Inki Biblia Ke Tuba na Yina Me Tala Kufwa Bantu na Masasi na Nzo-Nkanda?

Na Kizole 24 mai 2022, diambu mosi ya mpasi kibeni salamaka na Uvalde na Texas na États-Unis. Zulunalu mosi (The New York Times) tubaka nde: “Muntu mosi ya vandaka ti munduki fwaka bana 19 ya nzo-nkanda mpi balongi zole . . . na Ekole Primere Robb.”

Diambu ya mawa kele nde mambu ya mpasi ya mutindu yai me kuma kusalama mbala na mbala. Zulunalu mosi (USA Today) tubaka nde na États-Unis mpamba, “bantu fwaka bantu ya nkaka 249 na baekole na mvula ya me luta. Ntalu yai me luta bantalu yonso yina bo me fwaka bantu na masasi na baekole banda 1970.”

Sambu na nki mambu ya mpasi mutindu yai ke salama? Inki mutindu beto lenda kanga ntima na mambu ya mbi ya mutindu yai? Keti beto kele ti kikuma ya kundima nde kilumbu kele mubulu ta mana? Biblia ke pesa bamvutu na bangiufula yai.

Sambu na nki mubulu ke kuma mingi na nsi-ntoto?

• Biblia ke bingaka nsungi yai ya beto ke zinga nde “bilumbu ya nsuka,” mpi na ntangu yai bantu mingi ta “zolaka ve bantu ya nkaka” mpi bo ta vanda “bantu ya nku,” disongidila nde bo ta sala mambu ya nku mpi ya mubulu. Bantu yina ta monisa bikalulu yai “ta salaka diaka mbi kuluta.” (2 Timoteo 3:1-5, 13) Sambu na kuzaba mambu mingi, tanga disolo “Keti Biblia Tubilaka Dezia Mambu Yina Bantu Ke Yindula mpi Ke Sala Bubu Yai?”

Bantu mingi ke kudiyula nde, ‘Sambu na nki Nzambi ke bika nde mambu ya mpasi bonso kufwa bantu na nzo-nkanda kusalama?’ Sambu na kuzaba mvutu yina Biblia ke pesa, tanga disolo “Sambu na Nki—Mambu ya Mbi Ke Bwilaka Bantu ya Mbote?”

Inki mutindu beto lenda kanga ntima na mambu ya mbi ya mutindu yai?

• “Mambu yonso ya bo sonikaka ntama, bo sonikaka yo sambu na kulonga beto, sambu na nzila ya kukanga-ntima mpi ya kulembika yina ke katukaka na Masonuku beto vanda ti kivuvu.”—Baroma 15:4.

Bandongisila ya kele na Biblia lenda sadisa nge na kukanga ntima na mubulu yina me fuluka na ntoto. Sambu na kuzaba mambu mingi, tala zulunalu Telama! ya kele ti ntu-diambu “La violence cessera-t-elle un jour?”

Sambu na kuzwa bandongisila na yina me tala mutindu bibuti lenda sadisa bana na bo na kukanga ntima na mambu ya ke pesa boma ya bo me tala to me wa na bansangu, tanga disolo “Enfants et actualités troublantes.”

Keti kilumbu kele mubulu ta mana?

• “Yandi ta gulusa bo na bampasi mpi na mubulu.”—Nkunga 72:14.

• “Bo ta kumisa bambele na bo ya bitumba bima ya kubundudila ntoto mpi bo ta kumisa makonga na bo bakupu-kupu. Dikanda mosi ta nangula ve mbele ya bitumba sambu na kunwanisa dikanda ya nkaka, bo ta longuka mpi diaka ve bitumba.”—Mika 4:3.

Nzambi ta sala mambu yina bantu ke kuka ve kusala. Kimfumu na yandi yina kele na zulu ta katula minduki yonso mpi ta manisa mubulu. Sambu na kuzaba mambu mingi yina Kimfumu ya Nzambi ta sala, tanga disolo “Na Nsi ya Kimfumu ya Nzambi ‘Ngemba Ta Kuma Mingi’.’”