2022: Mvula Mosi ya Mavwanga Mpenza—Inki Biblia Ke Tuba?

Na mvula yai 2022, ntangu yonso beto ke wa bansangu ya bitumba, mpasi ya mbongo mpi ya mambu ya mbi yina ke kumina ntoto kisika ya beto ke zinga. Biblia mpamba ke tubaka kikuma yina ke sala nde mambu kusalama mutindu yai.

Kikuma yina ke sala nde mambu yai kusalama na 2022

Mambu yina salamaka na mvula me luta ke monisa pwelele nde beto ke zinga na bilumbu yina Biblia ke bingaka “bilumbu ya nsuka.” (2 Timoteo 3:1) Bilumbu yai ya nsuka yantikaka na 1914. Sesepi yai, tala mutindu mambu ya me katuka kusalama ke monisa kibeni nde mambu yina Biblia tubaka na ntwala kele na kusalama:

“Bitumba.”—Matayo 24:6.

• “Mvula 2022 me vanda Mvula yina bantu ya Eropa me wa diaka mpasi ngolo yina bitumba ke nataka.”a

“Nzala.” —Matayo 24:7.

• “2022: Me vanda mvula mosi ya nzala mingi mpenza.”b

“Kipupa.”—Luka 21:11.

• “Kimbefo ya buka-buka, maladi yina ke basisaka bantu bambuma ya nene na nitu (variole du singe) mpi COVID-19 ke landa kupesa bantu mpasi. Mambu yai me monisa kibeni nde bamaladi yina ke sambukilaka bantu kele kigonsa ya nene mpi nde bantu kele ve ti ngolo ya kumanisa yo.”c

“Mambu ya ke pesa boma.”—Luka 21:11.

• “Ntangu ya ngolo kibeni, kukonda mvula, bamfinda ke pela tiya mpi bamvula ya ngolo. Na nsungi ya mvula na 2022, mambu mingi ya mpasi me salama yina bantu ta vilaka ve. Bantu mingi kibeni fwaka mpi bantu mingi ya nkaka na ntoto ya mvimba vidisaka banzo na bo.”d

“Mavwanga [to, “mubulu; kukolama,” noti na nsi ya lutiti.].”—Luka 21:9.

• “Sambu mpasi ya mbongo pesaka bantu makasi, mingi-mingi sambu bima mataka ntalu, bantu basikaka mingi na banzila sambu na kutelemina baluyalu na 2022.”e

Inki ta salama na mvula ya mbasi?

Ata muntu mosi ve me zaba kibeni mambu yina ta salama na 2023. Kansi kima ya beto me zaba kele nde ntama mingi ve, Kimfumu ya Nzambi to guvernema ya zulu ta nata nsoba ya nene na ntoto. (Daniele 2:44) Guvernema yango ta katula mambu yonso yina ke salaka nde bantu kumona mpasi mpi yo ta lungisa luzolo ya Nzambi na ntoto.—Matayo 6:9, 10.

Beto ke lomba beno na kusadila ndongisila ya Yezu Kristu mpi na ‘kulanda kukengila’ sambu na kumona mutindu mambu ya ke salama na ntoto ke lungisa mambu yina Biblia tubaka na ntwala. (Marko 13:37) Kana mpila kele, sosa beto sambu nge longuka mambu mingi. Disongisila, nge zaba mutindu Biblia lenda sadisa nge bubu yai mpi mutindu yo lenda pesa nge ti dibuta na nge kivuvu ya kuvanda ti luzingu ya mbote kibeni na bilumbu ke kwisa.