Mambu ya Lenda Sadisa Nge na Kulonguka Mbala na Mbala
KETI yo ke vandilaka nge mpasi na kusala mbala na mbala kulonguka na nge mosi mpi na kusepela ti yo? Yo ke kuminaka beto yonso bantangu ya nkaka. Kansi yindula mambu ya nkaka yina beto ke salaka mpi mbala na mbala, mu mbandu kuyobila masa. Kuyobila masa ke lombaka ntangu mpi bikesa kansi na nima ya kuyobila, beto ke kudiwaka mbote! Beto lenda fwanisa mpi kulonguka ya Biblia ti kuyobila “masa na nsadisa ya ndinga ya Nzambi.” (Baef. 5:26) Tadila mwa mambu yai ya lenda sadisa nge:
Vanda ti manaka ya mbote. Kulonguka na nge mosi kele na kati ya “mambu ya kuluta mfunu” yina Mukristu fwete sala. (Bafil. 1:10) Sambu na kuzitisa manaka na nge, nge lenda sonika na papie kilumbu mpi ntangu yina nge ta longukaka mpi kutula papie yango na kisika yina nge lenda mona yo kukonda mpasi. To nge lenda tula soneri na telefone na nge yina ta bulaka ntangu fioti na ntwala sambu na kuyibusa nge ntangu na nge ya kulonguka.
Wakanisa manaka na nge ti mambu ya luzingu na nge. Sambu nge tula dikebi ya mingi na mambu ya nge ke longuka, keti yo ke lombaka nde nge longuka yo ntangu mingi na mbala mosi to keti yo ke lombaka nde nge longuka yo mbala mingi na bantangu fioti? Nge mosi me zaba mbote mambu ya luzingu na nge. Yo yina, wakanisa manaka na nge ya kulonguka ti mambu ya luzingu na nge. Kana nge ke wa ve nzala ya kulonguka na ntangu yina nge me tulaka, nge lenda longuka ata sambu na minuta 10 mpamba. Kulonguka ata minuta 10 mpamba kele mfunu mingi kuluta kukonda kulonguka ata fioti. Mpi na nima ya minuta 10 yina nge me tula sambu na kulonguka, nge lenda wa diaka nzala ya kulonguka mingi.—Bafil. 2:13.
Pona na ntwala mambu yina nge ta longuka. Kana nge ke vingila kaka ntangu yina nge me tulaka sambu na kupona mambu yina nge fwete longuka, nge ta ‘sadila ve ntangu na nge mbote kibeni.’ (Baef. 5:16) Nge lenda sonika masolo to mambu yina nge ta sepela kulonguka. Konso ntangu yina ngiufula sambu na kima mosi ya nge me bakisa ve mbote me kwisila nge na mabanza, sonika yo mpi. Konso mbala ya nge ke manisa kulonguka, nge lenda yika bangindu ya nkaka na kisika yina nge me sonikaka masolo to mambu yina nge ta sepela kulonguka.
Kana mpila kele, sala bansoba. Meka kusala mwa bansoba na manaka na nge ya kulonguka, mu mbandu na mingi ya ntangu yina nge ke lutisaka sambu na kulonguka to na masolo yina nge ke ponaka. Kima ya kuluta mfunu kele kulonguka mbala na mbala kansi ve ntangu yina nge ke longukaka, mingi ya ntangu yina nge ke longukaka to mambu yina nge ke longukaka.
Kulonguka mbala na mbala ke natilaka beto mpenza mambote. Yo ke sadisaka beto na kukumisa ngolo kinduku na beto ti Yehowa, na kubaka balukanu ya mbote mpi na kudiwa mbote.—Yoz. 1:8.