Vutukila Bangindu ya Mfunu

Keti yo ke vandilaka nge mpasi na kuyibuka mambu yina nge me katuka kulonguka? Mbala mingi, yo ke kuminaka beto yonso. Inki nge lenda sala? Vutukila bangindu ya mfunu.

Ntangu nge ke longuka, vingila mwa fioti mpi tadila bangindu ya mfunu. Beto tala mambu yina ntumwa Polo songaka bampangi na kusala ntangu bo vandaka kulonguka mukanda yina yandi sonikilaka bo. Yandi tubaka nde: “Ngindu ya kuluta mfunu . . . yo yai.” (Baeb. 8:1) Mambu yina yandi sonikaka sadisaka bampangi na kubakisa mambu yina yandi zolaka kutuba mpi mutindu konso kima vandaka kuwakana ti ntu-diambu ya mukanda yina.

Nge lenda baka mwa ntangu ata minuta kumi na nsuka ya kulonguka na nge, sambu na kuyindula bangindu ya mfunu ya mambu nge me katuka kulonguka. Kana nge ke yibuka yo ve, nge lenda tanga tubantu-diambu to nsa ya ntete ya konso paragrafe sambu yo sadisa nge na kuyibuka yo. Kana nge me longuka kima mosi ya mpa, tendudila yo bantu ya nkaka na bangogo na nge mosi. Kana nge ke tadila diaka bangindu yina ya mfunu, yo ta sadisa nge na kuyibuka mambu yina nge me tanga mpi na kumona mutindu yo lenda sadisa nge.