Zola Fwete Pusa Nge na Kulanda Kulonga Nsangu ya Mbote

1. Inki beto monaka na lukutakanu ya nsuka ya mvula ya 2023?

NA LUKUTAKANU ya nsuka ya mvula ya 2023,a beto zwaka bantendula ya mpa ya ke pesa kiese, ya me tala balukwikilu na beto ya nkaka mpi beto waka bansangu ya ke pesa kiese sambu na kisalu na beto ya kulonga nsangu ya mbote. Mu mbandu, beto monaka nde bantu ya nkaka lenda vanda ti dibaku ya kuvukana ti Bambangi ya Yehowa ata na nima ya lufwa ya Babilone ya Nene. Beto monaka mpi nde yantika na novembre 2023, bansamuni ya Kimfumu ta sonikaka diaka ve mambu ya nkaka yina bo ke sala na kisalu ya kulonga nsangu ya mbote na rapore ya kisalu ya kulonga nsangu ya mbote. Keti bansoba yina ke monisa nde kisalu na beto ya kulonga nsangu ya mbote kele diaka ve mfunu mingi to beto fwete sala yo diaka ve nswalu? Mpidina ve.

2. Sambu na nki kisalu ya kulonga nsangu ya mbote ke kuma mfunu mingi konso kilumbu? (Marko 13:10)

² Konso kilumbu, kisalu na beto ya kulonga nsangu ya mbote ke landa kaka kukuma mfunu mingi. Sambu na nki? Sambu ntangu ke luta nswalu. Beto tadila mambu yina Yezu tubaka sambu na kisalu ya kulonga nsangu ya mbote na bilumbu ya nsuka. (Tanga Marko 13:10.) Mutindu disolo ya Matayo ke monisa yo, Yezu tubaka nde beto fwete longa nsangu ya mbote na ntoto ya mvimba na ntwala nde “nsuka” kukwisa. (Mat. 24:14) Ngogo “nsuka” ya kele na verse yina ke tendula nsuka ya nsi-ntoto yai ya mbi ya Satana. Yehowa me tulaka dezia “kilumbu mpi ngunga” sambu na mambu yina ta salama ntama mingi ve. (Mat. 24:36; 25:13; Bis. 1:7) Konso kilumbu beto ke pusana kibeni pene-pene ti ntangu yango. (Bar. 13:11) Yo yina, beto fwete landa kulonga nsangu ya mbote tii ntangu nsuka yango ta kwisa.

3. Inki ke pusaka beto na kulonga nsangu ya mbote?

³ Ntangu beto ke yindula mambu ya me tala kisalu na beto ya kulonga nsangu ya mbote, yo kele mfunu na kudiyula ngiufula yai: Sambu na nki beto ke longaka nsangu ya mbote? Na bunkufi, sambu na zola. Ntangu beto ke longaka nsangu ya mbote, beto ke monisaka nde beto ke zolaka yo, beto ke zolaka bantu mpi kuluta yonso, beto ke zolaka Yehowa mpi zina na yandi. Beto tadila yo mosi-mosi.

BETO KE LONGAKA NSANGU YA MBOTE SAMBU BETO KE ZOLAKA YO

4. Inki mutindu beto ke waka kana bo me pesa beto nsangu mosi ya mbote?

⁴ Keti nge ke yibuka mutindu nge waka ntangu bo pesaka nge nsangu mosi ya mbote? Mbala ya nkaka kubutuka ya bebe mosi na dibuta na beno to nge zwaka kisalu mosi yina nge vandaka kibeni ti yo mfunu. Ntembe kele ve nde nge vandaka na kiese mingi ya kusonga dibuta na nge mpi banduku na nge nsangu yina ya mbote. Keti nge waka mpi mutindu mosi ntangu nge waka nsangu ya kuluta mbote sambu na bantu yonso, disongidila nsangu ya mbote ya me tala Kimfumu ya Nzambi?

5. Inki mutindu nge waka ntangu nge longukaka na mbala ya ntete kieleka ya kele na Ndinga ya Nzambi? (Tala mpi bifwanisu ya ke wakana ti paragrafe yai.)

⁵ Yindula fioti mutindu nge waka ntangu nge longukaka mbala ya ntete kieleka ya kele na Ndinga ya Nzambi. Nge longukaka nde Tata na nge ya zulu ke zolaka nge, nde yandi ke zola nde nge vanda na dibuta na yandi, nde yandi ta katula bampasi yonso, nde nge lenda mona diaka bantu yina nge ke zolaka ya me fwaka ntangu bo ta futumuka na nsi-ntoto ya mpa mpi mambu mingi ya nkaka. (Mar. 10:29, 30; Yoa. 5:28, 29; Bar. 8:38, 39; Kus. 21:3, 4) Mambu yina simbaka kibeni ntima na nge mpi yo pesaka nge kiese. (Luka 24:32) Nge vandaka kuzola mambu yina nge vandaka kulonguka mpi nge bumbaka yo ve sambu na nge mosi.​—Tala mpi Yeremia 20:9.

6. Mbandu ya mpangi Ernest ti nkento na yandi Rose ke longa nge nki?

⁶ Beto tadila mbandu mosi. Ntangu mpangi Ernestb vandaka ti bamvula 10, papa na yandi fwaka. Mpangi Ernest ke tuba nde: “Mono vandaka kudiyula nde: ‘Keti yandi me kwenda na zulu? To keti yandi me fwa kimakulu?’ Mono vandaka kulula bana ya nkaka yina vandaka ti bapapa na bo.” Mpangi Ernest vandaka kukwenda mbala na mbala na maziamu ya papa na yandi, yandi vandaka kufukama mpi kusamba nde: “Pardo Nzambi, mono ke zola kuzaba kisika yina papa na mono kele.” Bamvula 17 na nima ya lufwa ya papa na yandi, mpangi Ernest ndimaka kulonguka Biblia. Yandi vandaka na kiese ya kuzaba nde bafwa ke zabaka ve ata kima mpi nde bo kele bonso na mpongi ya ngolo. Yandi longukaka mpi nde Biblia ke tubaka nde bantu ta futumuka na bilumbu ke kwisa. (Lon. 9:5, 10; Bis. 24:15) Nsuka-nsuka, yandi zwaka bamvutu na bangiufula yina vandaka kuyangisa yandi banda ntama. Mpangi Ernest vandaka na kiese mingi sambu na bakieleka ya Biblia yina yandi vandaka kulonguka. Nkento na yandi Rose yantikaka mpi kulonguka Biblia mpi yandi vandaka kuzola mingi mambu yina yandi vandaka kulonguka. Bo bakaka mbotika na 1978. Bo longaka ti kikesa yonso dibuta na bo, banduku na bo mpi bantu ya nkaka mambu ya kitoko yina bo longukaka. Yo yina mpangi Ernest ti nkento na yandi Rose sadisaka bantu kuluta 70 na kuzaba Yehowa, na kuyela na kimpeve mpi na kubaka mbotika.

7. Inki ke salamaka kana zola ya kieleka me tula misisa na bantima na beto? (Luka 6:45)

⁷ Ya kieleka, kana zola ya bakieleka yina kele na Biblia me tula misisa na bantima na beto, beto ta kanga ve munoko. (Tanga Luka 6:45.) Beto ke waka bonso balongoki ya Yezu ya mvu-nkama ya ntete, bayina tubaka nde: “Beto lenda bika ve kutubila mambu yina beto monaka mpi beto waka.” (Bis. 4:20) Beto ke zolaka kieleka mingi kibeni, yo yina beto ke zolaka kulonga yo bantu mingi mpenza.

BETO KE LONGAKA NSANGU YA MBOTE SAMBU BETO KE ZOLAKA BANTU

8. Inki ke pusaka beto na kulonga bantu ya nkaka nsangu ya mbote? (Tala lupangu “Zola Bantu—Kumisa Bo Balongoki.”) (Tala mpi kifwanisu ya ke wakana ti paragrafe yai.)

⁸ Bonso Yehowa mpi Yezu, beto ke zolaka bantu. (Bing. 8:31; Yoa. 3:16) Beto ke wilaka bantu yina ke “vandaka ve ti Nzambi” mpi bayina ke “vandaka ve ti kivuvu” mawa. (Baef. 2:12) Sambu na mambu ya mpasi yina bo ke kutana ti yo, bo kele bonso bantu yina me bwa na dibulu mosi ya nda mpi beto kele ti nsinga yina lenda basisa bo, nsinga yango kele nsangu ya mbote ya Kimfumu ya Nzambi. Zola mpi mawa yina beto ke wilaka bo ke pusaka beto na kusala bikesa sambu na kulonga bo nsangu ya mbote. Nsangu yina ya mbote lenda pesa bo kivuvu, yo lenda sadisa bo na kuvanda ti kivuvu ya mbote bubu yai mpi yo lenda pesa bo dibaku ya kuvanda ti “luzingu ya kieleka,” disongidila luzingu ya mvula na mvula na nsi-ntoto ya mpa.​—1 Tim. 6:19.

9. Inki beto ke songaka bantu sambu na bilumbu ke kwisa mpi sambu na nki? (Ezekiele 33:7, 8)

⁹ Zola na beto sambu na bantu ke pusaka beto mpi na kusonga bo nde nsuka ya nsi-ntoto yai ya mbi me kuma kibeni pene-pene. (Tanga Ezekiele 33:7, 8.) Beto ke wilaka bantu ya dibuta na beto mpi bantu yina ke zingaka pene-pene ti beto mawa. Bantu mingi yina kele na luzingu bubu yai ke zabaka ve nde kima mosi ta salama ntama mingi ve, disongidila ‘mpasi mosi ya me bwaka ntete ve katuka na luyantiku ya nsi-ntoto tii bubu yai mpi yo ta bwa diaka ve.’ (Mat. 24:21) Beto ke zolaka nde bo zaba mambu yina ta salama na ntangu yina ya lusambisu. Ntete, mabundu ya luvunu ta fwa mpi na nima Yehowa ta fwa nsi-ntoto yai ya mbi na bitumba ya Armagedoni. (Kus. 16:14, 16; 17:16, 17; 19:11, 19, 20) Beto ke samba sambu bantu mingi kuwa nsangu yina mpi bo vukana ti beto na lusambu ya bunkete bubu yai. Ebuna nki beto lenda tuba sambu na bantu yina ke tula ve dikebi na nsangu yina bubu yai, mu mbandu bantu ya dibuta na beto yina beto ke zolaka mingi?

10. Sambu na nki yo kele mfunu mingi na kulanda kusonga bantu mambu yina ta salama ntama mingi ve?

¹⁰ Mutindu beto monaka yo na disolo ya me luta, yo lenda vanda nde Yehowa ke zola kugulusa bantu yina ta balula ntima ntangu bo ta mona lufwa ya Babilone ya Nene. Yo yina, yo kele mfunu mingi na kulanda kusonga bo nsangu ya lukebisu. Kuvila ve nde: Na ntangu yina, bo lenda yibuka mambu yina beto ke songa bo bubu yai. (Tala mpi Ezekiele 33:33.) Mbala ya nkaka, bo ta yibuka mambu yina beto songaka bo mpi yo pusa bo na kuvukana ti beto na lusambu ya bunkete na ntwala nde bo vanda diaka ve ti dibaku ya kusala yo. Mutindu muntu yina vandaka kutanina boloko na Filipi balulaka ntima ntangu “ntoto nikanaka ngolo kibeni,” mbala ya nkaka bantu ya nkaka yina ke buyaka kuwa nsangu ya mbote bubu yai, ta balula ntima ntangu Babilone ya Nene ta fwa na mutindu ya kuyituka kibeni.​—Bis. 16:25-34.

BETO KE LONGAKA NSANGU YA MBOTE SAMBU BETO KE ZOLAKA YEHOWA MPI ZINA NA YANDI

11. Inki mutindu beto ke pesaka Yehowa nkembo, lukumu mpi ngolo? (Kusonga 4:11) (Tala mpi bifwanisu ya ke wakana ti paragrafe yai.)

¹¹ Kima ya kuluta mfunu yina ke pusaka beto na kulonga nsangu ya mbote kele zola sambu na Yehowa mpi sambu na zina na yandi ya santu. Kulonga nsangu ya mbote kele mutindu mosi ya kukumisa Nzambi na beto yina beto ke zolaka. (Tanga Kusonga 4:11.) Beto ke ndima na ntima ya mvimba nde Yehowa Nzambi me fwana na kubaka nkembo, lukumu, mpi ngolo. Beto ke pesaka yandi nkembo mpi lukumu ntangu beto ke songaka bantu ya nkaka mambu ya ke monisa kibeni nde yandi me “gangaka bima yonso” mpi nde beto ke zingaka sambu na yandi. Beto ke pesaka yandi ngolo na beto ntangu beto ke sadilaka ntangu mpi bima na beto sambu na kulonga mingi nsangu ya mbote kana mpila kele. (Mat. 6:33; Luka 13:24; Bakol. 3:23) Na bunkufi, beto ke zolaka kusonga bantu ya nkaka mambu ya Nzambi yina beto ke zolaka. Yo ke pusaka beto mpi na kusonga bantu ya nkaka mambu ya me tala zina ya Yehowa mpi kimuntu na yandi. Sambu na nki?

12. Inki mutindu beto ke santisaka zina ya Yehowa ntangu beto ke longaka nsangu ya mbote?

¹² Zola na beto sambu na Yehowa ke pusaka beto na kusantisa zina na yandi. (Mat. 6:9) Beto ke songaka bantu nde mambu ya mbi yina Satana tubaka sambu na Yehowa kele luvunu. (Kuy. 3:1-5; Yobi 2:4; Yoa. 8:44) Ntangu beto ke longaka nsangu ya mbote, beto ke vandaka ti mpusa ya ngolo ya kusonga bantu yonso yina ke zola kuwa beto mambu ya kieleka ya me tala Yehowa mpi bikalulu na yandi. Beto ke zolaka nde bantu yonso kuzaba nde kikalulu ya Yehowa ya kuluta nene kele zola, nde luyalu na yandi kele ya mbote mpi ya lunungu, nde ntama mingi ve Kimfumu na yandi ta manisa bampasi yonso, ta tula ngemba mpi bantu ta zinga na kiese. (Nk. 37:10, 11, 29; 1 Yoa. 4:8) Ntangu beto ke songaka bantu mambu yina ya me tala Yehowa, beto ke santisaka zina na yandi. Beto ke vandaka mpi na kiese sambu beto ke salaka mambu yina Bambangi ya Yehowa fwete sala. Inki mutindu?

13. Sambu na nki yo kele kibeni lukumu na kuvanda Bambangi ya Yehowa? (Yezaya 43:10-12)

¹³ Yehowa me ponaka beto sambu beto vanda “bambangi” na yandi. (Tanga Yezaya 43:10-12.) Mwa bamvula me luta, mukanda mosi ya Nto-Kimvuka tubaka nde: “Lukumu ya kuluta nene yina konso muntu na kati na beto lenda vanda ti yo, kele ya kubingama Mbangi ya Yehowa.”c Sambu na nki? Beto baka mbandu mosi: Yindula nde bo me funda nge na tribinale mpi nge kele ti mfunu ya muntu mosi sambu na kuvanda mbangi na nge. Nani nge ta pona? Ntembe kele ve nde nge ta pona muntu yina nge me zaba mpi yina nge ke tudilaka ntima, yina ke vandaka ti bikalulu ya mbote sambu bantu ta ndima mambu yina yandi ta tuba. Mutindu Yehowa me ponaka beto na kuvanda Bambangi na yandi, yo ke monisa nde yandi me zaba beto mbote mpi yandi ke ndima nde beto ta songa bantu ya nkaka nde yandi mpamba kele Nzambi ya kieleka. Yo kele kibeni lukumu ya nene ya kuvanda Bambangi ya Yehowa, yo yina beto ke sadilaka konso dibaku yina beto me zwa sambu na kuzabisa bantu ya nkaka zina na yandi mpi na kusonga bo nde mambu ya mbi yina bo ke tubaka sambu na yandi kele ya luvunu. Kana beto sala mutindu yina, beto ta monisa kibeni nde beto kele Bambangi ya Yehowa.​—Nk. 83:18; Bar. 10:13-15.

BETO TA LANDA KULONGA TII NA NSUKA

14. Inki mambu ya ke pesa kiese yina lenda salama ntama mingi ve?

¹⁴ Beto ke vingila na kiese yonso mambu yina lenda salama ntama mingi ve. Beto ke ndima kibeni nde Yehowa ta sadisa beto na kumona bantu mingi ke ndima kieleka na ntwala nde mpasi ya nene kuyantika. Diaka, beto kele na kiese ya kuzaba nde ata na ntangu ya kuluta mpasi ya luzingu ya bantu, disongidila na mpasi ya nene, bantu mingi lenda basika na nsi-ntoto ya Satana yina ta fwa mpi kuvukana ti beto sambu na kukumisa Yehowa.​—Bis. 13:48.

15-16. Inki beto fwete landa kusala mpi beto fwete sala yo tii nki ntangu?

¹⁵ Kansi bubu yai, beto kele ti kisalu ya mfunu mingi ya kusala, kisalu yina ta salama diaka ve. Yo kele kisalu ya kulonga nsangu ya mbote ya Kimfumu ya Nzambi na ntoto ya mvimba. Yo kele kibeni dibaku ya nene sambu na beto. Beto fwete landa kusonga mpi bantu ya nkaka nsangu ya lukebisu ya mambu yina ta salama ntama mingi ve. Bantu fwete zaba nde nsuka ya nsi-ntoto yai ya mbi ke kwisa nswalu kibeni. Ntangu kilumbu yina ya lusambisu ta lunga, bo ta zaba nde nsangu yina beto vandaka kulonga bo katukaka kibeni na Yehowa Nzambi.​—Ezek. 38:23.

¹⁶ Ebuna nki beto fwete sala? Zola ya nsangu ya mbote, zola ya bantu mpi kuluta yonso zola ya Yehowa mpi ya zina na yandi, fwete pusa beto na kulanda kulonga nsangu ya mbote ti kikesa yonso, nswalu mpi na kiese yonso tii ntangu yina Yehowa ta tuba nde: “Yo me lunga.”