“Kwikila na Yezu”—Keti Nge Fwete Suka Kaka na Kukwikila na Yezu Sambu na Kugulaka?
Mvutu ya Biblia
Bakristu ke kwikilaka nde Yezu fwaka sambu na masumu ya bantu. (1 Piere 3:18) Kansi, sambu na kuguluka nge fwete suka kaka ve na kukwikila nde Yezu kele ngulusi na beto. Bademo ke zabaka nde Yezu kele “Mwana ya Nzambi,” ata mpidina bo ta guluka ve kansi bo ta fwa.—Luka 4:41; Yude 6
Inki mono fwete sala sambu na kuguluka?
Nge fwete kwikila nde Yezu pesaka luzingu na yandi sambu na masumu na beto. (Bisalu 16:30, 31; 1 Yoane 2:2) Disongidila, nge fwete ndima nde Yezu vandaka muntu ya kieleka mpi nde mambu yonso yina Biblia ke tubaka sambu na yandi kele ya masonga.
Longuka mambu yina Biblia ke tubaka mpenza. (2 Timoteo 3:15) Biblia ke tuba nde ntumwa Polo mpi Silasi songaka muntu mosi yina vandaka kukengila boloko nde: “Kwikila na Mfumu Yezu, ebuna nge ta guluka.” Na nima, bo yantikaka kulonga muntu yina “ndinga ya Yehowa.”a (Bisalu 16:31, 32) Yo ke monisa nde muntu yina vandaka kukengila boloko lendaka ve kukwikila na Yezu kana yandi bakisaka ve malongi ya Ndinga ya Nzambi yina yo ke lombaka nde muntu kuzaba ntete. Yo lombaka nde yandi zaba mbote-mbote mambu yina Biblia ke longaka.—1 Timoteo 2:3, 4.
Balula ntima. (Bisalu 3:19) Nge fwete balula ntima to kuwa mawa ya ngolo sambu na mambu ya mbi yina nge vandaka kusala ntete. Bantu ya nkaka ta mona nde nge me balula ntima ntangu nge ke yambula kusala mambu yina Nzambi ke buyaka mpi nge ke ‘sala bisalu yina ke monisa nde nge me balula ntima.’—Bisalu 26:20.
Baka mbotika. (Matayo 28:19) Yezu tubaka nde bantu yina ke kuma balongoki na yandi fwete baka mbotika. Muntu yina vandaka kutanina boloko ya beto me katuka kutubila bakaka mpi mbotika. (Bisalu 16:33) Diaka, ntangu ntumwa Piere longaka bantu mingi kieleka ya me tala Yezu, “bantu yina ndimaka ndinga na yandi na kiese yonso bakaka mbotika.”—Bisalu 2:40, 41.
Sala mambu yina Yezu tubaka. (Babreo 5:9) Bantu yina ke ‘zitisaka mambu yonso’ yina Yezu songaka beto na kusala ke monisaka na luzingu na bo ya mvimba nde bo kele balongoki ya Yezu. (Matayo 28:20) Bo ke kumaka “bantu yina ke lemfukaka na ndinga kansi bawi mpamba ve.”—Yakobo 1:22.
Kanga ntima tii na nsuka. (Marko 13:13) Balongoki ya Yezu “kele ti mfunu ya kukanga-ntima” sambu na kuguluka. (Baebreo 10:36) Mu mbandu, ntumwa Polo lemfukaka mbote-mbote na mambu yonso yina Yezu longaka mpi yandi kangamaka kaka na Nzambi. Yandi kangaka ntima banda na kilumbu yina yandi kumaka Mukristu tii ntangu yandi fwaka.—1 Bakorinto 9:27.
Inki beto lenda tuba sambu na “Kisambu ya Muntu ya Masumu”?
Na mabundu ya nkaka bantu ke salaka bisambu bonso “Kisambu ya muntu ya masumu” mpi “Kisambu ya Luguluku.” Na bisambu yai bo ke ndimaka nde bo kele bantu ya masumu mpi bo ke tubaka nde Yezu fwaka sambu na masumu na bo. Bo ke lombaka Yezu na kukota na bantima na bo mpi na kusadisa bo na luzingu. Kansi Biblia kele ve ti bisambu ya mutindu yai. Diaka, ata kisika mosi ve Biblia ke lombaka beto na kusala “Kisambu ya Muntu ya Masumu.”
Bantu mingi ke yindulaka nde na nima ya kusala “Kisambu ya Muntu ya Masumu” bo ta guluka dibela. Kansi ata muntu mosi ve ta guluka kaka sambu yandi me sala kisambu mosi buna. Sambu beto kele bantu ya masumu beto ke landaka kusala masumu. (1 Yoane 1:8) Yo yina, Yezu longaka balongoki na yandi na kusambaka mbala na mbala sambu na kulomba ndolula ya masumu. (Luka 11:2, 4) Diaka, bakristu ya nkaka yina zolaka kuguluka mvula na mvula ta guluka diaka ve sambu bo bikisaka kusadila Nzambi.—Baebreo 6:4-6; 2 Piere 2:20, 21
“Kisambu ya Muntu ya Masumu” me katukaka na wapi?
Bantu ya istware ke tubaka mambu ya mutindu na mutindu na yina me tala kisina ya “Kisambu ya Muntu ya masumu.” Bantu ya nkaka ke tubaka nde kisambu yai yantikaka ntangu dibundu ya Misioni basikaka. Bankaka ke ndimaka nde bantu ya mabundu ya bamvu 1700 mpi 1800 bantu yantikaka kusala “Kisambu ya Muntu ya Masumu.” Ata mpidina Biblia ke lombaka beto ve na kusala “Kisambu ya Muntu ya Masumu.” Nkutu yo ke tubaka nde yo kele mbote ve na kuvutukilaka kisambu mosi mbala na mbala.
a Yehowa kele zina ya Nzambi mutindu Biblia ke monisaka yo.