Mubulu ya Kufwa Bantu na Masasi na Ntoto ya Mvimba Ke Pesa Mpasi—Inki Biblia Ke Tuba?

Na juillet 2022, mambu ya mubulu ya kufwa bantu na masasi salamaka na ntoto ya mvimba mpi yo ke pesa mpasi:

• Zulunalu mosi (The Japan Times) tubaka na Lumingu 10 juillet 2022 nde: “Lufwa na masasi ya muntu mosi ya politiki ya Japon yina me zabanaka mingi [Shinzō Abe yina vandaka ntete premier ministre] pesaka bantu ya insi Japon mpasi mingi mpi yo yitukisaka bantu na ntoto ya mvimba, mingi-mingi sambu mubulu ya kufwa bantu ke salamaka ve mingi na Japon mpi sambu Japon ke vandaka ti bansiku ya ngolo ya ke buyisaka bantu na kuvanda ti minduki.”

• “Kimvuka mosi (Agence Reuters) pesaka nsangu yai na Kintete 4 juillet 2022: “Insi Danemark kele na mpasi sambu muntu mosi me fwa bantu tatu na masasi na zandu mosi ya nene na mbanza Copenhague.”

• Zulunalu mosi (The Guardian) tubaka na Lumingu 10 juillet 2022 nde: “Na Afrique du Sud kimvuka mosi ya bantu yantikaka kubula bantu ya nkaka masasi mpi bo fwaka bantu 15 na bar mosi na Soweto.”

• Shene mosi ya televizio (CBS News) pesaka nsangu yai na Kizole 5 juillet 2022: “Na États-Unis, bantu ya mubulu me fwa bantu kuluta 220 na masasi na mposo ya 4 juillet yina bantu ya États-Unis ke vandaka na konzie.”

Keti kilumbu kele mubulu ya mutindu yai ta mana? Inki Biblia ke tuba?

Nsuka ya Mubulu

Biblia ke bingaka ntangu yai ya beto ke zinga nde “bilumbu ya nsuka.” Yo kele ntangu yina bantu ta salaka mpenza mambu ya nku mpi bo ta wilaka ve bantu mawa. (2 Timoteo 3:1, 3) Mambu ya mubulu ya mutindu yai ke sala nde bantu kukuma kuzinga na boma. (Luka 21:11) Kansi, Biblia ke tuba nde kilumbu kele mubulu ta mana mpi “bantu . . . ta zinga na kisika ya ngemba, na bisika ya kuzinga ya lutaninu mpi na bisika ya kupema ti ya pima.” (Yezaya 32:18) Inki mutindu mubulu ta mana?

Nzambi ta fwa bantu ya mbi mpi yandi ta bebisa minduki yonso.

• “Kansi bantu ya mbi, bo ta katula bo na ntoto.”—Bingana 2:22.

• “[Nzambi] ke sukisa bitumba na ntoto ya mvimba. Yandi ke buka munduki ya tolo-tolo mpi dikonga; yandi ke yoka bapusu-pusu ya basoda na tiya.”—Nkunga 46:9.

Nzambi ta longa bantu na kuzinga na ngemba sambu na kumanisa mubulu.

• “Bo ta sala ata mbi mosi ve mpi ta bebisa ata kima mosi ve na ngumba na mono yonso ya santu, sambu ntoto ta fuluka kibeni ti nzayilu ya Yehowa mutindu bamasa ke fulusaka nzadi-mungwa.”—Yezaya 11:9.

• Ata bubu yai mpi, Nzambi ke longaka bantu na ntoto ya mvimba na kuyambula kusadila minduki, na kubika mubulu mpi na ‘kukumisa bambele na bo ya bitumba bima ya kubundudila ntoto.’—Mika 4:3.

Sambu na kuzaba mambu mingi ya Biblia ke tubaka sambu na nsi-ntoto yina bantu ta zingaka kukonda boma, tanga tanga disolo “ Affranchis de la peur : est-ce possible ? ”

Sambu na kuzaba mambu mingi ya ke monisa mutindu Nzambi ta manisa mubulu dibela, tanga disolo “ Enfin la paix sur la terre ! ”