Kukonda Mvula—Inki Biblia Ke Tuba?

Zulunalu mosi (The Guardian) tubaka na Kitatu 7 septembre 2022 nde: “Insi Chine ke monisa nde mvula yai me vanda mvula mosi ya kuluta tiya (chaleur) mpi été ya tatu ya kuluta kuyuma yina me salamaka ntete ve.”
Televizio mosi (UN News) tubaka na Kitanu 26 août 2022 nde: “Sambu na bamvula tanu ya kulandana, bansungi ya kuyuma ta vanda mingi na bisika ya nkaka ya Afrika.”
Televizio ya nkaka (BBC News) tubaka na Kizole 23 août 2022 nde: “Nsungi ya kuyuma me simba bansi mingi kibeni ya Eropa mpi yo ke monana nde yo ta vanda nsungi ya kuyuma ya kuluta ngolo banda bamvula 500.”

Bantu mingi ya mayele ke tuba na ntwala nde bansungi yai ya kuyuma ta landa kusalama mpi nkutu nde yo ta kuma kusalama diaka mingi kuluta. Keti kivuvu kele sambu na bilumbu ke kwisa? Inki Biblia ke tuba?

**Kukonda mvula (sécheresse) mpi mambu yina Biblia me tubaka**

Biblia tubaka dezia nde na bilumbu na beto:

“Nzala ti kipupa ta vanda na bisika ya mutindu na mutindu.”—Luka 21:11.

Kana mvula ke noka ve, mbala mingi yo ke salaka nde nzala kukota. Kukonda bima ya kudia, bampasi mpi lufwa yina yo lenda nata, ke lungisa mambu yina Biblia me tubaka na ntwala.—Kusonga 6:6, 8.

Sambu na nki bansungi ya kuyuma ke kuma kaka mingi?

Biblia ke monisa kikuma ya siki-siki yina ke sala nde bansungi ya kuyuma kukuma kaka mingi. Yo ke tuba nde:

“Muntu yina ke tambula kele ve ti kiyeka ya kutwadisa kitambi na yandi mosi.”—Yeremia 10:23.

Yo ke tendula nde bantu lenda kuka ve ‘kutwadisa bitambi na bo’ disongidila, kudiyala. Mbala mingi balukanu ya mbi ya bo ke bakaka ke nataka bansungi ya kuyuma mpi mpasi ya masa.

Bantu mingi ya siansi ke ndimaka nde bisalu yina bantu ke salaka me nataka tiya ya mingi na ntoto. Yo me salaka nde ntoto kukuma ti bansungi mingi ya kuyuma.
Mambu yina bantu ya bwimi ke sala mpi bansiku yina bantu ke tula kukonda kuyindula bilumbu ke kwisa ke bebisa bamfinda, mupepe mpi ke pusa na kusadila na mutindu ya mbi bima ya kele na ntoto. Yo lenda sala nde bima yina ke pesaka beto masa kuvanda na kigonsa.

Kansi Biblia ke pesa beto kivuvu.

Keti kivuvu kele sambu na bilumbu ke kwisa?

Biblia ke tuba nde Nzambi ta manisa mpasi ya masa ya beto ke mona bubu. Inki mutindu?

1. Nzambi ta ‘bebisa bantu yina ke bebisaka ntoto.’ (Kusonga 11:18) Yandi ta katula kima yina ke salaka nde masa kukuma mpasi disongidila, yandi ta katula bantu ya mbi mpi ya bwimi yina ke salaka mambu yina ke bebisaka ntoto, bamasa, mupepe mpi buna na buna.—2 Timoteo 3:1, 2.
2. “Ntoto ya me yuma na mwini ta kuma dizanga ya masa ya me fuluka ti balukengi.” (Yezaya 35:1, 6, 7) Nzambi ta yidika mambu yonso ya ke salaka nde mvula kunoka ve mpi yandi ta kumisa ntoto yai paladisu mosi ya ta vandaka ti masa mingi.
3. “Nge ke kebaka ntoto, nge ke salaka nde yo buta mingi kibeni mpi nde yo kuma ti kimvwama mingi.” (Nkunga 65:9) Nzambi ta sakumuna ntoto mpi yo ta fuluka ti madia mpi masa ya bunkete sambu na bantu yonso.