Kubuya Ve Kusala Mambote!

1. Na nki mutindu beto ‘kebuyaka ve kusala mambote’?

¹ Ntangu beto kesalaka kisalu ya kusamuna nsangu ya mbote ya Kimfumu ya Nzambi, beto kemonisaka nde beto ‘kebuyaka ve kusala mambote’ na bantu ya bateritware na beto. (Bing. 3:27) Nsangu ya kuluta mbote yina beto lenda natila bantu kele nsangu ya metala bantangu ya mbote yina bantu tazinga na nsi ya luyalu ya Nzambi. Ata mbala yankaka nge ketaka mingi kimbangi na mabaku ya mbote to kekabulaka mingi mikanda sambu na kuzabisa kivuvu ya Kimfumu, nge lenda baka lukanu ya kuyantika kulonguka Biblia ti muntu, kana nge kesalaka yo ntete ve.

2. Inki lenda pusa beto na kuwa boma sambu na kuyantika kulonguka Biblia ti bantu?

² Mbala mingi, mutindu na beto ya kutadila dyambu yina kesalaka nde beto vanda ve ti longoki ya Biblia. Bantu mingi kewaka boma na kutwadisa kulonguka ya Biblia sambu bo keyindulaka nde bo mefwana ve to sambu bo kele ti mambu mingi ya kusala. Bangindu yai melanda lenda sadisa nge na kuwa ve boma sambu na kuyantika kulonguka Biblia ti bantu.​—⁠Mat. 28:19; Bis. 20:⁠20.

3. Sambu na nki beto mefwana na kulonga bantu Biblia?

³ Kana Nge Keyindula nde Nge Mefwana Ve: Ziku nge melongukaka ve mingi to, sambu na bikuma yankaka, nge keyindula nde nge mefwana ve na kutwadisa kulonguka ya Biblia. Na mvu-nkama ya ntete, Bakristu yina kunungaka na kusamuna kuvandaka “bantu ya mfunu mingi ve mpi . . . me longukaka ve.” Inki kusadisaka bo na kulonga bantu yankaka kyeleka? “Bo vandaka kutambula na Yesu.” (Bis. 4:13) Bo longukaka na Longi ya Nene, Yezu, mpi bo mesonikaka malongi ti bametode na yandi na Masonuku sambu na beto. Ata nge melongukaka ve mingi, nge ke na kubaka malongi ya kimpeve yina lenda fwanana ve na malongi yankaka.​—⁠Yez. 50:4; 2 Kor. 3:⁠5.

4. Inki dilongi beto lenda baka na mbandu ya Amosi?

⁴ Bantangu yankaka, Yehowa vandaka kusadila baprofete na yandi sambu na kusungika bamfumu to bantu yankaka ya lukumu yina vandaka kusala mambi. Baprofete yankaka, bonso Amosi, kuyeleka ve na mabuta ya lukumu. Amosi kutubaka nde: “Mono kele profete ve, yo kele kisalu na mono mpi ve. Kisalu na mono kutalaka bambisi ti banti ya bafige.” (Am. 7:14) Ata mpidina, Amosi kuwaka ve boma sambu na kuzabisa nsangu ya ndola ya Yehowa na Amasia, nganga-Nzambi yina vandaka kusambila kiteki ya ngombe. (Am. 7:​16, 17) Beto fwete yibukaka ntangu yonso nde beto ke na kusala kisalu ya Nzambi, mpi yandi muntu takumisa beto ya kufwana sambu na kisalu yina yandi mepesaka beto.​—⁠2 Tim. 3:⁠17.

5. Sambu na nki beto fwete sala kikesa sambu na kuyantika kulonguka Biblia ti bantu ata beto kele ti mambu mingi ya kusala?

⁵ Kana Nge Kele ti Mambu Mingi ya Kusala: Ata nge kele ti mambu mingi ya kusala, ntembe kele ve nde nge kevandaka dezia ti manaka sambu na kusamuna mbala na mbala. Kulonguka Biblia ti muntu lenda vanda mutindu mosi na kati ya mitindu ya kisalu ya kusamuna yina lenda pesa beto kyese ya kuluta. Yo kevandaka dikabu mosi ya sipesiali na kumona ngolo ya Ndinga ya Yehowa na luzingu ya muntu. (Baeb. 4:12) Yehowa kesepelaka ntangu beto kesalaka bibansa sambu na kusadisa muntu na “kuzaba mambu ya kieleka.” (1 Tim. 2:⁠4) Nkutu, bawanzyo mpi kevandaka na kyese na ntangu muntu kebalulaka ntima, keyambulaka bikalulu na yandi ya ntama, mpi keyelaka na kimpeve.​—⁠Luka 15:⁠10.

6. Inki dibaku beto kele na yo na kuwakana ti luzolo ya Nzambi?

⁶ Nzambi ke “zola nde bantu yonso kuguluka, bo kuzaba mambu ya kieleka.” (1 Tim. 2:⁠4) Beto kele ti dibaku mosi ya sipesiali na kusala na kuwakana ti luzolo ya Nzambi, mpi beto fwete wa ve boma sambu na kulonguka Biblia ti bantu.