Sambu na Nki Zina ya Yehowa Kele Mfunu Mingi Sambu na Yezu?

1-2. (a) Na mpimpa ya nsuka na ntwala nde bo fwa Yezu, nki yandi salaka? (b) Na disolo yai, beto ta baka bamvutu na nki bangiufula?

NA KIYA na nkokila ya Nisani 14 ya mvula 33 ya ntangu na beto, Yezu me manisa kudia Madia ya Nkokila ya Mfumu ti bantumwa na yandi ya kwikama na shambre mosi ya zulu. Yandi ke zaba nde ntama mingi ve Yudasi ta teka yandi, bo ta sambisa yandi, bo ta zengila yandi nkanu ya lufwa, bo ta niokula yandi mpi bo ta fwa yandi. Na nima ya madia yango, Yezu me songa bantumwa na yandi mambu ya nsuka ya ke pesa kikesa. Mpi ntangu fioti na ntwala nde bo yonso kubasika na shambre yango ya zulu, Yezu me sala kisambu mosi ya mfunu mingi. Ntumwa Yoane sonikaka kisambu yango na Yoane kapu 17.

² Inki mutindu kisambu yango ke monisa mambu yina vandaka kuyangisa Yezu na ntangu yina? Inki mutindu yo ke monisa mambu yina vandaka mfunu sambu na yandi ntangu yandi vandaka awa na ntoto? Na disolo yai, beto ta baka bamvutu na bangiufula yai.

“MONO ME ZABISAKA BO ZINA NA NGE”

3. Inki Yezu tubaka sambu na zina ya Yehowa mpi nki yo vandaka kutendula? (Yoane 17:6, 26)

³ Yezu tubaka na kisambu na yandi nde: “Mono me zabisaka bo zina na nge.” Ya kieleka, yandi vutukilaka mambu yai mbala zole na kisambu na yandi sambu na kumonisa nde kuzabisa bantu zina ya Nzambi vandaka mfunu mingi sambu na yandi. (Tanga Yoane 17:6, 26.) Inki yandi zolaka kutuba? Keti balongoki na yandi zabaka ve zina ya Nzambi? Balongoki ya Yezu vandaka Bayuda mpi bo zabaka dezia zina ya Nzambi, Yehowa. Zina yango kele mbala kiteso ya 7 000 na Masonuku ya Kiebreo. Yo yina, Yezu vandaka kutubila mpenza ve zina ya Nzambi. Kansi yandi vandaka kutubila kimuntu ya Yehowa mpi mutindu Yehowa ke salaka mambu. Yezu sadisaka balongoki na yandi na kuzaba mbote-mbote kibeni kimuntu ya Yehowa, disongidila mambu yina Yehowa ke kana kusala sambu na ntoto mpi sambu na bantu, mambu yina yandi me salaka, yina yandi ta sala mpi bikalulu na yandi. Yandi tendudilaka bo kimuntu ya Yehowa na mutindu yina ata wanzio mosi ve to muntu mosi ve lendaka kusala yo, sambu Yezu ke zaba Yehowa mbote kuluta beto yonso.

4-5. (a) Inki mutindu zina ya muntu mosi lenda kuma mfunu mingi sambu na nge? Pesa mbandu. (b) Na nki mutindu balongoki ya Yezu zabaka mbote zina ya Yehowa?

⁴ Beto baka mbandu mosi sambu na kubakisa yo: Yindula nde mpangi David, nkuluntu mosi na dibundu na beno, kele munganga. Nge me zabaka yandi banda bamvula mingi. Kansi kilumbu mosi, nge me sala aksida mosi ya ngolo mpi luzingu na nge me kuma na kigonsa. Bo me nata nge nswalu na opitale yina mpangi David ke salaka. Yandi me sansa nge mbote mpi me gulusa luzingu na nge. Nge me kuma kuzola yandi diaka mingi kuluta. Mpi kana nge me wa zina na yandi, yo ke yibusa nge mbala mosi mambu yina yandi salaka sambu na nge. Yandi kele kaka ve David, nkuluntu yina nge me zabaka banda ntama, kansi yandi me kuma mpi munganga yina gulusaka luzingu na nge.

⁵ Mutindu mosi mpi, balongoki ya Yezu zabaka dezia zina ya Yehowa. Kansi ntangu Yezu sadisaka bo na kuzaba Yehowa mbote-mbote, zina yango kumaka diaka mfunu mingi sambu na bo. Sambu na nki beto ke tuba mpidina? Sambu Yezu vandaka kulanda mbandu ya Tata na yandi na mambu yonso yina yandi vandaka kutuba mpi kusala. Yo yina, bantumwa ya Yezu ‘zabaka’ Yehowa mbote-mbote sambu bo vandaka kulanda mutindu Yezu vandaka kulonga mpi kutala mutindu yandi vandaka kusadila bantu mambu.​—Yoa. 14:9; 17:3.

“ZINA NA NGE, YINA NGE PESAKA MONO”

6. Na nki mutindu Yehowa pesaka Yezu zina na yandi? (Yoa. 17:11, 12)

⁶ Yezu sambaka sambu na balongoki na yandi nde: “Tanina bo sambu na zina na nge, yina nge pesaka mono.” (Tanga Yoane 17:11, 12.) Keti yo ke tendula nde bo ta kuma mpi kubinga Yezu nde Yehowa? Ve. Kuvila ve nde ntangu Yezu tubilaka zina ya Yehowa na kisambu na yandi, yandi tubaka nde “zina na nge.” Yo yina, Yezu bakaka ve zina ya Yehowa. Ebuna, nki Yezu zolaka kutuba ntangu yandi tubaka nde Nzambi me pesaka yandi zina na yandi? Ntete-ntete, Yezu vandaka mumonisi mpi Kinati-Nsangu ya Yehowa. Yandi kwisaka na zina ya Tata na yandi mpi yandi vandaka kusala mambu ya kuyituka na zina yango. (Yoa. 5:43; 10:25) Diaka, zina Yezu ke tendula “Yehowa Kele Luguluku.” Ya kieleka, zina ya Yehowa kele mpi na kati ya zina ya Yezu.

7. Sambu na nki Yezu vandaka kutuba na zina ya Yehowa? Pesa mbandu.

⁷ Beto baka mbandu mosi. Mfumu mosi lenda tinda muntu mosi sambu na kutuba na zina na yandi. Yo yina, mambu yina muntu yango ke tuba kele ti kiyeka kaka bonso ya mfumu yina. Mutindu mosi mpi, Yehowa muntu tindaka Yezu, yo yina Yezu vandaka kutuba na zina ya Yehowa.​—Mat. 21:9; Luka 13:35.

8. Na nki mutindu Yezu vandaka dezia ‘kunata’ zina ya Yehowa na ntwala ya kukwisa na ntoto? (Kubasika 23:20, 21)

⁸ Biblia ke bingaka Yezu nde “Ndinga,” sambu Yehowa sadilaka yandi sambu na kusonga bawanzio mpi bantu mambu yina Yehowa vandaka kuzola nde bo zaba mpi bo sala. (Yoa. 1:1-3) Yo ke monana nde Yezu vandaka wanzio yina Yehowa tindaka sambu na kutwadisa bantu ya Izraele mpi kutanina bo ntangu bo vandaka kubasika na Ezipte. Ntangu Yehowa songaka bantu ya Izraele na kulemfukila wanzio yina, yandi tubaka nde: “Sambu yandi ke nata zina na mono.”a (Tanga Kubasika 23:20, 21.) Yezu ‘ke nataka’ zina ya Yehowa sambu yandi kele mumonisi ya Yehowa mpi yandi kele muntu ya ntete yina ke kotilaka zina ya Tata na yandi mpi ke santisaka yo.

“TATA, PESA ZINA NA NGE NKEMBO”

9. Inki mutindu Yezu monisaka nde zina ya Yehowa vandaka mfunu mingi sambu na yandi?

⁹ Mutindu beto me tubila yo, zina ya Yehowa vandaka mfunu mingi sambu na Yezu nkutu na ntwala nde Yezu kukwisa na ntoto. Ntangu Yezu vandaka na ntoto, yandi vandaka kumonisa mpi na mambu yonso yina yandi vandaka kusala nde zina ya Yehowa vandaka mfunu mingi sambu na yandi. Na nsuka ya kisalu na yandi awa na ntoto, yandi sambaka Tata na yandi nde: “Tata, pesa zina na nge nkembo.” Na mbala mosi, Tata na yandi pesaka yandi mvutu na ndinga mosi ya ngolo katuka na zulu nde: “Mono me pesaka yo nkembo mpi mono ta pesa yo diaka nkembo.”​—Yoa. 12:28.

10-11. (a) Inki mutindu Yezu pesaka zina ya Yehowa nkembo? (Tala mpi kifwanisu.) (b) Sambu na nki yo ke lomba kusantisa zina ya Yehowa mpi kukotila yo?

¹⁰ Yezu pesaka mpi zina ya Tata na yandi nkembo. Inki mutindu? Yandi vandaka kusonga bantu bikalulu ya kitoko ya Yehowa mpi mambu ya kuyituka ya yandi ke salaka. Kansi, yandi salaka mpi kima ya nkaka sambu na kupesa zina ya Yehowa nkembo. Yo lombaka nde yandi santisa zina ya Yehowa mpi kukotila zina yango.b Yezu monisaka nde mambu yai vandaka mfunu mingi ntangu yandi longaka balongoki na yandi kisambu ya mbandu. Yandi tubaka nde: “Tata na beto yina kele na zulu, zina na nge kuvanda ya santu.”​—Mat. 6:9.

¹¹ Sambu na nki yo ke lomba kusantisa mpi kukotila zina ya Yehowa? Sambu na kilanga ya Edeni, Satana Diabulu vwezaka Yehowa Nzambi mpi kusilaka yandi makambu. Satana tubaka nde Yehowa kele luvunu mpi nde yandi bumbilaka Adami ti Eva kima mosi ya mbote. (Kuy. 3:1-5) Satana tubaka mpi nde Yehowa ke yalaka ve na mutindu ya mbote. Mambu ya luvunu yina Satana tubaka fingisaka zina ya Yehowa. Na nima, na bilumbu ya Yobi, Satana tubaka nde bansadi ya Yehowa ke sadilaka yandi kaka sambu yandi ke sakumunaka bo. Satana, muntu ya luvunu, tubaka diaka nde ata muntu mosi ve ke zolaka mpenza Yehowa na ntima ya mvimba mpi nde ata muntu mosi ve ta landa kusadila Yehowa kana yandi ke kutana ti bampasi. (Yobi 1:9-11; 2:4) Yo lombaka ntangu kuluta sambu na kumonisa kana nani kele muntu ya luvunu, Yehowa to Satana.

“MONO KE PESA LUZINGU NA MONO”

12. Zola ya Yezu sambu na zina ya Yehowa pusaka yandi na kundima kusala nki?

¹² Yezu vandaka kuzola Yehowa mingi kibeni, yo yina yandi salaka yonso yina yandi lendaka kusala sambu na kusantisa zina ya Yehowa mpi kukotila yo. Yezu tubaka nde: “Mono ke pesa luzingu na mono.” (Yoa. 10:17, 18) Ya kieleka, yandi ndimaka nkutu kufwa sambu na zina ya Yehowa.c Ata Adami ti Eva vandaka bantu ya kukuka, bo kolamaka na Yehowa mpi bo landaka Satana. Kansi Yezu salaka ve bonso bo, yandi ndimaka kukwisa na ntoto mpi kumonisa nde yandi ke zolaka Yehowa. Yezu monisaka nde yandi ke zolaka Yehowa na mutindu yandi lemfukilaka Yehowa luzingu na yandi ya mvimba. (Baeb. 4:15; 5:7-10) Yandi landaka kukangama kaka na Yehowa luzingu na yandi ya mvimba tii ntangu yandi fwaka na nti ya mpasi. (Baeb. 12:2) Na mutindu yina, yandi monisaka nde yandi ke zolaka Yehowa mpi zina ya Yehowa.

13. Sambu na nki Yezu fwanaka kibeni na kumonisa nde Satana kele luvunu? (Tala mpi kifwanisu.)

¹³ Mutindu Yezu nataka luzingu na yandi monisaka pwelele nde Satana kele luvunu kansi ve Yehowa! (Yoa. 8:44) Yezu zabaka Yehowa mbote kibeni kuluta bantu yonso. Kana kima mosi na kati ya mambu yina Satana tubaka sambu na Yehowa vandaka ya masonga, Yezu zolaka kuzaba yo. Kansi Yezu landaka kaka kukotila zina ya Yehowa sambu yandi zabaka nde mambu yonso yina Satana tubaka vandaka ya luvunu. Nkutu, ata ntangu yo monanaka bonso nde Yehowa yambulaka yandi, Yezu ndimaka kufwa na kisika ya kupesa Tata na yandi ya zola mukongo.​—Mat. 27:46.d

“MONO ME MANISA KISALU YINA NGE PESAKA MONO”

14. Inki balusakumunu Yehowa pesaka Yezu mutindu Yezu landaka kukangama na yandi?

¹⁴ Na kisambu yina Yezu salaka na mpimpa ya nsuka na ntwala ya lufwa na yandi, yandi tubaka nde: “Mono me manisa kisalu yina nge pesaka mono na kusala.” (Yoa. 17:4, 5) Yezu vandaka kutula ntima nde Yehowa ta sakumuna yandi kana yandi ke landa kukangama kaka na Yehowa. Ntembe kele ve nde Yezu kudikusaka ve mutindu yandi tudilaka Tata na yandi ntima. Yehowa yambulaka yandi ve na maziamu. (Bis. 2:23, 24) Yehowa futumunaka Yezu mpi pesaka yandi kiyeka ya nene na zulu. (Bafil. 2:8, 9) Nsuka-nsuka, Yezu kumaka Ntotila ya Kimfumu ya Nzambi. Inki mambu Kimfumu yango ta sala? Yezu tubaka na kitini ya zole ya kisambu ya mbandu nde: “Kimfumu na nge kukwisa. Luzolo na nge [Yehowa] kusalama na ntoto, bonso na zulu.”​—Mat. 6:10.

15. Inki diaka Yezu ta sala?

¹⁵ Kubika fioti, Yezu ta nwanisa bambeni ya Nzambi mpi ta fwa bo na Armagedoni. (Kus. 16:14, 16; 19:11-16) Mpi ntangu fioti na nima na yo, yandi ta losa Satana na “dibulu ya nda,” disongidila Satana ta vanda diaka ve ti makuki ya kusala konso kima yina kaka bonso muntu ya kufwa. (Kus. 20:1-3) Yezu ta vutula diaka ngemba na ntoto mpi ta kumisa bantu ya kukuka na Luyalu na yandi ya Bamvula 1 000. Yandi ta futumuna bafwa mpi ta kumisa ntoto ya mvimba paladisu. Lukanu ya Yehowa ta lungana mbote-mbote!​—Kus. 21:1-4.

16. Inki ta salama na nsuka ya Luyalu ya Bamvula 1 000?

¹⁶ Inki ta salama na nsuka ya Luyalu ya Bamvula 1 000? Bantu ta kuma ya kukuka mpi disumu ta vanda diaka ve. Kimenga ya Yezu ta vanda diaka ve mfunu mpi yo ta vanda diaka ve mfunu nde bantu kulomba nde Nzambi kulolula masumu na bo. Diaka, kisalu ya kinganga-nzambi yina Yezu mpi Bakristu ya bo me tulaka mafuta ke salaka ta vanda diaka ve mfunu sambu bantu ta kuma dezia ti kinduku ya mbote ti Yehowa. Mpi Yezu “ta katula lufwa, mbeni ya nsuka [yina Adami me natilaka beto].” Maziamu ta bikala ya mpamba. Bafwa ta futumuka mpi bantu yonso na ntoto ta kuma ya kukuka.​—1 Bak. 15:25, 26.

17-18. (a) Inki ta salama na nsuka ya Luyalu ya Bamvula 1 000? (b) Inki Yezu ta sala na nsuka ya luyalu na yandi? (1 Bakorinto 15:24, 28) (Tala mpi kifwanisu.)

¹⁷ Inki diaka ta salama na nsuka ya Luyalu ya Bamvula 1 000? Na ntangu yina, kima mosi ya mfunu mingi kibeni ta salama. Ntembe yina Satana basisaka sambu na zina ya Yehowa ta suka. Inki mutindu? Na kilanga ya Edeni, Satana tubaka nde Yehowa kele luvunu mpi nde yandi ke yalaka ve bantu na zola. Banda pana, bantu yina ke pesaka Yehowa lukumu mpi ke zitisaka zina na yandi ke santisaka zina yango mbala na mbala. Yo yina, na nsuka ya Luyalu ya Bamvula 1 000, bantu ta bakisa kibeni nde Yehowa tubaka mpenza kieleka. Yo ta monana kibeni pwelele nde yandi kele Tata na beto ya zulu yina ke zolaka beto mingi.

¹⁸ Na nsuka ya Luyalu ya Bamvula 1 000, bantu yonso ta bakisa kibeni nde mambu yonso yina Satana tubaka sambu na Yehowa vandaka ya luvunu. Inki Yezu ta sala na nsuka ya Luyalu na yandi ya Bamvula 1 000? Keti yandi ta sala bonso Satana mpi ta kolama na Yehowa? Ve! (Tanga 1 Bakorinto 15:24, 28.) Yezu ta vutula Kimfumu na Tata na yandi mpi yandi ta ndima kuvanda na nsi ya luyalu ya Yehowa. Ya kieleka, Yezu me swaswana ti Satana. Yezu ta ndima kuyambula konso kima yina sambu yandi ke zolaka Yehowa.

19. Inki mutindu Yezu ke tadilaka zina ya Yehowa?

¹⁹ Yo ke yitukisa ve na kumona mutindu Yehowa me pesaka Yezu zina na yandi! Yezu me monisaka kimuntu ya Yehowa na mutindu ya kukuka. Ebuna, zina ya Yehowa ke tendula nki sambu na Yezu? Yo kele mfunu mingi sambu na Yezu kuluta bima yonso ya nkaka. Mu mbandu, Yezu ndimaka kufwa sambu na zina yango mpi yandi ta ndima kuvutudila Tata na yandi bima yonso na nsuka ya Luyalu ya Bamvula 1 000. Inki mutindu beto lenda landa mbandu ya Yezu? Beto ta baka mvutu na ngiufula yai na disolo ya ke landa.