Keti Yo Kele ti Guvernema Mosi ya Mambu Ke Salamaka Mbote Sambu na Kuyala Ntoto?​—Inki Biblia Ke Tuba?

Mambu mingi ya ke pesa mpasi ke salama na baguvernema na ntoto ya mvimba. Yo vanda na bansi yina yo ke monanaka nde mambu ke salamaka mbote, baguvernema na yo me nikana sambu na muyibi, bavoti, kukonda kuwakana na kati ya bantu ya politiki mpi bamavwanga ya bantu ke nata.

Biblia ke tuba nde yo kele ti guvernema mosi yina mambu na yo ke salama mbote. Mbala ya nkaka, nge me waka dezia bo ke tubila guvernema yango yina. Yo kele guvernema yina Yezu tubilaka na kisambu yina yandi pesaka bonso mbandu.

• “Beno fwete samba mutindu yai: “‘Tata na beto yina kele na zulu, zina na nge kuvanda ya santu. Kimfumu na nge kukwisa. Luzolo na nge kusalama na ntoto, bonso na zulu.’”​—Matayo 6:9, 10.

Inki Biblia ke tuba sambu na Kimfumu yina?

Kimfumu—guvernema mosi ya mambu ke salama mbote

Kimfumu yina ke yala na zulu.

• Yezu bingaka guvernema yina “Kimfumu ya zulu.” (Matayo 4:17; 5:3, 10, 19, 20) Beto ke bakisa sesepi mbote ntangu yandi tubaka nde: “Kimfumu na mono kele ve ya nsi-ntoto yai.”

Kimfumu yina ta katula baguvernema yonso ya bantu.

• Biblia ke tuba nde: “Kimfumu yina . . . bedisa mpi ta sukisa bimfumu yina yonso [ya bantu], mpi yo mpamba ta bikala kimakulu.”​—Daniele 2:44.

Ata muntu mosi ve ta fwa Kimfumu yina ya Yezu Kristu ta vanda Ntotila.

• Biblia ke tuba nde: “Luyalu na yandi kele luyalu ya mvula na mvula yina ta luta ve, mpi bo ta fwa ve kimfumu na yandi.”​—Daniele 7:13, 14.

Kimfumu yina ta tula ngemba na ntoto mpi yo ta sala bantu yonso kuvanda na lutaninu.

• Biblia ke tuba nde: “Konso muntu ta zinga na ngemba na bilanga na yandi ya vinu ti ya bafige; ata muntu mosi ve ta kwisa kupesa yandi boma.”​—Mika 4:4, Bible en Kituba.

Sosa kuzaba mambu mingi na yina me tala Kimfumu yina

Ntangu Yezu vandaka awa na ntoto, yandi sadilaka ntangu na yandi ya mingi sambu na “kusamuna nsangu ya mbote ya Kimfumu.” (Matayo 9:35) Yandi tubaka mpi dezia nde:

• “Bo ta samuna nsangu yai ya mbote ya Kimfumu na ntoto ya mvimba sambu na kuta kimbangi na makanda yonso, ebuna nsuka ta kwisa.”​—Matayo 24:14.

Bubu yai, bo ke longa nsangu ya mbote ya Kimfumu yango na bansi kuluta 240. Beto ke lomba nge na kusosa kuzaba mambu mingi na yina me tala guvernema yina mpi mambu ya nge fwete sala sambu nge baka mambote yina yo ta tana.

Beto ke lomba nge na kutala video Kimfumu ya Nzambi Kele Nki?