Inki Mambu Biblia Ke Tubaka?

Kimfumu ya Nzambi kele nki?

BANTU YA NKAKA KE TUBAKA nde yo ke monisaka luyalu ya Nzambi yina kele na ntima ya muntu; bankaka ke yindulaka nde yo kele bikesa yina bantu ke salaka sambu na kutula ngemba mpi bumosi na ntoto ya mvimba. Inki kele dibanza na nge?

MAMBU YINA BIBLIA KE TUBAKA

“Nzambi ya zulu ta tula kimfumu mosi yina ta fwa ve ata fioti. . . . Yo ta bedisa mpi ta sukisa bimfumu yina yonso [ya bantu].” (Daniele 2:44) Kimfumu ya Nzambi kele luyalu mosi ya kieleka.

MAMBU YA NKAKA YA BETO KE LONGUKA NA BIBLIA

• Kimfumu ya Nzambi ke yala katuka na zulu.—Matayo 10:7; Luka 10:9.

• Nzambi ke sadilaka Kimfumu sambu na kulungisa luzolo na yandi na zulu mpi na ntoto.—Matayo 6:10.

Kimfumu ya Nzambi ta kwisa nki ntangu?

INKI MVUTU NGE TA PESA?

• Ata muntu mosi ve me zaba

• Ntama mingi ve

• Yo ta kwisa ve

MAMBU YINA BIBLIA KE TUBAKA

“Bo ta samuna nsangu yai ya mbote ya Kimfumu na ntoto ya mvimba sambu na kuta kimbangi na makanda yonso, ebuna nsuka ta kwisa.” (Matayo 24:14) Ntangu bo ta longa nsangu ya mbote na ntoto ya mvimba, Kimfumu yina ta kwisa sambu na kufwa ngidika yai ya bima.

MAMBU YA NKAKA YA BETO KE LONGUKA NA BIBLIA

• Ata muntu mosi ve na ntoto me zaba kibeni ntangu yina Kimfumu ya Nzambi ta kwisa.—Matayo 24:36.

• Bambikudulu ya Biblia ke monisa nde Kimfumu yina ta kwisa ntama mingi ve.—Matayo 24:3, 7, 12.