Monisa Ntonda Sambu na Kikalulu ya Yehowa ya Kukaba

YEHOWA kele Nzambi yina ke kabaka. (Yakobo 1:17) Bima yina yandi me gangaka ke monisaka kikalulu na yandi ya kukaba. Yandi me fulusaka bambwetete na zulu, mpi me tulaka banti ya kitoko na ntoto.—Nkunga 65:12, 13; 147:7, 8; 148:3, 4.

Nsoniki ya Nkunga 104 tondaka Yehowa mingi sambu na bima yonso yina yandi me gangaka; yo yina yandi sonikaka nkunga mosi ya kukumisa Yehowa. Ntangu nge ke tangaka nkunga yai, keti nge ke kudiwaka mpi bonso muyimbi-bankunga? Yandi tubaka nde: “Mono ta yimbila Yehowa luzingu na mono ya mvimba; mono ta yimba bankunga sambu na kukumisa Nzambi na mono ntangu yonso ya mono kele na luzingu.” (Nkunga 104:33) Keti nge ke zolaka mpi kusala bonso yandi?

MBANDU YA KULUTA NENE YA KUKABA

Yehowa ke zolaka nde beto landa mbandu na yandi ya kukaba. Yandi ke tendudilaka beto mpi sambu na nki beto fwete kaba. Mpeve santu sadisaka Polo na kusonika nde: “Longa bantu yina kele bamvwama na ngidika yai ya bima na kuvanda ve lulendo, mpi na kutula ve kivuvu na bo na bimvwama ya ke zingaka mingi ve, kansi na Nzambi yina ke pesaka beto mingi kibeni bima yonso yina beto kele na yo. Songa bo na kusala mambu ya mbote, na kuvanda bamvwama na bisalu ya mbote, na kukaba, na kuvanda ya kuyilama sambu na kukabila bankaka, na kudibumbila fondasio ya mbote sambu na bilumbu ke kwisa, sambu bo simba ngolo luzingu ya kieleka.”—1 Timoteo 6:17-19.

Na mukanda ya zole ya Bakorinto, Polo monisaka mabanza yina beto fwete vanda na yo ntangu beto ke kaba. Yandi tubaka nde: “Konso muntu kusala mutindu yandi me kana na ntima na yandi, ti kubokuta ve to sambu bo ke pusa yandi, sambu Nzambi ke zolaka muntu yina ke pesaka na kiese.” (2 Bakorinto 9:7) Kana beto ke kaba, nani ke bakaka mambote? Polo tubaka nde beto ke sadisaka bankaka ntangu beto ke pesaka bo yina bo kele na yo mfunu; ata mpidina, yo ke natilaka beto mosi mpi mambote sambu Yehowa ta sakumuna beto.—2 Bakorinto 9:11-14.

Polo tubilaka mpi nzikisa ya kuluta nene ya kikalulu ya Nzambi ya kukaba; yandi tubaka nde: “Beto pesa Nzambi matondo sambu na dikabu na yandi ya ofele yina beto lenda tendula ve.” (2 Bakorinto 9:15) Mambu yonso yina Yehowa ke pesaka beto na nzila ya Yezu kele na kati ya ‘dikabu ya ofele’ yina yandi me pesaka beto. Beto ta kuka ve kutendula valere ya makabu yai.

Inki mutindu beto lenda tonda Yehowa mpi Yezu sambu na mambu yonso yina bo me sadilaka beto mpi yina bo ta sadila beto? Mutindu mosi ya kutonda bo kele ya kupesa ntangu, ngolo mpi bima na beto ya kinsuni sambu na lusambu ya Yehowa mpi kusadisa bankaka na kuzaba Yehowa. Beto lenda sala yo ata beto kele ti bima fioti to mingi.—1 Bansangu 22:14; 29:3-5; Luka 21:1-4.

Mutindu Bantu Ya Nkaka Ke Pesaka Makabu Sambu Na Kisalu Yina Ke Salama Na Nsi-ntoto Ya Mvimba

Bubu yai bampangi mingi ke bumbaka mbongo sambu na kutula na bakesi ya makabu ya dibundu, kaka bonso Bakristu ya mvu-nkama ya ntete. (1 Bakorinto 16:2) Konso ngonda, mabundu ke tindaka makabu yina na biro ya filiale ya Bambangi ya Yehowa ya nsi na bo. Nge lenda tinda mpi mbala mosi makabu na nge na kimvuka mosi ya me zabanaka na nsiku yina Bambangi ya Yehowa ke sadilaka na nsi na beno. Sambu na kuzaba kimvuka yango, kota na site Internet www.pr418.com mpi binga to sonikila biro ya Bambangi ya Yehowa ya nsi na beno. Nge lenda pesa makabu yai:

MAKABU

Nge lenda tinda makabu na banki, na konti ya Bambangi ya Yehowa na nzila ya internet to ya ba karte ya banki. Na bansi ya nkaka, bantu lenda tinda mpi makabu na site Internet jw.org to na basite Internet ya nkaka.
Nge lenda pesa mpi babiju to bima ya nkaka ya mbalu kumosi ti mukanda yina ke monisa nde bima yina kele makabu ya luzolo.

KUDEFISA MBONGO

Nge lenda defisa kimvuka ya Bambangi ya Yehowa mbongo mpi kutuba nde bo ta vutudila nge yo konso ntangu yina nge me zola.
Sonika mukanda mosi ya ke tendula makabu ya mutindu yai.

MITINDU YA NKAKA YA KUPESA MAKABU

Awa na nsi, beto me tubila makabu ya nkaka yina muntu lenda pesa sambu na kupesa maboko na kisalu ya kulonga ya ke salama na ntoto ya mvimba. Na ntwala ya kupesa yo, binga to sonikila biro ya filiale ya nsi na beno sambu na kuzaba makabu yina bo ke ndimaka na kutadila nsiku ya leta. Konso nsi kele ti bampaku mpi bansiku na yo; yo yina na ntwala ya kupesa makabu yai, yula muntu mosi ya me zaba nsiku mbote.

Asiranse: Muntu lenda sonika zina ya kimvuka mosi ya me zabanaka na nsiku yina Bambangi ya Yehowa ke sadilaka sambu yo baka mbongo na yandi ya asiranse to ya pansio kana yandi me fwa.

Konti ya Banki: Na kutadila bansiku ya babanki ya nsi na beno, muntu lenda kangula konti na banki, to kupesa certificat de dépôt, to mbongo na yandi ya pansio na zina ya kimvuka mosi ya me zabanaka na nsiku yina Bambangi ya Yehowa ke sadilaka. Yandi lenda tuba mpi nde kimvuka yina ta baka mbongo na yandi kana yandi me fwa.

Nswa ya Kubaka Mbongo: Muntu lenda pesa kimvuka mosi ya me zabanaka na nsiku yina Bambangi ya Yehowa ke sadilaka nswa na yandi (titres et obligations) ya kubaka mbongo. Yandi lenda sonika mpi nde bo baka yo na nima ya lufwa na yandi.

Kupesa Lupangu to Nzo: Muntu lenda pesa lupangu to nzo na yandi bonso makabu na kimvuka mosi ya me zabanaka na nsiku yina Bambangi ya Yehowa ke sadilaka. Kana yandi ke zingaka na kati, yandi lenda sadila yo ntete tii ntangu yandi ta fwa.

Kupesa Makabu Yina Bo Ta Vutulaka Ndambu-Ndambu: Muntu lenda pesa mbongo to bima na yandi na kimvuka mosi ya me zabanaka na nsiku yina Bambangi ya Yehowa ke sadilaka mpi kulomba nde bo vutula yandi ndambu ya mbongo konso mvula ntangu yandi kele ntete na luzingu. Leta ta kulumusa ntalu ya mpaku yina yandi fwete futa banda na mvula yina yandi me pesa makabu yina.

Testama: Muntu lenda sonika mukanda ya kubaka difwa, yina nsiku ya leta ke ndimaka, sambu kimvuka mosi ya me zabanaka na nsiku yina Bambangi ya Yehowa ke sadilaka kubaka yo na nima ya lufwa na yandi. Leta ke kulumusaka mpaku yina yandi fwete futa sambu na bima yina.

Sambu na kuzaba mambu ya nkaka, nge lenda binga to kusonikila biro ya Bambangi ya Yehowa ya nsi na beno.