Nzambi Me Pesaka Banda Ntama Bansiku ya Me Tala Bunkete
Bamvu-nkama 35 me luta, ntangu fioti na ntwala nde dikanda ya Izraele kukota na ntoto ya lusilu, Nzambi tubaka nde yandi ta tanina bo sambu ‘maladi ya mbi’ yina bo monaka na Ezipte kubaka bo ve. (Kulonga 7:15) Yo yina, yandi pesaka bo bansiku ya pwelele na yina me tala bunkete mpi mambu yina bo fwete sala sambu maladi kubaka ve bantu ya nkaka. Mu mbandu:
Bansiku ya Nzambi pesaka dikanda vandaka kulomba nde bantu kuyobila mpi bo yobisa bilele na bo.—Levi 15:4-27.
Sambu na wese, Nzambi tubaka nde: “Bo fwete [pona] kisika mosi ya kinsweki na nganda ya camp, mpi nge fwete kwenda kuna. Nge fwete vanda ti pawu na kati ya bisadilu na nge. Ntangu nge ke sondamana na nganda, nge fwete timuna dibulu ti yo mpi kuzika [wese] na nge na nima.”—Kulonga 23:12, 13.
Konso muntu yina bo vandaka kumona nde yandi kele ti maladi ya nsambukila, bo vandaka kutula yandi na kingenga, ntama ti bantu ya nkaka sambu na mwa ntangu. Na ntwala nde yandi zinga diaka ti bantu kisika mosi, nsiku vandaka kulomba nde muntu yai ya me beluka kuyobila mpi kuyobisa bilele na yandi na masa sambu yandi vanda “bunkete.”—Levi 14:8, 9.
Bo vandaka kutula konso muntu yina simbaka mvumbi na kisika na yandi mosi.—Levi 5:2, 3; Kutanga 19:16.
Nzambi pesaka bantu ya Izraele na ntwala kibeni bansiku yina minganga ke tubila mpi bansiku na yina me tala mavimpi.
Kansi na babwala ya nkaka, bantu vandaka kulanda ve bansiku na yina me tala bunkete. Mu mbandu:
Bantu vandaka kulosa mvindu na bala-bala. Masa ya mvindu, madia ya kubeba mpi mvindu ya mitindu yonso salaka nde bantu kukuma kuzinga na kati ya mvindu. Yo salaka nde bantu kukuma kubela mingi mpi babebe mingi fwaka.
Badoktere ya ntangu ya ntama vandaka kibeni ve kuzaba to bo vandaka kuzaba ve mikrobe mpi bima yina ke pesaka bantu maladi. Bantu ya Ezipte vandaka kusadila menga ya mbala-mbongo, wese ya ndeke yina bo ke bingaka pélican, bampuku ya kufwa, masuba mpi dimpa ya me bwa lubungi bonso nkisi. Bo vandaka mpi kusadila wese ya bantu mpi ya bambisi bonso nkisi sambu na kusansa bamaladi.
Bantu yina vandaka kuzinga ntama na Ezipte vandaka kubaka mikrobe ya mutindu na mutindu. Yo vandaka kukatuka na masa ya Nzadi Nile yina vandaka ti mikrobe mpi na banzila yina bo vandaka kulutisila masa. Babebe vandaka kufwa sambu na diarrhée mpi bamaladi ya nkaka ya mutindu mosi yina bo vandaka kubaka na madia ya kubeba.
Kansi bantu ya Izraele vandaka na sante ya mbote sambu bo vandaka kuzitisa Nsiku ya Nzambi.