Keti Nge “Me Longukaka” na Kusepela ti Bima Yina Nge Kele na Yo?

1. Kusepela ti bima yina nge kele ti yo ke tendula nki mpi yo ke tendula ve nki?

KETI nge ke sepelaka ti bima yina nge kele ti yo? Muntu yina ke sepelaka ti bima yina yandi kele ti yo, ke vandaka na kiese mpi na ngemba sambu yandi ke tulaka dikebi na balusakumunu yina yandi ke bakaka. Yandi ke kudiyangisaka ve mingi mpi ke waka ve makasi sambu na bima yina yandi kele ve ti yo. Kansi kuvanda ti kikalulu ya kusepela ti bima yina nge kele ti yo ke tendula ve nde nge fwete vanda mafu-mafu. Mu mbandu, yo kele mbi ve kana mpangi mosi ke sosa kudipesa mingi na kisalu ya Yehowa. (Bar. 12:1; 1 Tim. 3:1) Ata mpidina, kiese na yandi ke manaka ve kana yandi ke baka ve mikumba na ntangu yina yandi yindulaka.

2. Sambu na nki kifu ya kukonda kusepela ti bima yina beto kele ti yo kele kibeni kigonsa?

² Kana beto ke sepela ve ti bima yina beto kele ti yo, beto lenda kuma kubaka balukanu ya mbi. Muntu yina ke sepelaka ve ata fioti ti bima yina yandi kele na yo, lenda lutisa bantangu mingi kibeni na kisalu sambu na kuzwa bima yina kele mpenza ve mfunu mingi sambu na yandi. Diambu ya mawa kele nde, bampangi ya nkaka me yibaka nkutu mbongo mpi bima ya nkaka yina bo vandaka kulula. Mbala ya nkaka, bo kuditubilaka nde: ‘Kima yai fwete vanda ya mono’ to ‘Mono kele ti mfunu ya kima yai sesepi yai’ to mpi nde ‘Mono ke baka mbongo yai mpi mono ta vutula yo na nima.’ Kansi, beto fwete vila ve nde kimuyibi ya mitindu yonso ke sepedisaka ve Yehowa mpi yo ke pesaka yandi ve lukumu. (Bing. 30:9) Bampangi ya nkaka me lembaka kibeni nitu sambu bo me bakaka ve mikumba yina bo vandaka kuzola. Yo yina, bo me yambulaka nkutu kusadila Yehowa. (Bag. 6:9) Inki lenda pusa nsadi ya Yehowa na kusala mambu ya mutindu yai? Yandi lenda sala mambu yai, kana malembe-malembe yandi ke yambula kikalulu ya kusepela ti bima yina yandi kele ti yo.

3. Bafilipi 4:11, 12 ke longa beto nki dilongi ya mfunu ya ke pesa kikesa?

³ Beto yonso lenda kuma ti kikalulu ya kusepela ti bima yina beto kele ti yo. Ntumwa Polo sonikaka nde yandi ‘longukaka na kuwa kiese na bima yina yandi vandaka na yo.’ (Tanga Bafilipi 4:11, 12.) Yandi sonikaka mambu yai ntangu yandi vandaka na boloko. Ata mpidina, yandi vidisaka ve kiese na yandi. Yandi ‘longukaka kinsweki’ ya kusepela ti bima yina yandi vandaka ti yo. Kana yo me kumina beto mpasi na kusepela ti bima yina beto kele ti yo, mambu yai ya Polo tubaka mpi kutanaka ti yo, ke ndimisa beto nde beto lenda kuma ti kikalulu yai. Beto fwete yindula ve nde beto ta kuma ti kikalulu yango kaka mpidina. Kansi, beto fwete longuka na kukuma ti yo. Inki mutindu? Beto tadila bikalulu yina ta sadisa beto na kulonguka na kusepela ti bima yina beto kele ti yo.

KUMA TI KIKALULU YA KUMONISA NTONDA

4. Inki mutindu kikalulu ya kumonisa ntonda ke sadisaka beto na kusepela ti bima yina beto kele na yo? (1 Batesalonika 5:18)

⁴ Kikalulu ya kumonisa ntonda ke sadisaka muntu na kusepela mingi ti bima yina yandi kele na yo. (Tanga 1 Batesalonika 5:18.) Mu mbandu, kana beto ke monisa mpenza ntonda sambu na bima ya kuzingila yina beto kele ti yo, ntembe kele ve nde beto ta kudiyangisa ve mingi sambu na bima yina beto ke zola kansi yina beto kele ve ti yo. Kana beto ke sepela ti mikumba yina beto kele ti yo bubu yai, beto ta sala yonso sambu na kulungisa mikumba yango mbote-mbote na kisika ya kusosa kaka kubaka mikumba ya nkaka. Yo ke yitukisa ve mutindu Biblia ke lombaka beto mpi na kupesa Yehowa matondo na kisambu sambu kikalulu ya kumonisa ntonda ke sadisaka beto na kukuma ti “ngemba ya Nzambi yina me luta mayele yonso ya kubakisa mambu.”​—Bafil. 4:6, 7.

5. Inki bikuma bantu ya Izraele vandaka ti yo ya kumonisila Yehowa ntonda? (Tala mpi kifwanisu.)

⁵ Beto tadila mambu yina kuminaka bantu ya Izraele. Mbala mingi, bo vandaka kubokutila Yehowa sambu bo vandaka kuzola kudia madia yina bo vandaka kudia na Ezipte. (Kut. 11:4-6) Ya kieleka, luzingu vandaka ve pete na ntoto ya zelo na zelo. Ebuna, nki lendaka kusadisa bo na kusepela ti bima yina bo vandaka na yo? Yo lombaka nde bo yindula mambu yonso yina Yehowa sadilaka bo mpi bo monisila yandi ntonda sambu na yo. Yo lombaka bo yibuka nde ntangu bo vandaka kuniokula bo ngolo na kimpika na Ezipte, Yehowa natilaka bantu ya Ezipte bampasi 10 mpi yandi gulusaka bo. Diaka ntangu bo vandaka kubasika na Ezipte, bo “botulaka bima ya bantu ya Ezipte,” mu mbandu bima ya arza, wolo mpi bilele. (Kub. 12:35, 36) Ntangu bantu ya Ezipte vandaka kulanda bo na Nzadi-Mungwa ya Mbwaki, Yehowa kabisaka na mutindu ya kuyituka nzadi yango na bitini zole. Diaka, ntangu bo vandaka kutambula na ntoto ya zelo na zelo, konso kilumbu Yehowa vandaka kupesa bo mana sambu na kudia. Ebuna, sambu na nki bo vandaka kubokuta sambu na madia? Yo vandaka ve sambu bo kondaka madia, kansi sambu bo monisaka ve ntonda sambu na bima yina bo vandaka ti yo dezia.

6. Tubila mwa mambu yina beto lenda sala sambu na kukuma ti kikalulu ya kumonisa ntonda.

⁶ Ebuna, nki nge lenda sala sambu na kukuma ti kikalulu ya kumonisa ntonda? Ntete, nge fwete baka ntangu konso kilumbu ya kuyindula bima ya mbote yina nge kele ti yo. Nkutu, nge lenda sonika bima zole to tatu yina nge lenda monisa ntonda sambu na yo. (Bid. 3:22, 23) Ya zole, monisa ntonda. Baka lukanu ya kupesa bantu mersi sambu na bima ya mbote yina bo ke sadila nge. Kima ya kuluta mfunu kele kuvanda ti kikalulu ya kupesa Yehowa mersi. (Nk. 75:1) Ya tatu, banduku na nge ya ngolo fwete vanda bantu yina ke vandaka ti kikalulu ya kumonisa ntonda. Kikalulu ya kumonisa ntonda ke sambukilaka kaka bonso kikalulu ya kukonda kumonisa ntonda. (Kul. 1:26-28; 2 Tim. 3:1, 2, 5) Kana beto ke monisa ntonda, beto ta kudiyangisa ve mingi sambu na bampasi yina beto ke kutana ti yo to sambu na bima yina beto kele ve ti yo.

7. Inki mpangi-nkento Aci salaka sambu na kukuma ti kikalulu ya kusepela ti bima yina yandi vandaka ti yo?

⁷ Beto tadila mambu yina kuminaka mpangi-nkento Aci na Indonésie. Yandi ke tuba nde: “Na nsungi ya coronavirus, mono kumaka kufwanisa mambu ya luzingu na mono ti ya bampangi ya nkaka. Yo yina, mono kumaka diaka ve kusepela ti bima yina mono vandaka ti yo.” (Bag. 6:4) Inki sadisaka yandi na kusoba bangindu na yandi? Yandi ke tuba nde: “Mono yantikaka kutanga balusakumunu yina mono vandaka kubaka konso kilumbu mpi kuyindula mambote mingi yina kuvanda na dibundu ya Yehowa ke natilaka mono. Na nima, mono vandaka kupesa Yehowa mersi sambu na yo. Yo yina, mono kumaka mpenza kusepela ti bima yina mono vandaka na yo.” Kana nge ke sepela diaka ve ti mambu ya luzingu na nge, nge lenda sala mambu yai ya mpangi Aci salaka sambu na kukuma diaka kumonisa ntonda.

LANDA KUDIPESA NA KUSALA LUZOLO YA YEHOWA MPI VANDA YA KUDIKULUMUSA

8. Baruki bwaka na nki mutambu?

⁸ Na ntangu mosi buna, Baruki sekretere ya Yeremia, bwaka na mutambu ya kusepela diaka ve ti bima yina yandi vandaka ti yo. Baruki vandaka ti mukumba ya mpasi ya kusadisa profete Yeremia na kuzabisa nsangu ya mpasi na bantu ya Izraele yina vandaka diaka ve kuzola kumonisila Yehowa ntonda mpi kulemfukila yandi. Na ntangu mosi buna, Baruki kumaka diaka ve kutula dikebi na mambu yina Yehowa vandaka kuzola nde yandi sala, kansi yo ke monana nde yandi kumaka kudiyangisa mingi sambu na yandi mosi mpi sambu na luzolo na yandi mosi. Yo yina, Yehowa songaka Yeremia na kusonga Baruki nde: “Nge ke sosa bima ya nene sambu na nge mosi. Bika kusosa bima ya mutindu yai.” (Yer. 45:3-5) Na mutindu ya nkaka, Yehowa vandaka kusonga Baruki nde: “Sepela ti bima yina nge kele ti yo.” Baruki ndimaka ndongisila yina mpi yandi landaka kuvanda ti kinduku ya mbote ti Yehowa.

9. 1 Bakorinto 4:6, 7 ke longa beto nki? (Tala mpi bifwanisu.)

⁹ Bantangu ya nkaka, mpangi mosi lenda yindula nde yandi me fwana na kubaka mukumba mosi. Mbala ya nkaka, yandi lenda yindula mutindu yai sambu yandi kele ti makuki mingi, ke salaka ngolo to yandi kele ti eksperiansi mingi. Kansi, muntu ya nkaka lenda baka mukumba yina mpangi yango vandaka kusepela kubaka. Inki lenda sadisa mpangi yango na kudiyangisa ve sambu na yo? Yandi lenda yindula mambu yina ntumwa Polo sonikaka na 1 Bakorinto 4:6, 7. (Tanga.) Yehowa muntu ke pesaka beto mikumba mpi makuki yonso yina beto kele ti yo. Ntangu Yehowa ke pesaka beto yo, yo ke tendula ve nde beto kele mfunu mingi kuluta bantu ya nkaka. Kansi, Yehowa ke salaka yo sambu na zola na yandi mpi ntima na yandi ya mbote ya nene.​—Bar. 12:3, 6; Baef. 2:8, 9.

10. Inki beto lenda sala sambu na kukuma ti kikalulu ya kudikulumusa?

¹⁰ Kana beto ke yindula mingi mbandu ya Yezu mpi ke landa mbandu na yandi, beto ta kuma bantu ya kudikulumusa. Yezu yobisaka makulu ya balongoki na yandi ata yandi zabaka nde yandi kele Mwana ya Nzambi mpi yandi kele ti kiyeka mingi. Ntumwa Yoane sonikaka nde: “Yezu zabaka nde Tata pesaka bima yonso na maboko na yandi mpi nde yandi katukaka na Nzambi mpi vandaka kukwenda na Nzambi,” ata mpidina yandi “yantikaka kuyobisa makulu ya balongoki.” (Yoa. 13:3-5) Yezu lendaka kuyindula nde yo fwanaka nde bo yobisa makulu na yandi. Kansi ntangu yandi vandaka na ntoto, yandi yindulaka ve ata fioti nde yandi me fwana na kuvanda ti bimvwama mpi ti luzingu ya kukonda bampasi sambu yandi kele Mwana ya Nzambi. (Luka 9:58) Yezu vandaka ya kudikulumusa mpi yandi vandaka kusepela ti bima yina yandi vandaka ti yo. Yandi me bikilaka beto mbandu ya mbote kibeni.​—Yoa. 13:15.

11. Inki ke sadisaka mpangi Dennis na kusepela ti bima yina yandi kele ti yo?

¹¹ Mpangi-bakala Dennis na Pays-Bas salaka bikesa ya kulanda mbandu ya Yezu, kansi yo vandilaka yandi ve pete. Yandi ke tuba nde: “Bantangu ya nkaka, mono ke kumaka ti mpeve ya lulendo mpi kifu ya kusepela diaka ve ti bima yina mono kele ti yo, mingi-mingi kana mpangi mosi me baka mukumba yina mono vandaka kuzola kubaka. Kana yo me salama mutindu yina, mono ke longukaka masolo ya ke tubila kudikulumusa. Na aplikasio JW Library^®, mono me tulaka kisika mosi baverse ya ke tubila kudikulumusa sambu mono zwa yo nswalu mpi mono tanga yo diaka. Mono me tulaka mpi na telefone na mono badiskure yina ke tubila kudikulumusa mpi mono ke landaka yo mbala na mbala.a Mono me bakisaka nde mambu yonso yina beto ke salaka kele sambu na lukumu ya Yehowa, kansi ve sambu na lukumu na beto mosi. Yehowa ke salaka nde konso muntu kuvanda ti kima mosi ya mfunu ya kusala na dibundu na yandi mpi yandi muntu ke salaka nde mambu yango ya beto ke sala kununga.” Kana nge ke sepela diaka ve ti bima yina nge kele ti yo, sala yonso sambu na kukuma ti kikalulu ya kudikulumusa. Yo ta sadisa nge na kukuma ti kinduku ya ngolo ti Yehowa mpi na kusepela ti bima yina nge kele ti yo.​—Yak. 4:6, 8.

YINDULA MINGI BALUSILU YA YEHOWA

12. Tubila kivuvu yina ke sadisaka beto na kuzinga na kiese. (Yezaya 65:21-25)

¹² Beto ke vandaka na kiese mingi ntangu beto ke yindulaka mambu ya kitoko yina Yehowa ke sila beto sambu na bilumbu ke kwisa. Na mukanda ya Yezaya, Yehowa ke songa beto nde yandi ke bakisaka bampasi yonso yina beto ke kutanaka ti yo mpi yandi ke sila beto nde yandi ta katula yo yonso. (Tanga Yezaya 65:21-25.) Beto ta zinga na lutaninu mpi na banzo ya kitoko. Beto ta salaka kisalu ya ke pesa kiese mpi beto ta diaka madia ya mbote mpi ya ntomo. Beto ta kudiyangisaka diaka ve ata fioti nde mambu ya mbi lenda kumina beto to bana na beto. (Yez. 32:17, 18; Ezek. 34:25) Ya kieleka, beto ta zingaka na kiese mpi na lutaninu mpenza.

13. Na nki bantangu beto fwete yindula mingi kivuvu na beto?

¹³ Yo me kuma diaka mfunu mingi bubu yai na kuyindula mingi kivuvu na beto. Sambu na nki? Sambu beto ke zinga na “bilumbu ya nsuka” mpi beto ke kutana ti mambu ya “mpasi” kibeni. (2 Tim. 3:1) Yehowa ke pesaka beto lutwadisu, ngolo mpi lusadisu sambu na kusadisa beto na kukanga ntima konso kilumbu na bampasi. (Nk. 145:14) Diaka, kivuvu na beto ke sadisaka beto mpi na kukanga ntima na bampasi. Mbala ya nkaka, sambu na kuzwa kaka bima ya kuzingila yina dibuta na nge kele ti yo mfunu, yo ke lombaka nde nge sala ngolo kibeni. Keti yo ke tendula nde nge ta vandaka kaka nsukami? Ata fioti ve! Yehowa ke sila nde na Paladisu, yandi ta pesa nge bima mingi kibeni ya nge kele na yo mfunu. (Nk. 9:18; 72:12-14) Mbala ya nkaka nge ke belaka maladi mosi ya ngolo yina ke manaka ve, nge ke kudiyangisaka na mabanza to nge ke belaka maladi ya nkaka ya ngolo. Keti yo ke tendula nde nge ta niokwamaka kaka mpidiayi mpi nde nge ta beluka ve? Ata fioti ve. Na nsi-ntoto ya mpa, Nzambi ta katula lufwa mpi maladi. (Kus. 21:3, 4) Kivuvu yai ke sadisaka beto na kuzinga na kiese, na kudiyangisa ve mingi mpi na kuwa ve makasi sambu na mambu yina ke kumina beto bubu yai. Beto lenda vanda na kiese ata bantu ke sadila beto mambu ya mbi, ata muntu mosi ya beto ke zolaka me fwa, ata beto ke bela to ke kutana ti konso mpasi yina. Sambu na nki? Sambu ata beto ke kutana ti konso mpasi yina, beto ke zabaka nde “mpasi kele sambu na ntangu mingi ve” mpi nde kubika fioti, beto ta niokwamaka diaka ve ata fioti na nsi-ntoto ya mpa.​—2 Bak. 4:17, 18.

14. Inki beto lenda sala sambu na kukumisa kivuvu na beto ngolo?

¹⁴ Sambu kivuvu ke sadisaka beto na kuvanda na kiese, nki beto lenda sala sambu na kukumisa yo ngolo? Mutindu maneti ke sadisaka beto na kumona mbote-mbote bima na kintama, beto fwete sala mpi mambu ya mfunu sambu na kukumisa kivuvu na beto ngolo mpi kumona Paladisu mbote-mbote na mabanza. Kana beto ke kudiyangisa mingi sambu beto ke zwa ve mbongo ya me fwana, beto fwete yindula mutindu luzingu ta vanda ntangu mbongo to kubaka bamfuka ta vanda diaka ve ti mfunu mpi ata muntu mosi ve ta vanda nsukami. Kana beto ke kudiyangisa sambu beto me baka ve mukumba mosi ya beto ke zolaka, beto fwete yibuka nde mikumba yango kele mfunu mingi ve kana beto fwanisa yo ti luzingu ya kitoko yina beto ta vanda ti yo na nsi-ntoto ya mpa, ntangu beto ta sadilaka Yehowa mvula na mvula. (1 Tim. 6:19) Kana beto ke kudiyangisa mingi sambu na mambu ya mpasi yina beto ke kutana ti yo bubu yai, yo ta vandila beto mpi mpasi na kuyindula kivuvu na beto. Kansi kana beto ke yindula mingi mambu ya kitoko yina Yehowa ke sila beto, beto ta kudiyangisa ve mingi sambu na bampasi na beto.

15. Mambu yina mpangi Christa ke tuba ke longa nge nki?

¹⁵ Beto tala mutindu kivuvu sadisaka mpangi Christa, nkento ya mpangi Dennis yina beto me tubila dezia. Yandi ke tuba nde: “Mono ke belaka maladi mosi yina ke lembisaka mono mingi kibeni nitu mpi mono ke tambulaka kaka na kiti ya bikata mpi ke lutisaka bantangu mingi kibeni na mbeto. Mono ke waka mpasi mingi konso kilumbu. Ntama mingi ve, munganga songaka mono nde mono ta beluka diaka ve. Kansi na mbala mosi mono kuditubilaka nde: ‘Mutindu na yandi ya kutadila luzingu na bilumbu ke kwisa, me swaswana kibeni ti ya mono.’ Mono ke tulaka dikebi na kivuvu na mono yina ke sadisaka mono na kuvanda na ngemba. Ata mono ke kutana ti bampasi ya mingi na nsi-ntoto yai, mono ke zabaka nde mono ta vanda ti luzingu ya mbote na bilumbu ke kwisa na nsi-ntoto ya mpa!”

“BANTU YINA KE WAKA YANDI BOMA KE KONDAKA KIMA VE”

16. Sambu na nki ntotila Davidi sonikaka nde bantu yina ke waka Yehowa boma ke “kondaka kima ve”?

¹⁶ Ata bansadi ya Yehowa kele ti kikalulu ya kusepela ti bima yina bo kele ti yo, bo ke kutanaka mpi ti bampasi. Mu mbandu, yindula bampasi yina ntotila Davidi kutanaka ti yo. Bana na yandi tatu fwaka. Bo kusilaka yandi makambu, banduku na yandi ya nkaka vandaka ve ya kwikama na yandi mpi ntotila Saule vandaka kusosa kufwa yandi. Yo yina, bamvula mingi yandi vandaka kutina-tina. Ata Davidi kutanaka ti bampasi yai, yandi tubaka mambu yai sambu na Yehowa: “Bantu yina ke waka yandi boma ke kondaka kima ve.” (Nk. 34:9, 10) Sambu na nki yandi tubaka mambu yai? Sambu yandi zabaka nde ata bansadi ya Yehowa ke kutanaka ti bampasi na luzingu, Yehowa ke pesaka bo ntangu yonso bima yina bo ke vandaka kibeni na yo mfunu. (Nk. 145:16) Bonso Davidi, beto fwete ndima kibeni nde Yehowa ta sadisa beto na kukanga ntima na bampasi yonso yina beto ke kutana ti yo. Ya kieleka, beto lenda vanda na ngemba mpi na kiese ata beto ke kutana ti mambu ya nki mutindu.

17. Sambu na nki nge fwete baka lukanu ya kulonguka kusepela na bima yina nge kele ti yo?

¹⁷ Yehowa ke zolaka nde nge vanda na kiese. (Nk. 131:1, 2) Yo yina, sala yonso sambu na kulonguka na kusepela ti bima yina nge kele ti yo. Kana nge ke sala ngolo sambu na kukuma kumonisa ntonda, na kulanda kudipesa na kusala luzolo ya Yehowa, na kuvanda ya kudikulumusa mpi na kukumisa ngolo kivuvu na nge, nge ta tuba kukonda mpasi nde: “Ee, mono ke vandaka na kiese.”​—Nk. 16:5, 6.