Mutindu Beto Lenda Lungisa Bampusa ya Bankaka

FRANÇOIS, nkuluntu mosi ya ke zingaka na insi ya kinsukami ke tuba nde: “Mubulu mosi basikaka na nima ya kusala voti sambu bantu sepelaka ve na mutindu yo salamaka mpi mubulu yina pusaka mafunda ya Bambangi ya Yehowa na kutina mpi kuyambula banzo na bo. Madia mpi bankisi vandaka mingi ve. Madia mpi bankisi fioti yina bikalaka kumaka ntalu mingi. Babanki kangamaka mpi bamasini yina bantu ke bakaka mbongo vandaka diaka ve ti mbongo to yo vandaka kusala ve.”

Kukonda kusukinina, bampangi ya biro ya filiale yantikaka kutindila bampangi yina tinaka na Banzo ya Kimfumu, mbongo mpi bima ya nkaka ya mfunu. Basoda yina vandaka kunwana kangaka nzila, kansi sambu bo zabaka nde Bambangi ya Yehowa ke kotaka ve na mambu ya politiki, mbala mingi bo vandaka kubika bakamio ya Betele na kuluta.

François ke tuba diaka nde: “Na nzila yina ke nata na Nzo ya Kimfumu, basoda yina bumbanaka yantikaka kubula kamio na beto masasi. Kansi, masasi vandaka kuluta na kati-kati na beto. Ntangu beto monaka soda mosi ke landa beto ntinu ti munduki, beto vutulaka kamio nima, balukaka mpi vutukaka nswalu na Betele. Beto pesaka Yehowa matondo sambu beto gulukaka. Kilumbu yina landaka, bampangi 130 yina vandaka na Nzo ya Kimfumu kwendaka na kisika ya nkaka ya lutaninu. Bankaka kwisaka na Betele, kisika beto lungisaka bampusa na bo ya kimpeve mpi ya kinsuni tii ntangu mubulu manaka.”

François ke yika nde: “Na nima, biro ya filiale bakaka mikanda mingi ya bampangi ya insi yina, ya kumonisaka ntonda na bo ya mingi. Lusadisu yina bampangi ya bansi ya nkaka pesaka, pusaka bo na kutudila Yehowa ntima ya mingi.”

Ntangu diambu mosi ya mpasi me bwa na kintulumukina to muntu kele na kisina na yo, beto fwete suka ve na kuzabisa bampangi nde: “Yotila tiya mpi dia mbote.” (Yak. 2:15, 16) Beto fwete sosa kulungisa bampusa na bo ya kinsuni. Mutindu mosi na mvu-nkama ya ntete, ntangu bo waka nde nzala ya ngolo vandaka kukwisa, “balongoki bakaka lukanu, konso muntu na kutadila yina yandi lendaka kupesa, na kutinda lusadisu na bampangi yina vandaka kuzinga na Yudea.”—Bis. 11:28-30.

Sambu beto kele bansadi ya Yehowa, beto ke vandaka ti luzolo ya kupesa lusadisu ya kinsuni na bantu yina kele na mfunu na yo. Kansi, bantu kele mpi na nzala ya kimpeve. (Mat. 5:3) Sambu na kusadisa bo na kuzaba mpusa yina mpi kusala bitambi sambu na kulungisa yo, Yezu pesaka balongoki na yandi ntuma ya kukumisa bantu balongoki. (Mat. 28:19, 20) Konso muntu na kati na beto ke pesaka ntangu, ngolo mpi bima ya nkaka sambu na kusala kisalu yina. Organizasio ya Yehowa ke sadilaka ndambu ya makabu yina bo ke bakaka sambu na kusadisa bantu na kinsuni, kansi beto fwete zaba nde makabu ke pesamaka ntete-ntete sambu na kunata mambote ya Kimfumu na ntwala mpi kumwanga nsangu ya mbote. Ntangu beto ke pesaka makabu, beto ke monisaka nde beto ke zolaka Nzambi mpi bamfinangani na beto.—Mat. 22:37-39.

Bantu yina ke pesaka makabu sambu na kupesa maboko na kisalu ya Bambangi ya Yehowa na nsi-ntoto ya mvimba lenda ndima nde, bampangi ke sadilaka makabu na bo na mutindu ya mbote kibeni. Keti nge lenda sadisa bampangi yina kele na mfunu ya lusadisu? Keti nge ke zola kupesa maboko na kisalu ya kukumisa bantu balongoki? Kana mpidina, ‘kubuya ve kusala mambote na bantu yina fwete baka yo, ntangu diboko na nge kele na ngolo ya kusala yo.’—Bing. 3:27.

MUTINDU BANTU YA NKAKA KE PONAKA KUPESA MAKABU NA KISALU YINA KE SALAMA NA NSI-NTOTO YA MVIMBA

Bonso na bilumbu ya ntumwa Polo, bubu yai bampangi mingi ‘ke tulaka kima mosi na lweka’ to ke bumbaka mwa mbongo mpi bo ke tulaka yo na bakesi ya makabu ya dibundu yina bo me sonikaka nde: “Kisalu Yina Ke Salama na Nsi-Ntoto ya Mvimba.” (1 Bak. 16:2) Konso ngonda, mabundu ke tindaka makabu yina na biro ya filiale ya Bambangi ya Yehowa ya insi na bo. Muntu lenda tinda mpi makabu ya mbongo mbala mosi na Association Sans But Lucratif “Les Témoins de Jéhovah,” 75, 13^e Rue, Industriel, Limete-Kinshasa, République Démocratique du Congo, to na biro ya filiale yina ke talaka mambu ya insi na bo. Ba chèque yina beno ke tinda na adresi yai fwete vanda na zina ya “Association ‘Les Témoins de Jéhovah.’” Muntu lenda pesa mpi babijou to bima ya nkaka ya mbalu kumosi ti mukanda yina ke monisa nde bima yina kele makabu.

KUDEFISA MBONGO
- Muntu lenda defisa “Association ‘Les Témoins de Jéhovah’” mbongo sambu na kisalu ya kusamuna ya ke salama na nsi-ntoto ya mvimba. Kansi, konso ntangu yina yandi ta lomba mbongo na yandi, bo ta vutudila yandi yo. Sambu na kuzaba mambu ya nkaka, sonikila “Association ‘Les Témoins de Jéhovah’” na adresi yina kele na zulu to binga na 0998189791 to na 0815551000.
MITINDU YA NKAKA YA KUPESA MAKABU

Katula kupesa makabu ya mbongo, muntu lenda pesa makabu na mitindu ya nkaka sambu kisalu ya Kimfumu ya ke salama na nsi-ntoto ya mvimba kukwenda na ntwala. Mu mbandu:

Asiranse: Muntu lenda sonika zina ya “Association ‘Les Témoins de Jéhovah’” sambu yo baka mbongo na yandi ya asiranse to ya pansio kana yandi me fwa.

Kukangula Konti na Banki: Muntu lenda kangula konti na banki, kupesa certificat de dépôt, to kukangula konti na banki sambu na mbongo na yandi ya pansio na zina ya “Association ‘Les Témoins de Jéhovah,’” to kutula zina ya “Association ‘Les Témoins de Jéhovah’” sambu yo baka mbongo na yandi kana yandi me fwa, na kutadila bansiku ya banki ya insi na yandi.

Nswa ya Kubaka Mbongo: Nge lenda pesa “Association ‘Les Témoins de Jéhovah’” nswa ya kubaka mbongo (titres et obligations) bonso makabu to kupesa “Association ‘Les Témoins de Jéhovah’” nswa ya kubaka yo na nima ya lufwa na nge.

Kupesa Lupangu to Nzo: Muntu lenda pesa lupangu to nzo na yandi bonso makabu, to kana yo kele nzo yina yandi ke zinga, yandi ta vanda ti nswa ya kusadila yo ntangu yandi kele ntete na luzingu. Na ntwala ya kupesa bima ya mutindu yina, nge fwete zabisa biro ya Bambangi ya Yehowa ya insi na beno.

Kutula Mbongo na Banki Yina Ta Basisa Matabisi: Muntu lenda tula mbongo na banki to kupesa mikanda bonso kipiku na zina ya kimvuka mosi yina Bambangi ya Yehowa ke sadilaka. Na nima, muntu yina yandi mosi to muntu ya nkaka yina yandi me pona ta yantikaka kubaka konso mvula matabisi yina mbongo yango ta basisaka. Leta ta kulumusa ntalu ya mpaku yina yandi fwete futa na mvula yina yandi me pesa makabu yina.

Testama: Muntu lenda pesa “Association ‘Les Témoins de Jéhovah’” bima to nzo to mbongo na mukanda ya kubaka difwa yina me ndimama na nsiku ya leta, to yandi lenda pesa “Association ‘Les Témoins de Jéhovah’” nswa ya kubaka bima yina yandi ta yambula. Kana muntu me sala mukanda sambu na kupesa dibundu nswa ya kubaka bima na yandi ntangu yandi ta fwa, Leta lenda kulumusa mpaku yina yandi fwete futa sambu na bima yina.

Bangogo “mitindu ya nkaka ya kupesa makabu” ke monisa nde muntu yina ke pesa makabu ya mutindu yina fwete baka bangidika ya nkaka.

Sambu na kuzaba mambu ya nkaka, nge lenda binga na telefone to kusonikila “Association ‘Les Témoins de Jéhovah’” na adresi yina kele awa na nsi to kukwenda na biro ya filiale ya insi na nge.

BIRO YA FILIALE

“Association ‘Les Témoins de Jéhovah’”

B.P. 634, 75, 13e Rue Limete-Kinshasa,

République Démocratique du Congo.

Telefone: 09 98 18 97 91 to 081 555 1000