Baroma 12:12—“Beno Vanda na Kiese Sambu na Mambu Yina ya Beno Ke Tulaka Ntima, Beno Kanga Ntima Sambu na Mpasi na Beno, Beno Samba Nzambi Konso Ntangu”

“Beno vanda na kiese sambu na kivuvu. Beno kanga ntima na bampasi. Beno kwamina na kisambu.”—Baroma 12:12, Mbalula ya Nsi-Ntoto ya Mpa.

“Beno vanda na kiese sambu na mambu yina ya beno ke tulaka ntima, beno kanga ntima sambu na mpasi na beno, beno samba Nzambi konso ntangu.”—Baroma 12:12, Bible en Kituba.

Ntendula ya Baroma 12:12

Na verse yai, ntumwa Polo siamisaka Bakristu ya Roma na kusala mambu tatu yina zolaka kusadisa bo na kulanda kukangama na Nzambi ata bo vandaka kukutana ti mbangika mpi bampasi ya nkaka.

“Beno vanda na kiese sambu na kivuvu.” Bakristu kele ti kivuvu ya kitoko ya kubaka luzingu ya mvula na mvula; bankaka ta baka yo na zulu mpi bantu mingi ta baka yo na ntoto yina ta kuma paladisu. (Nkunga 37:29; Yoane 3:16; Kusonga 14:1-4; 21:3, 4) Kivuvu ke tubila mpi mutindu Kimfumu ya Nzambia ta manisa bampasi yonso yina bantu ke kutanaka ti yo. (Daniele 2:44; Matayo 6:10) Bantu ya ke sambilaka Nzambi lenda sepela ata ntangu bo ke kutana ti bampasi, sambu bo me zaba nde kivuvu na bo kele ya kieleka mpi nde Nzambi ta ndima bo kana bo kanga ntima.—Matayo 5:11, 12; Baroma 5:3-5.

“Beno kanga ntima na bampasi.” Na Biblia, bo ke sadilaka mbala mingi verbe ya Kigreki ya bo me balula nde “kukanga ntima” sambu na kutubila “kubikala na kisika mosi olie ya kutina; kukwamina; kuvanda kaka ngolo.” Balongoki ya Kristu “kele ve bantu ya nsi-ntoto,”b yo yina bo lenda vingila nde bo ta kutana ti bampasi mpi yo ta lomba nde bo kanga ntima. (Yoane 15:18-20; 2 Timoteo 3:12) Kana Mukristu ke landa kusadila Nzambi ata yo ke tendula kukanga ntima na bampasi, yandi ta kuma kundima mingi nde nsuka-nsuka Nzambi ta futa yandi. (Matayo 24:13) Ebuna, mambu yina ta sadisa yandi na kukanga ntima na bampasi ti ntima nda mpi kiese.—Bakolosai 1:11.

“Beno kwamina na kisambu.” Sambu na kulanda kukangama na Nzambi, Biblia ke siamisaka Bakristu mbala na mbala na kulanda kusamba. (Luka 11:9; 18:1) Bakristu ke landaka kusosa lutwadisu ya Nzambi mpi ke tudilaka yandi ntima na mambu yonso ya luzingu na bo. (Bakolosai 4:2; 1 Batesalonika 5:17) Bo ke ndimaka nde Nzambi ta pesa mvutu na bisambu na bo sambu sambu bo ke zitisaka bansiku na yandi mpi bo ke salaka yonso sambu na kusepedisa yandi. (1 Yoane 3:22; 5:14) Bo me zaba mpi nde kana bo yambula ve na kusamba, Nzambi ta pesa bo ngolo ya bo kele ti mfunu na yo sambu na kukangama ti yandi ata bo kutana ti konso mambu yina.—Bafilipi 4:13.

Mambu ya Bo Ke Tubila na Baverse ya Kele na Ntwala mpi na Nima ya Baroma 12:12

Polo sonikaka mukanda yai na Bakristu yina vandaka kuzinga na Roma pene-pene ya mvu 56 ya ntangu na beto. Na kapu 12 ya mukanda yai, yandi ke pesa bandongisila ya mbote ya ke monisa mutindu ya kumonisa bikalulu ya Bukristu, mutindu ya kusadila bampangi mpi bantu ya nkaka mambu, mpi mutindu ya kusala mambu kana bo ke monisa bo mpasi. (Baroma 12:9-21) Yo vandaka bandongisila ya mbote sambu na Bakristu ya Roma sambu ntama mingi ve bo zolaka kukutana ti bampasi ya ngolo.

Bamvula fioti na nima, disongidila na mvu 64 ya ntangu na beto, tiya ya ngolo yokaka bima mingi na mbanza Roma. Bantu vandaka kutuba nde ntotila Nero muntu tulaka tiya yina. Tacite, muntu mosi ya istware ya Roma, ke tuba nde Nero sosaka kuditanina yo yina yandi tubaka nde Bakristu bantu tulaka tiya yina. Yo kele pwelele nde, yo natilaka Bakristu bampasi ya ngolo kibeni. Bandongisila ya Polo ya ke monisa mutindu ya kukanga ntima na bampasi sadisaka bo na kunwana ti mambu yina ti lukwikilu mpi lukumu. (1 Batesalonika 5:15; 1 Piere 3:9) Bo kele bambandu ya mbote yina bantu ya ke sambilaka Nzambi bubu yai fwete landa.

Tala video yai ya nkufi sambu na kumona na bunkufi mambu yina kele na mukanda ya Baroma.