Keti Nge Ke Yibuka?
Keti nge tangaka na dikebi yonso masolo ya Banzozulu ya Nkengi ya mvula yai? Tala kana nge lenda pesa bamvutu na bangiufula yai:
Inki mbandu ya mbote Yehowa ke pesaka na yina me tala kusadila bankento mambu?
Yandi ke sadilaka bankento mambu kukonda kupona-pona mpi yandi ke sadilaka babakala ti bankento mambu mutindu mosi. Nzambi ke widikilaka bankento, yandi ke tulaka dikebi na mutindu bankento ke kudiwaka mpi na mambu yina ke yangisaka bo. Yandi ke tudilaka bo ntima mpi yandi me pesaka bo mukumba ya kusala kisalu na yandi.—w24.01, balut. 15-16.
Inki mutindu beto lenda sadila mambu ya kele na Baefezo 5:7 ya ke tuba nde: “Beno vukana ve ti bo”?
Ntumwa Polo kebisaka beto na kukangama ve ti bantu yina lenda sala nde yo vandila beto mpasi na kuzitisa bansiku ya Yehowa. Bantu yango lenda vanda banduku ya mbi to bantu yina beto ke lutisaka ti bo ntangu kimuntu-kimuntu mpi na Internet.—w24.03, balut. 22-23.
Masolo ya luvunu ya nki mutindu beto fwete buya?
Beto fwete ndima ve masolo yina bampangi me tela beto kukonda kuzikisa to ba message yina kele ti masolo ya luvunu yina bantu ya beto me zaba ve me tindila beto. Beto fwete buya mpi masolo ya luvunu ya baaposta yina ke salaka bonso nde bo ke sepela ti nsangu ya mbote ya Biblia.—w24.04, lut. 12.
Inki beto me zaba mpi nki beto me zaba ve na mutindu Yehowa ta sambisa ntotila Salomo, bantu ya Sodome ti Gomore mpi bantu yina fwaka na Mvula ya Ngolo ya bilumbu ya Noa?
Beto me zaba mpenza ve kana Yehowa me fwaka bantu yina yonso lufwa ya kimakulu. Kansi beto ke zaba kaka nde yandi me zaba mambu yonso mbote mpi nde yandi ke wilaka mpenza bantu mawa.—w24.05, balut. 3-4.
Mutindu Biblia ke fwanisa Yehowa ti “Ditadi,” yo ke longa beto nki? (Kul. 32:4)
Beto lenda sosa kisika ya kubumbana na Yehowa. Yandi me fwana na kutudila ntima sambu yandi ke lungisaka ntangu yonso mambu yina yandi ke tubaka. Diaka, Yehowa ke sobaka ve kimuntu mpi lukanu na yandi.—w24.06, balut. 26-28.
Inki mambu nge lenda sala sambu na kuyikama ti dibundu ya mpa?
Tudila Yehowa ntima mpi yandi ta sadisa nge mutindu yandi sadisaka bansadi na yandi na ntangu ya ntama. Kufwanisa ve dibundu na nge ya mpa ti dibundu na nge ya ntama. Sala mingi na dibundu na nge ya mpa mpi ta kinduku ti bampangi.—w24.07, balut. 26-28.
Bingana tatu yina Matayo kapu 25 ke tubila ke longa beto nki?
Kingana ya mameme mpi ya bankombo ke monisa mfunu ya kulanda kukangama na Yehowa. Kingana ya bamwense ya mayele mpi ya bazoba ke monisa mfunu ya kuvanda ya kuyilama mpi ya kulanda kukengila. Kingana ya batalanta ke monisa mfunu ya kuvanda kikesa mpi mayele.—w24.09, balut. 20-24.
Kisika ya kukotila na tempelo ya Salomo vandaka nda bametre ikwa?
Bamaniskri ya nkaka ya ntama ya 2 Bansangu 3:4 ke tubaka nde nda na yo vandaka maboko 120, disongidila bametre 53. Kansi bamaniskri ya nkaka yina beto lenda tudila ntima ke tubaka nde nda na yo vandaka maboko 20, disongidila bametre 9. Yo yina, na kutadila nene ya bibaka ya tempelo, yo ke monana nde kisika yina ya kukotila lendaka ve kuvanda maboko 120.—w24.10, lut. 31.
Kuvanda “bakala ya nkento mosi” ke tendula nki sambu na nsadi ya kisalu? (1 Tim. 3:12)
Yo ke tendula nde yandi fwete kwelana ti nkento mosi mpamba mpi yandi fwete sala ve ata fioti bizumba. Diaka, yandi fwete monisila ve ata fioti bankento ya nkaka zola na mutindu ya mbi.—w24.11, lut. 19.
Inki ke ndimisa beto nde mambu yina Yezu tubaka na Yoane 6:53 ke tadila ve mambu yina fwete salama na Madia ya Nkokila ya Mfumu?
Yoane 6:53 ke tubila mfunu ya kudia nsuni mpi ya kunwa menga ya Yezu. Yezu tubaka mambu yai na Galilea na mvula 32 ya ntangu na beto na Bayuda yina yo vandaka kulomba kaka nde bo monisa lukwikilu na yandi. Kansi, Yezu salaka nkinsi ya Madia ya Nkokila ya Mfumu mvula mosi na nima na Yeruzalemi. Na nkinsi yai, Yezu tubilaka nsuni mpi menga na yandi na bantu yina zolaka kuyala ti yandi na zulu.—w24.12, balut. 10-11.