Kuditudila Ve Bandilu—Ata Nge Kele na Mambu Mingi ya Kusala
1. Sambu na nki bantu mingi ke vandaka na ketiketi ya kulomba muntu na kulonguka Biblia ti bo?
1 Bantu mingi ke vandaka na ketiketi ya kulomba muntu na kulonguka Biblia ti bo sambu bo ke vandaka na mambu mingi ya kusala. Kulonguka Biblia ti muntu ke bakaka ntangu. Yo ke lombaka kuvanda ti ntangu ya kudibongisa, ya kutwadisa kulonguka, mpi ya kusadisa longoki na kununga bampasi yina yandi ke kutana ti yo. Ntumwa Polo tubaka nde yandi pesaka moyo na yandi sambu na kusadisa bantu ya Tesalonika na kuzaba Yehowa. (1 Bate. 2:7, 8) Inki mutindu beto lenda longuka Biblia ti muntu ata beto kele na mambu mingi ya kusala?
2. Inki mutindu zola sambu na Yehowa ke vandaka na bupusi na mutindu na beto ya kusadila ntangu?
2 Kusadila Yehowa Ke Bakaka Ntangu: Diambu ya kieleka kele nde, kusadila Yehowa ke bakaka ntangu. Mu mbandu, beto ke bakaka ntangu mbala na mbala sambu na kukwenda na balukutakanu, kusala kisalu ya kusamuna, kutanga Biblia, mpi kusamba. Nkwelani yina kele na mambu mingi ya kusala ta vanda na kiese ya kubaka ntangu ya kulutisa na nkwelani na yandi. Sambu beto ke zolaka Yehowa, beto fwete vanda na kiese mpenza ya ‘kusadila mbote’ ntangu na beto sambu na kusambila yandi. (Baef. 5:15-17; 1 Yoa. 5:3) Yezu monisaka nde kitini ya mfunu ya lusambu na beto kele kisalu ya kukumisa bantu balongoki. (Mat. 28:19, 20) Kuyindula mbote-mbote na mambu yai ta sadisa beto na kundima kukonda ketiketi mukumba ya kulonguka Biblia ti bantu.
3. Inki mutindu beto lenda sadisa longoki ya Biblia ata mambu ya luzingu ke pesa beto ve nzila ya kusamuna?
3 Inki beto fwete sala kana kisalu mosi ya kinsuni, maladi ya ke manaka ve, to mikumba ya dibundu ke vwalangasa manaka na beto? Bansamuni yina ke basikaka bantangu yankaka, bo ke longukaka Biblia ti bantu na telefone to na Internet. Bansamuni yina ke belaka maladi yina ke manaka ve me bakaka bangidika na mpila nde longoki kukwisa na nzo na bo sambu bo longuka. Bankaka me bakaka bangidika sambu bansamuni yankaka kulonguka ti longoki na bo kana bo lenda sala yo ve bo mosi.
4. Kisalu ya kulonguka Biblia ti bantu ke nataka nki balusakumunu?
4 Polo waka kiese mingi mutindu yandi pesaka ntangu mpi ngolo na yandi sambu na kusadisa bankaka na kulonguka kieleka. (Bis. 20:35) Ntangu yandi monaka mbutu ya kisalu na yandi na Tesalonika, yo pusaka yandi na kupesa Yehowa matondo. (1 Bate. 1:2) Kiese na beto na kisalu ya kusamuna lenda kuma mingi kana beto ke bika ve nde mambu ya luzingu na beto kukanga beto nzila ya kusala kisalu ya kulonguka Biblia ti bantu.