“Muntu ya Ke Kabaka Ta Baka Lusakumunu”

BANDA ntama makabu ke vandaka mfunu na lusambu ya kieleka. Bantu ya Izraele vandaka kupesa bimenga ya bambisi, mpi bubu yai beto ke pesaka mbala na mbala “kimenga ya lukumu.” Kansi kele ti makabu ya nkaka yina ke sepedisaka Nzambi mingi. (Baeb. 13:15, 16) Mutindu bambandu yai ya ke landa ke monisa yo, makabu yango ke natilaka bantu yina ke pesa yo kiese mpi balusakumunu.

Ana, nkento mosi ya kwikama ya ntangu ya ntama, vandaka kibeni na mfunu ya mwana-bakala kansi yandi vandaka kubuta ve. Ana songaka Yehowa na kisambu nde kana yandi buta mwana-bakala, yandi “ta pesa yandi na Yehowa bilumbu yonso ya luzingu na yandi.” (1 Sam. 1:10, 11) Na nima, Ana bakaka divumu mpi butaka mwana-bakala, yandi pesaka yandi zina Samuele. Ntangu Samuele yambulaka kunwa mabele, Ana nataka yandi na nzo-tenta, kaka mutindu yandi silaka. Yehowa sakumunaka Ana sambu na mpeve na yandi ya kuditambika. Ana butaka diaka bana tanu, mpi Samuele kumaka profete mpi nsoniki ya Biblia.—1 Sam. 2:21.

Bonso Ana ti Samuele, bubu yai beto lenda kudipesa ya mvimba na kusadila Nzambi. Yezu tubaka mpi nde Yehowa ta sakumuna mingi bibansa yonso yina beto ke salaka sambu na lusambu ya kieleka.—Mar. 10:28-30.

Na mvu-nkama ya ntete, Dorkasi, Mukristu mosi ya nkento, zabanaka mingi sambu yandi vandaka “kusala bisalu mingi ya mbote mpi kupesa bantu makabu mingi ya mawa” disongidila kukabila bantu ya nkaka. Kansi, diambu ya mawa kele nde “yandi belaka mpi fwaka,” mpi bampangi yonso na dibundu waka mpasi. Ntangu bo waka nde Piere vandaka na bwala mosi ya pene-pene, bampangi kwendaka kubinga yandi nswalu. Bo waka kiese mingi ntangu Piere kwisaka mpi futumunaka Dorkasi. Yo vandaka lufutumuku ya ntete yina bantumwa salaka. (Bis. 9:36-41) Nzambi vilaka ve mambu ya mbote yina Dorkasi salaka. (Baeb. 6:10) Nzambi me sonikaka na Biblia mambu ya mbote yina Dorkasi salaka sambu beto landa mbandu na yandi ya mbote.

Ntumwa Polo mpi kele mbandu ya mbote na yina me tala kukaba, yandi pesaka ntangu na yandi mpi vandaka kutudila bantu dikebi. Yandi sonikilaka bampangi ya Korinto nde: “Kansi mono, mono ta pesa na kiese mingi bima yonso ya mono kele na yo mpi mono ta kuditambika ya mvimba sambu na beno.” (2 Bak. 12:15) Polo bakisaka nde kana yandi kuditambika sambu na bantu ya nkaka, yandi ta baka mambote kansi kima ya kuluta mfunu kele nde Yehowa ta sakumuna yandi mpi ta ndima yandi.—Bis. 20:24, 35.

Ya kieleka, Yehowa ke sepelaka mingi kana beto ke sadila ntangu ti ngolo na beto sambu na mambote ya Kimfumu mpi sambu na kusadisa bampangi. Keti kele ti mitindu ya nkaka ya kupesa maboko na kisalu ya Kimfumu? Ee, katula ntangu ti ngolo, beto lenda pesa Yehowa lukumu ntangu beto ke pesa makabu ya mbongo. Dibundu ke sadilaka makabu yai sambu kisalu ya kusamuna kukwenda na ntwala, mu mbandu bo ke sadisaka bamisionere mpi bansadi ya nkaka ya ntangu yonso. Diaka, yo ke sadisaka na kusonika mikanda, kubalula yo mpi kusala bavideo, kusadisa bampangi yina kele na mpasi mpi kutunga Banzo ya Kimfumu. Ya kieleka, “muntu ya ke kabaka ta baka lusakumunu.” Diaka, bima ya ntalu ya beto ke pesaka ke kumisaka Yehowa.—Bing. 3:9; 22:9.

Mutindu Bantu ya Nkaka Ke Pesaka Makabu Sambu na Kisalu Yina Ke Salama na Nsi-ntoto ya Mvimba

Bubu yai bampangi mingi ke bumbaka mbongo sambu na kutula na bakesi ya makabu ya dibundu, mutindu Bakristu ya mvu-nkama ya ntete vandaka kusala. (1 Bak. 16:2) Konso ngonda, mabundu ke tindaka makabu yina na biro ya filiale ya Bambangi ya Yehowa ya nsi na bo. Nge lenda tinda mpi mbala mosi makabu na nge na kimvuka mosi ya me zabanaka na nsiku yina Bambangi ya Yehowa ke sadilaka na nsi na beno. Sambu na kuzaba kimvuka yango, kota na site Internet www.jw.org mpi binga to sonikila biro ya Bambangi ya Yehowa ya nsi na beno. Nge lenda pesa makabu yai:

MAKABU

Nge lenda tinda makabu na banki, na konti ya Bambangi ya Yehowa na nzila ya internet to ya ba karte ya banki. Na bansi ya nkaka, bantu lenda tinda mpi makabu na site Internet jw.org to na basite Internet ya nkaka.
Muntu lenda pesa mpi makabu ya bima ya nkaka mpi kusonika nde yo kele makabu yina yandi me pesa.

MITINDU YA NKAKA YA KUPESA MAKABU

Awa na nsi, beto me tubila makabu ya nkaka yina muntu lenda pesa sambu na kupesa maboko na kisalu ya kulonga ya ke salama na ntoto ya mvimba. Na ntwala ya kupesa yo, binga to sonikila Betele ya nsi na beno sambu na kuzaba makabu yina bo ke ndimaka na kutadila nsiku ya leta. Konso nsi kele ti bampaku mpi bansiku na yo; yo yina na ntwala ya kupesa makabu yai, yula muntu mosi ya me zaba nsiku mbote.
Asiranse mpi Mbongo ya Pansio: Muntu lenda sonika zina ya kimvuka mosi ya me zabanaka na nsiku yina Bambangi ya Yehowa ke sadilaka sambu yo baka mbongo na yandi ya asiranse to ya pansio kana yandi me fwa.

Konti ya Banki: Na kutadila bansiku ya babanki ya nsi na beno, muntu lenda kangula konti na banki mpi kubaka lukanu nde kana yandi me fwa, bo pesa mbongo yina na kimvuka mosi ya me zabanaka na nsiku yina Bambangi ya Yehowa ke sadilaka.

Nswa ya Kubaka Mbongo: Muntu lenda pesa kimvuka mosi ya me zabanaka na nsiku yina Bambangi ya Yehowa ke sadilaka nswa na yandi ya kubaka mbongo to kusonika nde bo ta bakaka mbongo na yandi na nima ya lufwa na yandi.

Kupesa Lupangu to Nzo: Muntu lenda pesa lupangu to nzo na yandi bonso makabu na kimvuka mosi ya me zabanaka na nsiku yina Bambangi ya Yehowa ke sadilaka. Kana yandi ke zingaka na kati, yandi lenda sadila yo ntete tii ntangu yandi ta fwa.

Bangogo “mitindu ya nkaka ya kupesa makabu” ke monisa nde makabu yai me swaswana ti makabu ya nkaka yina bantu ke pesaka, muntu ya ke pesa yo fwete kudibongisa na mutindu ya nkaka. Bantu mingi me pesaka makabu ya mutindu yai, yo me sadisaka mingi na bisalu ya ke salama na dibundu ya Yehowa mpi bisalu ya kusadisa bantu yina kele na mpasi. Bantu ya ke pesaka makabu yai ke bakaka mpi mambote mingi, leta ke kulumusaka kitansi yina lombaka nde bo futa.

Sambu na kuzaba mambu ya nkaka, kota na jw.org, tala na nsi ya lutiti, bweta na kisika bo me sonika “Pesa Makabu Sambu na Kisalu ya Ke Salama na Ntoto ya Mvimba.” Nge lenda binga mpi to kusonikila biro ya Bambangi ya Yehowa ya nsi na beno.