Sambu na Nki Zina ya Yehowa Fwete Vanda Mfunu Mingi Sambu na Beto?

1-2. Inki ke monisa nde zina ya Yehowa kele mfunu mingi sambu na Yezu?

ZINA ya Yehowa kele kima ya kuluta mfunu sambu na Yezu. Kele ve ata ti muntu mosi ya ke kotilaka zina ya Yehowa bonso Yezu. Na disolo ya me luta, beto longukaka nde Yezu ndimaka kufwa sambu na zina ya Yehowa mpi sambu na kumonisa nde mambu yonso yina Yehowa ke salaka kele ya mbote. (Mar. 14:36; Baeb. 10:7-9) Mpi na nsuka ya Luyalu ya Yezu ya Bamvula 1 000, yandi ta ndima kuvutula Kimfumu na maboko ya Yehowa sambu nkembo yonso kuvanda ya Yehowa. (1 Bak. 15:26-28) Zola ya Yezu sambu na zina ya Nzambi ke monisaka mpi kinduku ya ngolo yina yandi ke vandaka ti yo ti Tata na yandi. Mambu yonso yina Yezu me salaka sambu na Yehowa ke monisaka pwelele nde yandi ke zolaka Yehowa mingi.

² Yezu kwisaka na ntoto na zina ya Tata na yandi. (Yoa. 5:43; 12:13) Yandi zabisaka balongoki na yandi zina ya Tata na yandi. (Yoa. 17:6, 26) Yandi longaka na zina ya Yehowa mpi yandi salaka mambu ya kuyituka na zina yango. (Yoa. 10:25) Ya kieleka, Yezu lombaka Tata na yandi na kutanina balongoki na yandi “sambu na zina [ya Yehowa].” (Yoa. 17:11) Yo kele pwelele nde zina ya Yehowa vandaka mfunu mingi sambu na Yezu. Yo yina, keti muntu lenda tuba nde yandi kele longoki ya kieleka ya Yezu kana yandi me zaba ve zina ya Yehowa Tata na yandi mpi ke sadila yo ve?

3. Inki beto ta longuka na disolo yai?

³ Beto Bakristu ya kieleka, beto ke bakaka zina ya Yehowa na valere mingi sambu beto ke landaka mbandu ya Yezu. (1 Pie. 2:21) Na disolo yai, beto ta longuka sambu na nki Yehowa me pesaka zina na yandi na bantu yina ke longaka “nsangu ya mbote ya Kimfumu.” (Mat. 24:14) Beto ta longuka mpi sambu na nki zina ya Yehowa fwete vanda mfunu mingi sambu na konso muntu na kati na beto.

“BANTU . . . SAMBU NA KUNATA ZINA NA YANDI”

4. (a) Inki mukumba Yezu pesaka balongoki na yandi na ntwala ya kuvutuka na zulu? (b) Bangogo “beno ta vanda bambangi na mono” ke pusa beto na kudiyula nki ngiufula?

⁴ Na ntwala ya kuvutuka na zulu, Yezu songaka balongoki na yandi nde: “Beno ta baka ngolo ntangu mpeve santu ta kwisa na zulu na beno, mpi beno ta vanda bambangi na mono na Yeruzalemi, na Yudea yonso mpi na Samaria, mpi tii na kisika ya kuluta ntama ya ntoto.” (Bis. 1:8) Yo lombaka nde balongoki ya Yezu kulonga nsangu ya mbote na bisika yonso kansi ve kaka na Izraele. Mpidina bantu ya ntoto ya mvimba lendaka kuvanda ti dibaku ya kukuma balongoki ya Yezu. (Mat. 28:19, 20) Yezu songaka bo mpi nde: “Beno ta vanda bambangi na mono.” Keti yo ta lomba nde bantu yina ta kuma balongoki ya Yezu kuvanda kaka bambangi na yandi to yo ta lomba mpi nde bo zaba zina ya Yehowa mpi bo longa nsangu ya mbote sambu na yandi? Bisalu kapu 15 ke pesa mvutu na ngiufula yai.

5. Inki mutindu bantumwa mpi bankulutu na Yeruzalemi monisaka mfunu ya kuzaba zina ya Yehowa? (Tala mpi kifwanisu.)

⁵ Na mvula 49 ya ntangu na beto, bantumwa mpi bankulutu na Yeruzalemi vukanaka sambu na kutubila mambu yina yo lombaka nde Bantu ya Makanda yina bo me yotisaka ve kusala sambu na kukuma Bakristu. Na nsuka ya lukutakanu yango, Yakobo mpangi ya Yezu tubaka nde: “[Piere] me tubila mbote-mbote mutindu Nzambi tulaka dikebi na mbala ya ntete na makanda sambu na [kupona] bantu na kati na bo sambu na kunata zina na yandi.” Inki zina Yakobo vandaka kutubila? Yandi vutukilaka mambu yai ya profete Amosi tubaka: “Sambu bantu yina ke bikala, kumosi ti bantu ya makanda yonso, bantu yina bo ke bingaka na zina na mono, kusosa Yehowa na masonga yonso. Yehowa muntu me tuba.” (Bis. 15:14-18) Balongoki yai ya mpa ta suka kaka ve na kulonguka mambu ya Yehowa. Kansi, ‘bo ta binga bo mpi na zina na yandi’, disongidila, bo ta zabisa bantu zina ya Nzambi mpi bantu ta zaba bo bonso bantu ya ke nataka zina yango.

6-7. (a) Sambu na nki Yezu kwisaka na ntoto? (b) Inki kele kikuma ya nkaka ya mfunu mingi yina Yezu kwisilaka na ntoto?

⁶ Zina ya Yezu ke tendula nde “Yehowa Kele Luguluku.” Yezu monisaka nde yandi kele muntu yina Yehowa ke sadilaka sambu na kugulusa bantu yina ke kwikilaka na Yehowa mpi na yandi. Yezu kwisaka na ntoto sambu na kupesa luzingu na yandi sambu na bantu. (Mat. 20:28) Ntangu yandi pesaka kimenga na yandi, yandi pesaka bantu dibaku ya kuguluka mpi ya kubaka luzingu ya mvula na mvula.​—Yoa. 3:16.

⁷ Kansi sambu na nki yo vandaka mfunu nde Yezu kupesa kimenga na yandi sambu na bantu? Sambu na mambu yina salamaka na kilanga ya Edeni. Mutindu beto longukaka yo na disolo ya me luta, bibuti na beto ya ntete Adami ti Eva kolamaka na Yehowa mpi bo vidisaka dibaku ya kuzinga mvula na mvula. (Kuy. 3:6, 24) Yo yina, Yezu kwisaka na ntoto sambu na kugulusa bantu. Kansi, Yezu kwisaka mpi na ntoto sambu na kusala kima mosi ya mfunu mingi kuluta kugulusa bana ya Adami. Na kilanga ya Edeni, Satana tubaka mambu ya luvunu sambu na zina ya Yehowa. (Kuy. 3:4, 5) Yo yina, yo lombaka kusantisa zina ya Yehowa, disongidila bantu kuzaba nde Yehowa me salaka ve ata kima mosi ya mbi mpi nde yandi kele Tata na beto ya zola. Yezu zabaka nde kusantisa zina ya Yehowa ta sala nde bantu kuguluka kibeni. Yezu fwanaka mpenza na kusantisa zina yango sambu Yehowa muntu tindaka yandi mpi yandi salaka mambu yonso yina Yehowa zolaka nde yandi sala.

8. Yo ta lomba nde balongoki yonso ya Yezu kubakisa nki?

⁸ Yo ta lomba nde bantu yonso yina ke kwikila na Yezu, yo vanda Bayuda to Bantu ya Makanda, kubakisa nde luguluku na bo me katukaka na Yehowa Tata ya Yezu. (Yoa. 17:3) Diaka, yo ta lomba nde bo binga bo na zina ya Yehowa bonso Yezu mpi bo bakisa mfunu ya kusantisa zina yango. Yo ta lomba nde bo sala mambu yai sambu na kuguluka. (Bis. 2:21, 22) Yo yina, balongoki yonso ya kieleka ya Yezu fwete longuka na kuzaba Yehowa mpi Mwana na yandi Yezu. Yo ke yitukisa beto ve mutindu Yezu sukisaka kisambu na yandi na Yoane kapu 17 ti bangogo yai: “Mono me zabisaka bo zina na nge mpi mono ta zabisa yo, sambu zola yina nge me zolaka mono kuvanda na kati na bo mpi mono vanda na bumosi ti bo.”​—Yoa. 17:26.

“BENO KELE BAMBANGI NA MONO”

9. Kana beto ke zola kulanda Yezu, nki fwete vanda mfunu mingi sambu na beto?

⁹ Balongoki yonso ya kieleka ya Yezu fwete santisa zina ya Yehowa. (Mat. 6:9, 10) Sambu na beto balongoki ya Yezu, zina ya Yehowa fwete vanda mfunu mingi kuluta bazina yonso ya nkaka. Beto fwete monisa yo mpi na mambu yina beto ke sala. Kansi, nki beto fwete sala sambu na kusantisa zina ya Yehowa mpi kumonisa nde mambu yina Satana tubaka sambu na Yehowa kele ya luvunu?

10. Inki tribinale ya kifwani Yezaya kapu 42 tii na 44 ke tubila? (Yezaya 43:9; 44:7-9) (Tala mpi kifwanisu.)

¹⁰ Yezaya kapu 42 tii na 44 ke monisa beto mambu yina beto fwete sala sambu na kusantisa zina ya Yehowa. Yo ke tubila tribinale mosi ya kifwani yina Yehowa ke sambisa banzambi. Yandi ke songa bantu yonso yina ke kudibingaka banzambi na kumonisa kana bo kele kibeni banzambi ya kieleka. Yandi ke lomba mpi bambangi ya banzambi yango na kukwisa kutuba kana banzambi na bo kele mpenza ya kieleka. Kansi ata mosi ve na kati na bo me basika sambu na kutuba!​—Tanga Yezaya 43:9; 44:7-9.

11. Inki Yehowa ke songa bansadi na yandi na Yezaya 43:10-12?

¹¹ Tanga Yezaya 43:10-12. Yehowa ke songa bansadi na yandi nde: “Beno kele bambangi na mono, . . . mpi mono kele Nzambi.” Yehowa ke lomba bo mpi na kupesa mvutu na ngiufula yai: “Keti kele ti Nzambi ya nkaka katula mono?” (Yez. 44:8) Beto kele ti dibaku ya nene ya kupesa mvutu na ngiufula yai. Beto ke monisaka na mambu yina beto ke salaka mpi ke tubaka nde Yehowa mpamba kele Nzambi ya kieleka. Zina na yandi me luta bazina yonso ya nkaka. Beto ke monisaka na mutindu na beto ya kuzinga nde beto ke zolaka Yehowa mpi nde beto ke kangamaka kaka na yandi ata Satana ke nwanisa beto nki mutindu. Kusala mpidina ke sadisaka beto na kusantisa zina ya Nzambi.

12. Inki mutindu Yezaya 40:3, 5 lunganaka?

¹² Profete Yezaya tubaka nde muntu mosi ta “yidika nzila ya Yehowa.” (Yez. 40:3) Inki mutindu mambu yai lunganaka? Yoane mbotiki yidikaka nzila sambu na Yezu yina kwisaka na zina ya Yehowa mpi tubaka na zina yango. (Mat. 3:3; Mar. 1:2-4; Luka 3:3-6) Yezaya tubaka mpi diaka nde: “Nkembo ya Yehowa ta monana.” (Yez. 40:5) Inki mutindu yo lunganaka? Ntangu Yezu kwisaka na ntoto, yandi monisaka bikalulu ya Yehowa na mutindu ya kukuka mpi yo vandaka bonso nde Yehowa yandi mosi muntu kwisaka na ntoto. (Yoa. 12:45) Yo yina, beto ke landaka mbandu ya Yezu ntangu beto ke kotilaka zina ya Tata na yandi mpi ke santisaka yo na mambu yina beto ke tubaka mpi ke salaka.

13. Inki mutindu beto lenda landa mbandu ya Yezu?

¹³ Bonso Yezu, beto kele Bambangi ya Yehowa. Beto ke nataka zina ya Yehowa mpi beto ke songaka bantu yonso mambu ya kitoko yina yandi me salaka. Kansi sambu na kusala yo mbote, beto fwete songa mpi bantu mambu ya mfunu yina Yezu salaka sambu na kusantisa zina ya Yehowa. (Bis. 1:8) Ata muntu mosi ve me longaka mambu ya Yehowa bonso Yezu mpi beto fwete landa mbandu na yandi. (Kus. 1:5) Kansi, beto tubila ntangu yai mitindu ya nkaka yina beto ke monisaka nde zina ya Yehowa kele mfunu mingi sambu na konso muntu na kati na beto.

MITINDU YA NKAKA YINA BETO KE MONISAKA NDE ZINA YA YEHOWA KELE MFUNU MINGI SAMBU NA BETO

14. Mutindu Nkunga 105:3 ke monisa yo, nki mutindu beto ke kudiwaka sambu na zina ya Yehowa?

¹⁴ Beto ke kudikumisaka sambu na zina ya Yehowa. (Tanga Nkunga 105:3.) Yehowa ke sepelaka mingi ntangu beto ke kudikumisaka sambu na zina na yandi.( Yer. 9:23, 24; 1 Bak. 1:31; 2 Bak. 10:17) ‘Kudikumisa sambu na Yehowa’ ke tendula kuvanda na kiese sambu Yehowa kele Nzambi na beto. Kupesa lukumu na zina na yandi mpi kukotila yo, kele dibaku ya nene sambu na beto. Beto fwete wa ve nsoni ya kusonga bantu yina beto ke salaka ti bo, bana ya nzo-nkanda na beto, bantu yina ke zingaka kisika mosi ti beto mpi bantu ya nkaka nde beto kele Bambangi ya Yehowa! Diabulu ke zolaka nde beto songa diaka ve bantu ya nkaka zina ya Yehowa. (Yer. 11:21; Kus. 12:17) Ya kieleka, Satana ti bantu na yandi ke zolaka nde bantu kuvilana zina ya Yehowa. (Yer. 23:26, 27) Kansi, zola na beto sambu na zina ya Yehowa ke pusaka beto na kuvanda na kiese sambu na zina na yandi “kilumbu ya mvimba.”​—Nk. 5:11; 89:16.

15. Kubinga zina ya Yehowa ke tendula nki?

¹⁵ Beto ke landaka kubinga zina ya Yehowa. (Yoe. 2:32; Bar. 10:13, 14) Kubinga zina ya Yehowa ke tendula kaka ve kuzaba zina yango mpi kusadila yo. Kansi yo ke tendula mpi kuzaba nde Yehowa ke vandaka ti mawi mpi bikalulu mpi nde beto lenda kuma banduku na yandi, kutudila yandi ntima, kusosa lutwadisu mpi lusadisu na yandi. (Nk. 20:7; 99:6; 116:4; 145:18) Beto ke songaka mpi bantu ya nkaka zina ya Yehowa mpi bikalulu na yandi. Beto ke songaka bo mpi na kubalula ntima mpi na kusala mambu ya mbote sambu Yehowa kundima bo.​—Yez. 12:4; Bis. 2:21, 38.

16. Inki mutindu beto lenda monisa nde Satana kele muntu ya luvunu?

¹⁶ Beto ke ndimaka kuniokwama sambu na zina ya Yehowa. (Yak. 5:10, 11) Ntangu beto ke landaka kukangama kaka na Yehowa ata na ntangu ya mpasi, beto ke monisaka nde Satana kele muntu ya luvunu. Na bilumbu ya Yobi, Satana fundaka bansadi yonso ya Yehowa nde: “Muntu ta pesa konso kima yina yandi kele na yo sambu na luzingu na yandi.” (Yobi 2:4) Satana tubaka nde bantu ta sadila Yehowa kaka na bantangu ya kiese. Kansi na ntangu ya mpasi, bo ta yambula yandi. Mutindu Yobi landaka kukangama kaka na Yehowa, yandi monisaka nde Satana tubaka luvunu. Bonso Yobi, beto lenda monisa mpi nde Satana kele luvunu kana beto ke landa kukangama kaka na Yehowa ata beto ke kutana ti bampasi ya ngolo mpi ata Satana ke sala yonso sambu na kulembisa beto nitu. Beto fwete tula kibeni ntima nde Yehowa ta landa kutanina beto sambu na zina na yandi.​—Yoa. 17:11.

17. Mutindu 1 Piere 2:12 ke monisa yo, tubila mutindu ya nkaka yina beto lenda pesa zina ya Yehowa nkembo.

¹⁷ Beto ke zitisaka zina ya Yehowa. (Bing. 30:9; Yer. 7:8-11) Sambu beto kele Bambangi ya Yehowa mpi ke nataka zina na yandi, beto fwete zaba nde mambu yina beto ke salaka lenda pesa zina ya Yehowa lukumu to kufingisa yo. (Tanga 1 Piere 2:12.) Yo yina, beto fwete sala yonso sambu na kukumisa zina ya Yehowa na mambu yina beto ke salaka mpi ke tubaka. Mpidina, beto ta pesa zina na yandi nkembo ya me fwana ata beto kele bantu ya kukonda kukuka.

18. Tubila mutindu ya nkaka yina beto lenda monisa nde zina ya Yehowa kele mfunu mingi sambu na beto. (Tala mpi noti na nsi ya lutiti.)

¹⁸ Beto ke kudiyangisaka mingi sambu na lukumu ya zina ya Yehowa kuluta lukumu na beto mosi. (Nk. 138:2) Sambu na nki yo kele mfunu? Sambu kana beto ke sala mambu yina ke sepedisaka Yehowa, yo lenda sala nde bantu ya nkaka kutuba mambu ya mbi sambu na beto.a Yezu ndimaka kufwa lufwa mosi ya nsoni bonso muntu ya mbi kaka sambu na kupesa zina ya Yehowa nkembo. Yandi “ndimaka nde bo pesa yandi nsoni,” mpi yandi kudiyangisaka ve mingi sambu na mambu yina bantu vandaka kutuba sambu na yandi. (Baeb. 12:2-4) Yandi kudipesaka na kusala luzolo ya Nzambi.​—Mat. 26:39.

19. Nge ke kudiwaka nki mutindu sambu na zina ya Yehowa mpi sambu na nki?

¹⁹ Beto ke vandaka na kiese ya kusadila Yehowa mpi yo kele lukumu ya nene sambu na beto ya kuvanda Bambangi na yandi. Yo yina, beto ke ndimaka kunata zina na yandi ata bantu ya nkaka ke sekaka beto. Zina ya Yehowa kele mfunu mingi kuluta lukumu na beto mosi. Yo yina, beto fwete landa kukumisa zina ya Yehowa ata Satana ke sala yonso sambu na kulembisa beto nitu. Kana beto ke sala mpidina, beto ta monisa nde zina ya Yehowa kele kima ya kuluta mfunu sambu na beto kaka mutindu yo ke vandaka mfunu mingi sambu na Yezu Kristu.