Tiya Me Kuma Mingi na Ntoto ya Mvimba—Inki Biblia Ke Tuba?

Na ngonda ya juillet 2022, tiya kumaka mingi na ntoto ya mvimba na mutindu yina yo me salamaka ntete ve:

• Shene mosi ya televizio (CNN Wire Service) tubaka na Kintete 25 juillet 2022 nde: “Sambu na mbala ya zole na ngonda yai, bamfumu ya Chine ke songa bantu nde tiya ta kuma diaka mingi na bambanza kiteso ya 70.”

• Zulunalu ya nkaka (The Guardian) tubaka na Lumingu 17 juillet 2022 nde: “Mutindu tiya ke kuma mingi kuluta mutindu yo vandaka ntete na Eropa ya mvimba, yo me sala nde tiya kupela ngolo kibeni na bamfinda ya bansi mingi.”

• Zulunalu ya nkaka diaka (The New York Times) tubaka na Lumingu 24 juillet 2022 nde: “Na Lumingu, tiya vandaka mingi na bambanza mingi na États-Unis na mutindu yina yo me salamaka ntete ve. Tiya yango vandaka na bambanza yina kele na Esti, na bisika ya nkaka na Sudi mpi na nziunga yina bo ke bingaka Midwest.”

Mambu yai yonso ke tendula inki? Keti na bilumbu ke kwisa bantu ta kuka diaka ve kuzinga na ntoto? Inki Biblia ke tuba?

Keti Biblia tubaka na ntwala nde tiya ta vanda mingi mpidiyai?

Ee. Tiya ya mingi yina bantu ke wa na ntoto ya mvimba ke wakana ti mambu yina Biblia tubaka nde yo ta salama na bilumbu na beto. Mu mbandu, Yezu tubaka dezia nde beto ta mona “mambu yina ke pesaka bantu boma” to “bidimbu ya nene.” (Luka 21:11, Bible en Kituba) Mutindu tiya me kuma ngolo, bantu mingi ke banga nde mambu yina bantu ke sala ta sala nde bantu kukuka diaka ve kuzinga na ntoto.

Bantu ta zinga diaka ve na ntoto?

Ve. Nzambi salaka ntoto sambu bantu kuzinga mvula na mvula. (Nkunga 115:16; Longi 1:4) Yandi ta bika ve nde bantu kubebisa ntoto. Nkutu yandi me tubaka nde yandi ta ‘bebisa bantu yina ke bebisaka ntoto.’—Kusonga 11:18.

Tala mambu zole yina Nzambi me tubaka nde yo ta salama ya ke monisa mambu yina yandi me tubaka nde yandi ta sala sambu na ntoto:

• “Ntoto-makanga ti ntoto ya kuyuma ta vanda na kiese, mpi ntoto ya zelo na zelo ta yangalala mpi ta basisa bintuntu bonso safrani.” (Yezaya 35:1) Nzambi ta bika ve ntoto kukuma ntoto ya zelo na zelo kisika yina ata kima mosi ve lenda zinga. Kansi yandi ta yidika bisika yina me bebaka.

• “Nge ke kebaka ntoto, nge ke salaka nde yo buta mingi kibeni mpi nde yo kuma ti kimvwama mingi.” (Nkunga 65:9) Nzambi ta kumisa ntoto paladisu.

Sambu na kuzaba mambu mingi na yina me tala mutindu kusoba ya climat ke lungisa mambu yina Biblia tubaka na ntwala, tanga disolo “Climat ya Ke Soba mpi Luzingu na Beto na Bilumbu Ke Kwisa—Biblia Ke Tuba Inki Sambu na Yo?”

Sambu na kuzaba mambu mingi na yina me tala mambu ya Biblia tubaka nde mambu ya ntoto ta bonga, tanga disolo “Nani Ta gulusa Ntoto?”