Bampangi Zole ya Mpa na Nto-Kimvuka

NA MPOSO 5 octobre 2024, bo pesaka luzayisu mosi ya mfunu na lukutakanu ya nsuka ya mvula nde mpangi Jody Jedele mpi mpangi Jacob Rumph me kuma bampangi ya Nto-Kimvuka ya Bambangi ya Yehowa. Bampangi yai zole ke sadilaka Yehowa na mutindu ya mbote banda bamvula mingi.

Mpangi Jedele butukaka na provense ya Missouri na États-Unis mpi bibuti na yandi vandaka Bambangi ya Yehowa. Dibuta na bo vandaka kuzinga na kisika yina Bambangi ya Yehowa vandaka ve mingi. Yo yina, yandi kutanaka ti bampangi mingi yina vandaka kukatuka na bisika ya mutindu na mutindu sambu na kukwisa kulonga nsangu ya mbote na kisika yina bo vandaka kuzinga. Mutindu bampangi yango vandaka kuzinga na bumosi mpi zola yina bo vandaka ti yo sadisaka yandi mingi kibeni. Yo yina, yandi bakaka mbotika na 15 octobre 1983. Yandi vandaka kusepela mingi kulonga nsangu ya mbote. Yo yina, yandi kumaka mupasudi-nzila ya ntangu yonso na septembre 1989 na nima ya kumanisa nzo-nkanda.

Ntangu mpangi Jedele vandaka leke, bo vandaka kukwenda ti bibuti na yandi mpi mpangi na yandi ya nkento mbala na mbala sambu na kutala Betele. Yo sadisaka yandi ti mpangi na yandi ya nkento na kuditudila lukanu ya kusala na Betele mpi bo lungisaka yo. Mpangi Jedele kotaka na Betele ya Wallkill na septembre 1990. Ntete, yandi vandaka kusala na Biro ya Ke Talaka Mambu ya Bunkete mpi na nima na Biro ya Ke Talaka Mambu ya Lusansu.

Na ntangu yina, mabundu ya Kiespaniole yina vandaka pene-pene ti Betele vandaka kukuma mingi mpi bo vandaka ti mfunu ya bampangi. Yo yina mpangi Jedele kwendaka na dibundu mosi ya Kiespaniole mpi yandi yantikaka kulonguka ndinga yango. Mwa ntangu fioti na nima, yandi kutanaka ti mpangi-nkento Damaris yina vandaka mupasudi-nzila na nziunga na bo. Na nima ya bantangu, bo kwelanaka mpi mpangi Damaris kotaka mpi na Betele.

Na 2005, bo basikaka na Betele sambu na kusadisa bibuti na bo. Na ntangu yina, bo kumaka bapasudi-nzila ya ntangu yonso. Mpangi Jedele kumaka longi na Nzo-Nkanda ya Bapasudi-nzila, yandi kumaka kusala na Komite ya Kuwakana ti Balupitalu mpi yandi vandaka na Komite ya Kutunga mpi ya Kuyidika Banzo ya Kimfumu.

Na 2013, bo bingaka diaka mpangi Jedele ti nkento na yandi sambu na bisalu ya kutunga babiro ya ke twadisaka kisalu ya Bambangi ya Yehowa na ntoto ya mvimba na Warwick. Banda pana, bo kumaka mpi kusala na Betele ya Patterson mpi ya Wallkill. Mpangi Jedele vandaka kusala na Biro ya Ke Talaka Kisalu ya Kutunga Bisika na Beto ya Lusambu mpi na Biro ya Ke Talaka Mambu ya Kuwakana ti Minganga. Na mars 2023, yandi kumaka nsadisi na Komite Sambu na Kisalu. Mpangi Jedele me lungisaka mikumba mingi na dibundu ya Yehowa. Yo yina, yandi ke tuba nde: “Kana bo me pesa nge mukumba mosi ya mpa, nge lenda mona nde nge ta kuka ve kulungisa yo. Kansi nge fwete tudila Yehowa ntima sambu yandi ta sadisa nge na kulungisa yo mbote-mbote.”

Mpangi Rumph butukaka na provense ya Californie na États-Unis. Ntangu yandi vandaka mwana-fioti, mama na yandi bwaka madidi na kimpeve. Kansi yandi salaka kaka bikesa ya kulonga mpangi Rumph mambu ya Biblia. Diaka, konso mvula mpangi Rumph vandaka kukwenda kutala nkaka na yandi ya nkento yina vandaka ti kimpeve ya mbote. Nkaka na yandi sadisaka yandi na kukuma kuzola kieleka. Yo yina ntangu yandi kumaka ti bamvula 13, yandi lombaka nde Bambangi ya Yehowa kukuma kulonguka ti yandi Biblia. Yandi bakaka mbotika na 27 septembre 1992 ntangu yandi vandaka leke. Diambu ya kiese kele nde mama na yandi vutukilaka mambu yonso ya kimpeve mpi papa na yandi ti bampangi na yandi bakaka mbotika.

Ntangu mpangi Rumph vandaka leke, yandi bakisaka nde bapasudi-nzila ke vandaka na kiese mingi. Yo yina ntangu yandi manisaka nzo-nkanda, yandi kumaka mupasudi-nzila na septembre 1995. Na 2000, yandi kwendaka na Équateur sambu mpusa ya bansamuni vandaka mingi kuna. Yandi kutanaka ti mpangi-nkento Inga yina vandaka mupasudi-nzila mpi katukaka na Canada. Na nima, bo kwelanaka. Bo kumaka kuzinga na mbanza mosi na Équateur yina vandaka ti kimvuka mosi ya bansamuni. Bubu yai, kimvuka yango me kumaka dibundu mosi ya nene.

Na nima, mpangi Rumph ti nkento na yandi kumaka bapasudi-nzila ya nene mpi na nima ya mwa ntangu yandi kumaka nkengi ya nziunga. Na 2011, bo kotaka na nzo-nkanda ya 132 ya Gileadi. Na nima ya kubaka maplome, bo salaka na bansi 5 mpi bo lungisaka mikumba mingi, mu mbandu bo salaka na Betele, bo salaka kisalu ya kimisionere mpi bo salaka kisalu ya nziunga. Mpangi Rumph kumaka mpi longi na Nzo-Nkanda ya Bansamuni ya Kimfumu.

Ntangu coronavirus yantikaka, bo vutulaka mpangi Rumph ti nkento na yandi na États-Unis. Bo bingaka bo na Betele ya Wallkill sambu mpangi Rumph kubaka formasio na Biro ya Ke Talaka Kisalu ya Bilanga. Na nima, bo vutulaka bo na Équateur mpi mpangi Rumph kumaka mpangi ya Komite ya Filiale. Na 2023 bo bingaka bo na Betele ya Warwick. Na janvier 2024, mpangi Rumph kumaka nsadisi na Komite Sambu na Kisalu. Mpangi Rumph me sadilaka Yehowa na bisika mingi. Yo yina yandi ke tuba nde: “Kana bo me tinda nge na kusala kisika mosi, kima ya kuluta mfunu kele ve kisika yina nge ke sala kansi bantu yina nge ke sala ti bo.”

Beto ke sepelaka mingi kibeni ti kisalu ya ngolo yina bampangi yai ke sala mpi beto fwete ‘landa kupesa bo lukumu.’​—Bafil. 2:29.