DISOLO YA KULONGUKA 42
NKUNGA 44 Kisambu ya Nsukami
Inki Mutindu Nge Lenda Samba na Ntima ya Mvimba?
“Mono ke binga na ntima na mono ya mvimba. O Yehowa, ndima.” —NK. 119:145.
NA BUNKUFI
Beto ta mona mutindu bisambu ya kele na Biblia lenda sadisa beto na kusamba na ntima ya mvimba.
1-2. (a) Inki lenda sala nde beto samba ve Yehowa na ntima ya mvimba? (b) Inki ke ndimisa beto nde Yehowa ke tulaka dikebi ya mingi na bisambu na beto?
KETI nge ke vutukilaka bisambu ya mutindu mosi mbala na mbala mpi nge ke sambaka ve Yehowa na ntima ya mvimba? Kana mpidina, kuvila ve nde mambu yai ke kuminaka mpi bantu ya nkaka. Beto ke vandaka ti mambu mingi ya kusala mpi yo lenda sala nde bantangu ya nkaka beto sala kaka bisambu ya nkufi. Diaka, beto lenda yindula nde Yehowa ke sepela ve ti beto mpi nde beto me fwana ve na kusamba yandi.
2 Nkunga 10:17 ke tuba nde Yehowa ke waka ‘bisambu ya bantu ya kudikulumusa.’ Yandi ke waka mambu yonso yina beto ke songaka yandi na kisambu sambu yandi ke tudilaka beto dikebi ya mingi. (Nk. 139:1-3) Ya kieleka, Biblia ke ndimisa beto nde Yehowa ke tulaka dikebi ya mingi na bisambu yina beto ke salaka na ntima ya mvimba kansi ve na mutindu beto ke salaka yo.
3. Disolo yai ta pesa bamvutu na nki bangiufula?
3 Na disolo yai, beto ta tubila bangiufula yai: Sambu na nki beto fwete samba Yehowa na ntima ya mvimba? Inki beto lenda sala sambu bisambu na beto kusadisa beto na kukuma banduku ya ngolo ya Yehowa? Inki mutindu bisambu ya bansadi ya Yehowa na Biblia lenda sadisa beto? Inki beto lenda sala kana beto ke kuka ve kusonga Yehowa mutindu beto ke kudiwa?
SAMBA YEHOWA NA NTIMA YA MVIMBA
4. Inki lenda sadisa beto na kusamba Yehowa na ntima ya mvimba? (Nkunga 119:145)
4 Muntu yina sonikaka Nkunga 119 bakisaka nde Yehowa kele nduku yina ke zolaka nde mambu kutambula mbote sambu na banduku na yandi. Yo yina, yandi sambaka Yehowa na ntima ya mvimba ata yandi kutanaka ti bampasi. Mu mbandu, bantu vandaka kutuba mambu ya mbi sambu na yandi. (Nk. 119:23, 69, 78) Diaka, bifu na yandi mosi vandaka kulembisa yandi nitu. (Nk. 119:5) Kana beto mpi ke ndima nde Yehowa kele nduku yina ke zolaka nde mambu kutambula mbote sambu na beto, beto ta samba yandi na ntima ya mvimba.—Tanga Nkunga 119:145.
5. Sambu na nki beto fwete bika ve nde kima mosi kukanga beto nzila ya kusamba? Pesa mbandu.
5 Beto fwete bika ve ata fioti nde kima mosi kukanga beto nzila ya kusamba Yehowa. Nkutu, Yehowa ke lombaka ata bantu yina me sala masumu ya nene na kusamba yandi. (Yez. 55:6, 7) Mu mbandu, kana nge ke kwenda kisika mosi mpi nge me vila nzila, keti nge ta wa nsoni ya kuyula bantu ya nkaka sambu nge ke yindula nde bo lenda seka nge? Ve. Beto mpi fwete samba Yehowa na ntima ya mvimba kana beto ke zaba ve kima ya kusala to kana beto me sala disumu.—Nk. 119:25, 176.
INKI MUTINDU BISAMBU NA NGE LENDA SADISA NGE NA KUKUMA NDUKU YA NGOLO YA YEHOWA?
6-7. Inki lenda sadisa beto na kusamba Yehowa na ntima ya mvimba? Pesa mbandu. (Tala mpi noti na nsi ya lutiti.)
6 Kana beto ke songa Yehowa mambu yonso yina kele na ntima na beto, beto ta kuma banduku na yandi ya ngolo. Ebuna, nki mutindu beto lenda sala yo?
7 Yindula mingi bikalulu ya Yehowa.a Beto ta songa Yehowa kukonda mpasi mambu ya kele na ntima na beto kana beto ke yindula mingi bikalulu na yandi. (Nk. 145:8, 9, 18) Beto baka mbandu ya mpangi Kristine. Papa na yandi vandaka kusadila yandi mambu na nku. Yo yina, yandi vandaka kundima ve nde Yehowa kele Tata ya zola mpi yo vandilaka yandi mpasi na kusamba. Yandi vandaka mpi kuyindula nde yandi kele ve muntu ya mbote mpi nde Yehowa ta yambula kuzola yandi sambu na bifu na yandi. Inki kikalulu ya Yehowa sadisaka yandi na kusoba bangindu na yandi? Yandi ke tuba nde: “Mono vandaka kuyindula mingi zola ya kwikama ya Yehowa mpi yo sadisaka mono na kubakisa nde yandi ke zolaka mono. Ata mono me sala kifu, yandi ta landa kaka kuzola mono mpi yandi ta sadisa mono. Mambu yai ke sadisaka mono na kusamba Yehowa na ntima ya mvimba na bantangu ya kiese mpi na bantangu ya mpasi.”
8-9. Inki mambote beto ta baka kana beto ke yindula na ntwala mambu yina beto ta samba sambu na yo? Pesa mbandu.
8 Yindula mambu yina nge ta samba sambu na yo. Ntete nge lenda kudiyula nde: ‘Inki mambu mono ke kutana ti yo bilumbu yai? Keti yo ke lomba nde mono lolula muntu mosi? Keti mono kele ti mfunu nde Yehowa kusadisa mono na diambu mosi?’ (2 Bant. 19:15-19) Beto lenda yindula mpi mambu yina Yezu songaka beto na kulomba na kisambu mpi na nima, beto samba sambu na yo. Mu mbandu, beto lenda samba sambu zina ya Yehowa kuvanda ya santu, Kimfumu na yandi kukwisa mpi luzolo na yandi kusalama na ntoto bonso na zulu.—Mat. 6:9, 10.
9 Munganga songaka mpangi Aliska nde bakala na yandi ta zinga diaka ve mingi sambu yandi kele ti maladi mosi ya ngolo. Yo yina, yo vandilaka yandi mpasi na kusamba. Yandi ke tuba nde: “Mono kumaka kisaka-saka mpi mono vandaka kuzaba ve mambu yina mono lenda samba sambu na yo.” Inki sadisaka yandi? Yandi ke tuba nde: “Na ntwala ya kusamba, mono ke bakaka mwa ntangu ya kuyidika bangindu na mono sambu na kusamba ve kaka sambu na mono mpi bakala na mono. Ntangu mono ke salaka mpidina, mono ke kudiwaka mbote mpi yo ke sadisaka mono na kusamba mpi sambu na mambu mingi ya nkaka.”
10. Sambu na nki nge fwete samba ve zulu-zulu? (Tala mpi bifwanisu.)
10 Kusamba ve zulu-zulu. Bisambu ya nkufi lenda sadisa beto mpi na kukuma banduku ya ngolo ya Yehowa, kansi bisambu ya nda lenda sadisa beto na kusonga Yehowa mambu mingi yina kele na ntima na beto.b Mpangi Elijah, bakala ya mpangi Aliska ke tuba nde: “Mono ke sambaka mbala mingi konso kilumbu, kansi ntangu mono ke salaka bisambu ya nda, mono ke waka nde kinduku na mono ti Yehowa ke kumaka ngolo mingi. Mono ke salaka mutindu yai sambu mono ke zabaka nde Yehowa ke vandaka ntima-nda mpi yandi ke waka bisambu na mono tii konso ntangu yina mono ta manisa.” Meka kusala mambu yai: Pona ntangu ya mbote mpi kisika ya mbote ya kusamba sambu ata kima mosi ve kukatula dikebi na nge. Samba na ndinga ya ngolo mpi sala bisambu ya nda. Sala yonso sambu na kukuma ti kikalulu ya kusamba mbala na mbala.
Pona ntangu mpi kisika yina ta sadisa nge na kusamba Yehowa na ntima ya mvimba (Tala paragrafe 10)
INKI MUTINDU BISAMBU YINA KELE NA BIBLIA LENDA SADISA NGE?
11. Kuyindula bisambu yina kele na Biblia lenda sadisa beto na kusala nki? (Tala mpi lupangu “Keti Nge Ke Kudiwa mpi Bonso Bo?”)
11 Kana nge ke yindula mingi bisambu mpi bankunga yina kele na Biblia, yo ta sadisa nge mingi. Kana nge ke tadila mutindu bansadi ya Nzambi vandaka kusamba yandi na ntima ya mvimba, yo ta sadisa nge mpi na kusala bonso bo. Diaka, nge lenda sadila mpi na bisambu na nge mambu ya nkaka yina bo vandaka kutuba. Nkutu, nge lenda mona bisambu ya nkaka ya ke wakana ti mambu yina nge ke kutana ti yo.
12. Inki bangiufula beto lenda kudiyula ntangu beto ke tadila kisambu mosi?
12 Ntangu nge ke tadila kisambu mosi na Biblia, kudiyula nde: ‘Nani salaka kisambu yai mpi nki mambu yandi vandaka kukutana ti yo? Keti mambu yango ke tadila mono mpi? Inki kisambu yango ke longa mono?’ Nge ta baka mpi mambote mingi kana nge sala bansosa sambu na kuzwa bamvutu na bangiufula ya nkaka. Beto tadila bisambu iya.
13. Inki dilongi nge lenda baka na kisambu ya Ana? (1 Samuele 1:10, 11) (Tala mpi kifwanisu.)
13 Tanga 1 Samuele 1:10, 11. Ntangu Ana salaka kisambu ya kele na baverse yai, yandi vandaka kukutana ti mambu zole ya mpasi mingi. Ya ntete, yandi vandaka mukobo mpi ya zole, mbanda na yandi vandaka kuseka yandi mingi. (1 Sam. 1:4-7) Inki dilongi nge lenda baka na kisambu ya Ana kana nge ke kutana ti mpasi mosi yina ke mana ve? Ana bakaka kikesa ntangu yandi songaka Yehowa na ntima ya mvimba mambu yonso yina vandaka kuyangisa yandi. (1 Sam. 1:12, 18) Nge mpi ta baka kikesa kana nge ke “losila Yehowa kizitu na nge,” disongidila kana nge ke songa yandi mambu yonso yina ke yangisa nge.—Nk. 55:22.
Ana losilaka Yehowa kizitu na yandi ntangu mbanda na yandi vandaka kusosila yandi sambu yandi vandaka kubuta ve (Tala paragrafe 13)
14. (a) Mbandu ya Ana ke longa beto diaka nki? (b) Inki mutindu bambandu ya bisambu yina kele na Biblia lenda sadisa beto? (Tala noti na nsi ya lutiti.)
14 Ntangu Samuele butukaka, Ana nataka yandi na nganga-nzambi ya nene Eli mwa bamvula na nima. (1 Sam. 1:24-28) Ana salaka kisambu na ntima ya mvimba sambu na kupesa Yehowa mersi mutindu yandi ke taninaka mpi ke sadisaka bantu yina ke sadilaka yandi na masonga yonso.c (1 Sam. 2:1, 8, 9) Ata Ana kutanaka mpi ti bampasi ya nkaka na luzingu, yandi vandaka kutula ve dikebi kaka na bampasi yango kansi mpi na mutindu Yehowa sadisaka yandi. Inki yo ke longa beto? Ntangu beto ke kutana ti bampasi yina ke mana ve, beto fwete tula dikebi na mutindu Yehowa sadisaka bansadi na yandi na ntangu ya ntama mpi na mutindu yandi ke landa kusadisa beto.
15. Ntangu beto ke mona mambu ya mbi ke salama, nki dilongi beto lenda baka na kisambu ya profete Yeremia? (Yeremia 12:1)
15 Tanga Yeremia 12:1. Na ntangu mosi, profete Yeremia vandaka kudiyangisa mingi sambu yandi vandaka kumona bantu ya mbi ke zinga mbote. Yandi vandaka mpi kudiyangisa sambu bampangi na yandi, bantu ya Izraele, vandaka kusadila yandi mambu ya mbi. (Yer. 20:7, 8) Ata Yeremia songaka Yehowa nde yandi vandaka kusepela ve ti mambu yina vandaka kusalama, yandi tubaka ve ata fioti nde Yehowa ke salaka ve mambu mbote. Yeremia kumaka kundima diaka mingi nde Yehowa ke salaka mambu na mutindu ya mbote ntangu yandi monaka mutindu Yehowa pesaka bantu ya mbi ndola. (Yer. 32:19) Beto lenda bakisa kukonda mpasi mutindu Yeremia vandaka kudiwa ntangu beto ke mona bantu ya mbi ke zinga mbote. Nkutu, bantangu ya nkaka bantu ke sekaka beto mpi. Kansi bonso Yeremia, beto fwete songa Yehowa mambu yina ke pesa beto mpasi mpi kutula ntima nde yandi ta yidika mambu na ntangu ya me fwana.
16. Kisambu ya Mulevi ke longa beto nki? (Nkunga 42:1-4) (Tala mpi bifwanisu.)
16 Tanga Nkunga 42:1-4. Mulevi yina sonikaka nkunga yai vandaka na kimpika na Babilone mpi yandi vandaka ve ti dibaku ya kuvukana ti bampangi na yandi, bantu ya Izraele, sambu na kusambila Yehowa na tempelo. Nkunga yai ke monisa kibeni mutindu yandi vandaka kudiwa. Beto lenda bakisa kukonda mpasi mutindu yandi vandaka kudiwa kana beto ke vandaka kaka na nzo sambu beto ke belaka to kana beto kele na boloko sambu na lukwikilu na beto. Bantangu ya nkaka beto lenda vanda kikesa, kansi bantangu ya nkaka beto lenda lemba kibeni nitu. Yo yina, beto fwete songa Yehowa mutindu beto ke kudiwa. Yo ta sadisa beto na kutadila mambu na mutindu ya mbote mpi na kuvila ve mambu ya kuluta mfunu. Nkutu, Mulevi yina sonikaka nkunga yai bakisaka nde yandi ta zwa mabaku ya nkaka ya kusambila Yehowa na kiese yonso. (Nk. 42:5) Yandi vandaka mpi kuyindula mingi mutindu Yehowa vandaka kusadisa yandi. (Nk. 42:8) Kana beto ke samba Yehowa na ntima ya mvimba, beto ta bakisa mbote bangindu na beto, beto ta kudiwa na ngemba mpi beto ta baka ngolo ya kukanga ntima na bampasi.
Mulevi yina sonikaka Nkunga 42 sambaka Yehowa na ntima ya mvimba. Kana beto ke songa Yehowa mambu yina ke yangisa beto, yo ta sadisa beto na kutadila mambu na mutindu ya mbote (Tala paragrafe 16)
17. (a) Kisambu ya profete Yonasi ke longa beto nki? (Yonasi 2:1, 2) (b) Inki mutindu mambu ya nkaka yina kele na mukanda ya bankunga lenda sadisa beto ntangu beto ke kutana ti bampasi? (Tala mpi noti na nsi ya lutiti.)
17 Tanga Yonasi 2:1, 2. Profete Yonasi salaka kisambu ya kele na baverse yai ntangu yandi vandaka na divumu ya mbisi mosi ya nene. Yandi lemfukilaka ve Yehowa, kansi yandi vandaka kundima kaka nde Yehowa ta wa kisambu na yandi. Na kisambu yango, yandi sadilaka bangogo mingi yina kele na mukanda ya Bankunga.d Yo ke monana nde yandi zabaka mbote baverse yina. Yo yina ntangu yandi vandaka kuyibuka yo mpi kuyindula yo mingi, yo sadisaka yandi na kundima kibeni nde Yehowa ta sadisa yandi. Kana beto ke kanga baverse na ntu bonso Yonasi, beto ta yibuka yo mpi yo ta pesa beto kikesa ntangu beto ke samba Yehowa na bantangu ya mpasi.
SAMBA YEHOWA SAMBU NA KULANDA KUKUMA TI KINDUKU YA NGOLO TI YANDI
18-19. Inki mutindu Baroma 8:26, 27 lenda pesa beto kikesa kana beto ke kuka ve kusonga Yehowa mutindu beto ke kudiwa? Pesa mbandu.
18 Tanga Baroma 8:26, 27. Bantangu ya nkaka basusi lenda lutila beto mpi yo lenda sala nde beto kuka ve kusonga Yehowa mutindu beto ke kudiwa. Na bantangu yai, mpeve santu “ke bondilaka” sambu na beto. Inki mutindu? Bansadi ya Yehowa ya ntangu ya ntama kutanaka ti mambu mingi ya mpasi bonso beto mpi bo sambaka Yehowa. Yehowa salaka nde bantu yina sonikaka Biblia kusonika bisambu yango na Ndinga na yandi. Yo yina, kana beto ke kuka ve kusonga Yehowa mambu yina ke yangisa beto, yandi lenda sadila bisambu yina mpi yandi pesa beto mvutu bonso nde beto bantu me sala yo.
19 Mambu yai sadisaka mpangi-nkento Yelena na Russie. Bo kangaka yandi sambu yandi vandaka kusamba mpi kutanga Biblia. Yandi vandaka kudiyangisa mingi, yo yina yandi vandaka kukuka ve kusamba. Yandi ke tuba nde: “Na ntangu yina, mono yibukaka nde ntangu mono ke kudiyangisa mingi mpi ke kuka ve kusonga Yehowa mutindu mono ke kudiwa, yandi ta pesa mvutu na bisambu yina kele na Biblia . . . bonso nde mono muntu salaka yo. . . . Mambu yai pesaka mono kikesa na bantangu ya mpasi mingi kibeni.”
20. Kana beto kele ti basusi, nki mutindu beto lenda yidika mabanza na beto na ntwala ya kusamba?
20 Kana beto kele ti basusi, bangindu na beto lenda kuma kisaka-saka ntangu beto ke samba. Inki lenda sadisa beto? Beto lenda landa baverse ya mukanda ya Bankunga yina bo me kotisaka ndinga sambu na kusadisa beto na kuyidika mabanza na beto. Bonso ntotila Davidi, beto lenda sonika mambu yina beto kele ti mfunu ya kusonga Yehowa. (Nk. 18, 34, 142 mpi bangogo na zulu ya bakapu.) Yo ke tendula ve nde beto yonso fwete sonika mambu yina beto kele ti mfunu ya kusonga Yehowa. (Ps. 141:2) Konso muntu fwete sala mutindu yina ta vanda mbote sambu na yandi.
21. Sambu na nki beto fwete samba na ntima ya mvimba?
21 Beto ke waka kiese ya kuzaba nde Yehowa ke zabaka mambu yina beto ke zola kutuba na ntwala nkutu nde beto tuba ata kima. (Nk. 139:4) Kansi, yandi ke zolaka kaka nde beto mosi kusonga yandi yo sambu yo ke monisaka nde beto ke tudilaka yandi ntima. Yo yina, kuvanda ve ti badute ya kusamba yandi. Nge lenda baka malongi na bisambu yina kele na Biblia. Samba Yehowa na ntima na nge ya mvimba na bantangu ya kiese mpi na bantangu ya mpasi. Kana nge sala mpidina, Yehowa ta sadisa nge sambu yandi kele Nduku na nge.
NKUNGA 45 Mambu ya Mono Ke Yindulaka
a Tanga ka-ntu diambu “Bikalulu ya nkaka ya kitoko ya Yehowa” yina kele na ntu-diambu “Yehowa.” Yo kele na mukanda Malongi ya Biblia Sambu na Bansadi ya Nzambi.
b Beto fwete sala bisambu ya nkufi kana beto ke samba na ntwala ya dibundu.
c Ntangu Ana sambaka, yandi sadilaka bangogo yina kele na mikanda ya Moize sonikaka. Ntembe kele ve nde yandi bakaka ntangu ya kuyindula mingi mambu ya kele na mikanda yango. (Kul. 4:35; 8:18; 32:4, 39; 1 Sam. 2:2, 6, 7) Bamvula mingi na nima, ntangu Maria mama ya Yezu vandaka kukumisa Yehowa, yandi sadilaka mpi bangogo ya kiteso mosi ti yina ya Ana.—Luka 1:46-55.
d Mu mbandu, fwanisa mambu yina kele na Yonasi 2:3-9 ti yina kele na Bankunga 69:1; 16:10; 30:3; 142:2, 3; 143:4, 5; 18:6 mpi 3:8. Yonasi sadilaka yo na ndonga mutindu yo kele awa.