Kunwanina Kimpwanza na Mambu ya Lusambu na Babwala Yina Bantu Ke Landaka Bikalulu ya Babwala na Bo

Na kati ya bamilio ya bantu yina ke zingaka na Amérique latine, bamingi kele ti bandinga na bo mosi mpi mutindu na bo mosi ya kuzinga. Na babwala yango, bamingi kele bampangi na beto ya ke sambilaka Yehowa. Bo ke pesaka mpi valere na mutindu ya kuzinga yina bo me bikilaka bo. Sambu na kusadisa bantu na kimpeve, Bambangi ya Yehowa ke balulaka mpi ke kabulaka mikanda na bandinga kuluta 130 ya bantu yina ke zingaka na Amérique latine.a Kansi bantu ya nkaka teleminaka bampangi sambu bo me ponaka kusadila Yehowa mpi bo ke buyaka kusala mambu ya bansiku ya bambuta ya ke salamaka bisika bo ke zingaka mpi ya ke fwaka bansiku ya Nzambi. Inki mutindu bo sadilaka makabu na beno sambu na kusadisa bampangi na beto?

Bo Sadisaka Bampangi na Kuvutuka na Banzo na Bo

Na Mexico bampangi na beto ya babakala mpi ya bankento ya ke zingaka kisika mosi ti bantu ya dikanda ya Huichol na bangumba ya Jalisco buyaka kukota na mambu ya dibundu ya bankaka na bo yina bo monaka nde yo ke fwa minsiku ya Biblia.b Diambu yai pesaka bantu ya nkaka makasi. Na Desembri 4, 2017, kimvuka mosi ya bantu ya vandaka na makasi nwanisaka Bambangi ya Yehowa mpi bantu mingi ya nkaka yina vandaka ti bo. Kimvuka ya bantu yina pusaka bampangi na beto na kuzinga diaka ve na bisika bo ke zingaka, bo bebisaka bima na bo, mpi bo tubaka nde bo ta fwa konso muntu yina ta kwisa kuvutuka.

Bambangi ya Yehowa yina ke zingaka na bambanza ya pene-pene lungisaka kukonda kuvingila bampusa ya bampangi na beto yai ya babakala mpi ya bankento. Kansi yo lombaka kusala nki sambu bampangi yai kuvutuka na banzo na bo? Mpangi mosi na zina ya Agustín ke tuba nde: “Beto vandaka ve ti mbongo sambu na kusosa avoka yina ta samba na kisika na beto mpi beto zabaka ve na nani beto lenda lomba bandongisila na mambu ya me tala nsiku.”

Mutindu nswa yina bampangi na beto ke vandaka ti yo sambu na kusambila Yehowa kumaka na kigonsa, Betele ya Amérique centrale bakaka mambu na maboko. Ntete, bo lombaka bamfumu ya bisika yina bampangi ke zingaka na kusala bansosa sambu na mambu ya nku yina salamaka. Na nima, Komite ya Mitambusi ya Nto-Kimvuka ya Bambangi ya Yehowa pesaka Betele yai nswa ya kusala diboko na diboko ti Biro ya Ke Talaka Mambu ya Bansiku ya kele na babiro na beto ya ke twadisaka kisalu na ntoto ya mvimba mpi na kufunda mambu yina bo salaka bampangi na beto ya Huichol na leta. Mambu yango kumaka tii na Tribinale ya Nene ya Ke Zengaka Makambu na Mexico.

Kimvuka mosi ya ba-avoka ya bansi mingi yidikaka mbote-mbote mambu sambu na kunwanina nswa ya bampangi na beto. Bo tendulaka nde kaka mutindu bantu ya nkaka fwete zitisa mutindu bantu ya makanda ya nkaka ke zingaka, makanda yina fwete zitisa mpi nswa yina bantu ya makanda na bo kele ti yo ya kuvanda na kimpwanza mpi bo fwete tanina bo. Muntu yonso ke vandaka ti banswa na yandi na konso kisika yina yandi ke zinga.

Na Yuli 8, 2020, Tribinale ya Nene ya Ke Zengaka Makambu na Insi zengaka na bumosi mambu yina mpi monisaka nde Bambangi ya Yehowa kele ve ti foti. Tribinale pesaka nsiku nde Bambangi yina ya Yehowa fwete vutuka na bisika yina bo ke zingaka. Agustín yina beto tubilaka na ntwala monisaka ntonda yina yandi mpi bampangi ya nkaka monisaka. Yandi tubaka nde: “Beto ke monisa ntonda ya mingi sambu na mambu yina bampangi me sala sambu na beto mpi beto kele na kiese. Kana bo sadisaka beto ve, beto zolaka kusala ve ata kima mosi.”

“Mambu ya Nene Sambu na Bantu Fioti”

Kansi bampangi na beto ya ke zingaka na San Juan de Ilumán, bwala mosi na Équateur, kisika yina bantu ya muwanda ya Otavalo ke zingaka, kutanaka ti mambu ya mutindu mosi. Bo teleminaka bo mpi. Na 2014, bo yantikaka kutunga Nzo ya Kimfumu na nima ya kubaka banswa yonso ya mfunu. Kansi, nganga-nzambi mosi pusaka kimvuka mosi ya bantu kuluta 100 mpi bo pusaka bampangi na kuzenga kisalu yina ya kutunga. Na nima, bantu ya bwala yina songaka Bambangi ya Yehowa nde bo fwete vukanaka diaka ve sambu na kusambila Yehowa.

Biro ya ke talaka mambu ya bansiku na Betele ya Équateur mpi babiro ya ke twadisaka kisalu na beto na ntoto ya mvimba salaka diboko na diboko sambu na kunwanina banswa ya dibundu mutindu bantu yina fwaka nsiku na yina me tala kimpwanza na mambu ya lusambu. Bampangi na beto nataka makambu yina na tribinale. Yo salaka nde bantu ya bwala yina kuyambula kutelamanina bo mpi yo pesaka dibundu nzila ya kubanda diaka kusala balukutakanu mpi kumanisa kutunga Nzo na bo ya Kimfumu. Kansi sambu na kutanina banswa ya bampangi na bilumbu ya ke kwisa, mimonisi na beto lombaka nde batribinale ya nene kubaka lukanu sambu na ngiufula yai ya mfunu mingi: Keti bantu ya ke zingaka na babwala fwete zitisa banswa yina bantu yonso na ntoto ya mvimba ke vandaka ti yo?

Na Yuli 16, 2020, Tribinale ya insi Équateur yina ke landilaka makambu ya kuzitisa banswa ya bantu, waka mambu yina. Tribinale yai kele tribinale ya kuluta nene ya insi. Bampangi na beto yina kele ba-avoka na Équateur tubaka na kisika ya dibundu. Katula bo, bampangi na beto ya nkaka iya yina kele ba-avoka ya ke sambaka mambu na ntoto ya mvimba solulaka ti bazuzi ya tribinale yai. Mutindu baluyalu tulaka bandilu sambu na maladi ya COVID-19, bo vandaka na ba-insi ya kuswaswana mpi bo solulaka ti tribinale na nzila ya vidéoconférence. Yai mbala ya ntete yina tribinale mosi ke pesa kimvuka ya ba-avoka yina ke monisa Bambangi ya Yehowa na ntoto ya mvimba nswa ya kupesa bikuma yina bo kele ti yo.c Kimvuka yina ya ba-avoka tubilaka mambu yina bamfumu ya ke talaka mambu ya nsiku tubaka sambu na kumonisa nde bantu yina ke zingaka na babwala na bo ke yambulaka ve banswa yina konso muntu na kati na bo fwete ti yo kaka sambu bo ke zinga na bwala mosi buna.

Bampangi na beto ya nkaka ya ke zingaka na mbanza yina bo ke bingaka Vallée d’ Otavalo ke vingila ti kiese yonso lukanu yina Tribinale yango ta baka. Kansi na ntwala nde Tribinale kutuba lukanu ya bo me baka, bampangi ke monisa ntonda ya mingi sambu na lusadisu yina bo me baka. César kele sadilaka Yehowa. Yandi kele nkuluntu na Dibundu ya Ilumán Quichua. Yandi ke tuba nde: “Yehowa mpamba na nzila ya organizasio na yandi muntu lenda sala mambu ya nene sambu na bantu fioti.”

Ba-avoka yina sambaka mambu ya Bambangi ya Yehowa, bo yonso bo kele Bambangi ya Yehowa mpi bo kele na kiese ya kusadila mayele na bo kukonda kulomba mbongo. Ata mpidina, kutadila mambu yai, kudibongisa sambu na yo mpi kunwanina yo na tribinale lombaka ntangu mpi mbongo. Ba-avoka yina mpi bampangi na beto ya nkaka salaka bangunga kuluta 380 sambu na kuyidika mambu ya kutuba mpi bangunga 240 sambu na kubalula mikanda ya mambu ya kusamba na Mexique. Ba-avoka kiteso ya 40 yina katukaka na bansi ya mutindu na mutindu salaka bankama ya bangunga na mambu yina ya Équateur. Inki mutindu beto kukaka kusala badepanse yina kukwenda kunwanina banswa ya bampangi na beto lombaka? Beto salaka yo na nsadisa ya makabu yina beno ke pesaka na nzila ya bametode ya mutindu na mutindu yina bo ke tubilaka na donate.jw.org. Matondo mingi sambu na kikalulu na beno ya kukaba.