke pesaka mvutu na bisambu ya bansadi na yandi ntangu yandi ke pusaka bantu yina ke sambilaka yandi ve na kusadisa bansadi na yandi. Mu mbandu, yandi pusaka ntotila Artazeresesi na kupesa Nehemia nswa ya kuvutuka na Yeruzalemi sambu na kutunga yo diaka. (Neh. 2:3-6) Bubu yai mpi, Yehowa lenda sadila ata bantu yina ke sambilaka yandi ve sambu na kusadisa beto ntangu beto kele ti mfunu ya lusadisu.

14. Inki mutindu disolo ya mpangi Soo Hing ke pesa nge kikesa? (Tala mpi kifwanisu ya ke wakana ti paragrafe yai.)

¹⁴ Mpangi-nkento Soo Hing bakisaka nde Yehowa sadilaka munganga yina vandaka kusansa mwana na bo sambu na kusadisa yandi. Mwana na bo ya bakala vandaka kubela bamaladi mingi ya ntu. Mwana yango salaka aksida ya ngolo, yo yina mpangi Soo Hing ti bakala na yandi yambulaka kisalu na bo sambu na kukeba yandi. Yo salaka nde bo kuma ti mpasi ya mbongo. Mpangi Soo Hing yindulaka nde yandi ta kuka diaka ve kukangila bampasi yina ntima. Yandi sambaka Yehowa na ntima ya mvimba mpi yandi lombaka yandi lusadisu. Munganga yina vandaka kusansa mwana na bo sadisaka bo. Kima yina munganga yina salaka, salaka nde bamfumu ya luyalu kusadisa bo mpi kupesa bo kisika ya mbote ya kuzinga. Na nima, mpangi Soo Hing tubaka nde: “Beto monaka diboko ya Yehowa na ntangu yina ya mpasi. Yandi kele kibeni ‘Muntu ya ke waka kisambu.’”​—Nk. 65:2.

YO KE LOMBAKA LUKWIKILU SAMBU NA KUMONA MVUTU YA YEHOWA MPI KUNDIMA YO

15. Inki sadisaka mpangi-nkento mosi na kubakisa nde Yehowa vandaka kupesa mvutu na bisambu na yandi?

¹⁵ Yehowa ke pesaka ve ntangu yonso bamvutu na bisambu na beto na mutindu ya kuyituka. Kansi bamvutu yina yandi ke pesaka beto ke sadisaka beto na kulanda kusadila yandi na mutindu ya mbote. Yo yina, tula dikebi sambu na kumona bamvutu ya Yehowa na bisambu na nge. Mpangi-nkento Yoko vandaka kuyindula nde Yehowa vandaka ve kupesa mvutu na bisambu na yandi. Yo yina yandi yantikaka kusonika mambu yina yandi vandaka kulomba Yehowa. Na nima ya mwa ntangu, yandi talaka diaka mambu yina yandi sonikaka mpi yandi bakisaka nde Yehowa vandaka kupesa mvutu na bisambu na yandi. Nkutu ata na bisambu yina yandi vandaka kuyibuka diaka ve. Mbala na mbala, beto fwete baka ntangu ya kuyindula mutindu Yehowa ke pesaka mvutu na bisambu na beto.​—Nk. 66:19, 20.

16. Inki mutindu beto lenda monisa lukwikilu na yina me tala kisambu? (Baebreo 11:6)

¹⁶ Beto ke monisaka nde beto kele ti lukwikilu ntangu beto ke sambaka Yehowa mpi ke ndimaka bamvutu yina yandi ke pesaka beto na mutindu yina yandi mosi me zola. (Tanga Baebreo 11:6.) Beto baka mbandu ya mpangi Mike ti nkento na yandi Chrissy. Lukanu na bo vandaka ya kusala na Betele. Mpangi Mike ke tuba nde: “Beto vandaka kusamba mbala na mbala sambu Yehowa kusadisa beto na kulungisa lukanu yina. Kansi bo bingaka beto ve.” Mpangi Mike ti nkento na yandi Chrissy ndimaka nde Yehowa ke zaba mutindu ya kusadila bo mbote na kisalu na yandi. Bo landaka kusala yonso yina bo lendaka kusala na kisalu ya Yehowa, bo salaka kisalu ya kimupasudi-nzila ya ntangu yonso na kisika yina mpusa vandaka mingi mpi bo vandaka kupesa maboko na bisalu ya kutunga banzo ya lusambu. Bubu yai bo ke salaka kisalu ya nziunga. Mpangi Mike ke tuba nde: “Yehowa me pesaka ve mvutu na bisambu na beto na mutindu yina beto vandaka kuyindula kansi yandi me pesaka mvutu na bisambu na beto mpi yandi me salaka yo na mutindu ya mbote kuluta yina beto vandaka kuyindula.”

17-18. Mutindu Nkunga 86:6, 7 ke monisa yo, nki beto fwete ndima?

¹⁷ Tanga Nkunga 86:6, 7. Muyimbi-bankunga Davidi vandaka kundima nde Yehowa vandaka kuwa bisambu na yandi mpi yandi vandaka kupesa yandi mvutu. Nge mpi lenda ndima mpidina. Bambandu yina beto me tadila na disolo yai ke ndimisa beto nde Yehowa lenda pesa beto mayele mpi ngolo yina beto kele ti yo mfunu sambu na kukanga ntima. Yandi lenda sadila dibuta na beto ya kimpeve to bantu yina ke sambilaka yandi ve bubu yai sambu na kusadisa beto.

¹⁸ Ata ntangu Yehowa ke pesa ve mvutu na bisambu na beto na mutindu yina beto ke yindula, beto fwete ndima nde yandi ta pesa kaka mvutu. Yandi ta pesa beto bima yina beto kele ti yo mfunu mpi na ntangu yina beto kele ti yo mfunu. Yo yina, landa kusamba Yehowa mpi ndima nde yandi ta lungisa bampusa na nge bubu yai mpi yandi ta “lungisa nzala ya konso kima ya kele na luzingu” na nsi-ntoto ya mpa.​—Nk. 145:16.