Bangiufula ya Batangi
“Bawanzio yina bo me [ponaka]” yina 1 Timoteo 5:21 ke tubila kele banani?
Ntumwa Polo sonikilaka Timoteo yina vandaka mpi nkuluntu nde: “Mono ke songa nge kibeni na ntwala ya Nzambi mpi ya Kristu Yezu mpi ya bawanzio yina bo me [ponaka] na kuzitisa bansiku yai kukonda bangindu ya mbi to kupona-pona.”—1 Tim. 5:21.
Ntete beto sosa kuzaba banani kele bawanzio yina bo me ponaka ve. Yo kele pwelele nde bawanzio yango kele ve na kati ya bantu 144 000. Ntangu Polo sonikilaka Timoteo mambu yai, lufutumuku ya Bakristu yina bo me tulaka mafuta sambu na kuyala na zulu yantikaka ntete ve. Bantumwa mpi Bakristu ya nkaka yina bo me tulaka mafuta kumaka ntete ve bigangwa ya kimpeve na ntangu yina, yo yina beto lenda tuba ve nde “bawanzio yina bo me [ponaka]” kele bantu 144 000.—1 Bak. 15:50-54; 1 Bate. 4:13-17; 1 Yoa. 3:2.
Diaka, beto lenda tuba ve nde “bawanzio yina bo me [ponaka]” kele bawanzio yina kondaka bulemfu na Nzambi na bilumbu ya Noa. Bawanzio yango ya kondaka bulemfu na Nzambi landaka Satana mpi kumaka bademo yina Yezu teleminaka. (Kuy. 6:2; Luka 8:30, 31; 2 Pie. 2:4) Na bilumbu ke kwisa, bo ta kanga bo na dibulu ya nda bamvula 1 000 mpi na nima, bo ta fwa bo ti Diabulu.—Yude 6; Kus. 20:1-3, 10.
Yo ke monana nde “bawanzio yina bo me [ponaka]” yina Polo tubilaka kele bawanzio ya kele na zulu yina ke pesaka maboko na ‘Nzambi mpi na Kristu Yezu.’
Bawanzio yina ke kangamaka kaka na Yehowa kele mingi kibeni. (Baeb. 12:22, 23) Yo yina, beto fwete yindula ve nde bo yonso ke salaka kisalu ya mutindu mosi mpi na ntangu yo yina mosi. (Kus. 14:17, 18) Kuvila ve nde, Yehowa pesaka wanzio mosi mukumba ya kufwa basoda ya Asiria 185 000. (2 Bant. 19:35) Bo me pesaka bawanzio mingi mukumba ya ‘kukatula na Kimfumu ya Yezu bima yonso yina ke budisaka sakuba mpi bantu yina ke fwaka bansiku.’ (Mat. 13:39-41) Bawanzio ya nkaka ta ‘vukisa na zulu bantu yina Yehowa me ponaka.’ (Mat. 24:31) Diaka, bawanzio ya nkaka ke vandaka ti mukumba ya ‘kutanina beto na banzila na beto yonso.’—Nk. 91:11; Mat. 18:10; fwanisa ti Matayo 4:11; Luka 22:43.
Yo ke monaka nde “bawanzio yina bo me [ponaka]” yina 1 Timoteo 5:21 ke tubila kele bawanzio yina ke vandaka ti mikumba ya mfunu ya kusadisa mpi kutanina dibundu ya Nzambi. Na baverse ya kele na ntwala mpi na nima ya 1 Timoteo 5:21, Polo pesaka bankuluntu, yina bampangi na dibundu fwete zitisa, bandongisila ya mbote. Bankuluntu mpi fwete lungisa mikumba na bo “kukonda bangindu ya mbi to kupona-pona” mpi bo fwete baka ve balukanu to kusambisa mambu kukonda kuyindula mbote. Yo yina, yo kele mfunu nde bankuluntu kulanda bandongisila ya Polo sambu bo ke salaka “na ntwala ya Nzambi mpi ya Kristu Yezu mpi ya bawanzio yina bo me [ponaka].” Yo kele pwelele nde bawanzio ya nkaka ke vandaka ti mikumba ya mfunu ya kusadisa mpi kutanina dibundu ya Nzambi. Mu mbandu, bo ke taninaka bansadi ya Nzambi, ke twadisaka kisalu ya kulonga nsangu ya mbote mpi bo ke pesaka Yehowa rapore ya mambu yonso yina bo ke monaka.—Mat. 18:10; Kus. 14:6.