Kisalu ya Kutunga Yina Ke Sadisa Beto na Kulonga Nsangu ya Mbote

Nto-Kimvuka ke vandaka na kiese ya kusadila mbongo ya makabu sambu na kutungisa banzo yina ke sadisaka beto na kusala kisalu ya kulonga Kimfumu. Mu mbandu na mvula ya kisalu ya 2023, bimvuka yina Babetele ya Bambangi ya Yehowa ke sadilaka basisaka mbongo ya badolare kuluta 500 milio sambu na kusumba, kutunga, kuyidika mpi kutanina Banzo ya Kimfumu mpi Banzo ya Balukatakanu ya Nene na ntoto ya mvimba.a Mbongo yai kele ve na kati ya mbongo yina mabundu na ntoto ya mvimba ke basisaka sambu na kubaka bunkete ya Banzo na bo ya Kimfumu.

Katula yo, bo ke sadilaka mpi mbongo ya makabu sambu na kutunga Babetele mpi kubaka bunkete na yo. Babetele ke sadisaka na kuyidika kisalu ya kulonga nsangu ya mbote na ntoto ya mvimba mpi kupesa maboko na kisalu yai. Beto me kumisaka pete bisalu ya beto ke salaka na Babetele sambu beto sadila mbongo ya nkaka na kisalu ya kutunga Banzo ya Kimfumu ti Banzo ya Balukutakanu ya Nene mpi kutomisa mutindu banzo yina fwete vanda. Kansi yo ke lombaka mbongo mingi sambu na kuyidika diaka Babetele, kukumisa yo mutindu ya nkaka to kunata yo kisika ya nkaka. Sambu na nki bisalu yai kele mfunu? Inki mutindu Babetele ke pesaka maboko na kisalu ya mfunu ya kulonga nsangu ya mbote yina ke salamaka na nganda ya Betele? Bika beto sosa kuzaba yo.

“Yo Ke Salaka nde Yo Wumela”

Babetele mingi me salaka dezia bamvula kuluta 30 to 40. Nicholas ke sadilaka Yehowa na Biro ya Ke Talaka Kisalu ya Kutunga ya Kele na Babiro ya Ke Twadisaka Kisalu na Beto na Ntoto ya Mvimba. Yandi ke tuba nde: “Yo vanda nzo yina bo me yidikaka mbote lenda kuma ya ntama mpi kubeba na nima ya ntangu. Bisalu ya kuyidika ke salaka nde yo wumela mpi bantu kulanda kusadila yo.”

Babetele fwete yikama mpi na kutadila bampusa yina kele na organizasio. Banda bo me tungaka Babetele mingi, ntalu ya bansamuni me kumaka mingi kibeni na ntoto ya mvimba. Mutindu ntalu ya bansamuni ke kuma mingi, yo lombaka nde bavolontere kukuma mingi na Babetele sambu na kusadisa mbote na diambu yai. Yo yina, banzo ya Babetele yina nene na yo vandaka kulunga na kutadila mingi ya bantu yina vandaka ntete kuna me kumaka fioti.

Kima ya nkaka ya kutadila kele mambu ya lutaninu. Mutindu beto ke zinga na nsuka ya nsi-ntoto yai, beto ke mona mutindu bisumbula ya lugangu ke tula luzingu na beto na kigonsa. (Luka 21:11) Kana beto ke sadila bametode ya mpa ya kutunga ntangu beto ke yidika banzo yina beto ke sadilaka, beto ta sadisa sambu banzo yina kuvanda bisika yina ke tula ve luzingu ya bantu yina ke salaka kuna na kigonsa. Bisalu yina ya kuyidika ke sadisa mpi na kusadila banzo yango bonso bisika yina bampangi ke yidikaka bisalu ya kusadisa bantu yina me bwila mpasi na nima ya kisumbula mosi ya lugangu, mpi na kulanda kupesa maboko na kisalu ya kulonga nsangu ya mbote.

“Yehowa Me Sakumuna Lukanu Yina”

Na lutwadisu ya Nto-Kimvuka, bampangi salaka bisalu ya nene ya kutunga na Babetele 43 na mvula ya kisalu ya 2023. Yo ke tendula nde bo me sala bisalu na Babetele mingi na ntoto ya mvimba. Yai kele bambandu ya Babetele zole mpamba ya ke monisa nde bisalu yai ya ke salama kele mfunu.

Angola. Matt kele mpangi ya Komite ya Filiale na Angola. Yandi ke tuba nde: “Beto kele ti dibaku ya mbote ya kumona mutindu mambu yina Agai 2:7 tubaka na ntwala ke lungana na mutindu ya kuyituka. Na nsungi ya bamvula kumi, ntalu ya bansamuni me tombuka na 60%. Sambu na kusadisa bansamuni yai, yo lombaka nde beto fokula mbala tatu ntalu ya bampangi yina ke sadilaka Yehowa na Betele. Kansi, nene ya banzo na beto vandaka kupesa beto ve nzila ya kubingisa bampangi mingi na Betele. Yo yina, yo lombaka nde bampangi ya kele dezia na Betele kukuma ti kisalu mingi diaka mpi bo sala bangunga mingi ya nkaka katula bangunga yina bo ke salaka dezia na kisalu.”

Bo lombaka bampangi na kuyindula inki bo lendaka kusala sambu na kukumisa Betele nene. Bo yindulaka ntete nde, bo lenda yidika diaka nswalu-nswalu Betele yina bo vandaka dezia ti yo. Kansi na nima ya kutadila mambu mbote-mbote, bo monaka nde kana bo yidika diaka Betele yina, bo ta sadila ve mbote mbongo ya makabu. Bo lombaka nde bo sumba nzo mosi ya vandaka pene-pene ya Betele mpi bo yidika yo. Matt ke tuba nde: “Ntangu bo songaka Komite ya Filiale ngindu ya kusumba mpi ya kuyidika nzo yina bo tungaka dezia, beto vandaka ti badute nde nzo yina ta sadisa beto kibeni mutindu nzo yina beto mosi me tunga lendaka kusadisa beto kana beto tungaka yo. Kansi bubu yai, beto ke mona nde nzo yango ya bo me yidika me fwana kibeni sambu na beto. Yehowa me sakumuna lukanu yina.”

Ntembe kele ve nde Betele ya Angola ta vanda ti mfunu ya kisika ya nene na bilumbu ya ke kwisa. Kansi, nzo ya mpa yina bo me yika katula banzo yina bo lenda yidika diaka ya bo me tula na lupangu ya Betele mpi banzo yina beto ke futila na nganda ya Betele, me fwana sambu na kulungisa mpusa yina kele na insi yai na kutadila mutindu kisalu ke landa kukwenda na ntwala.

Japon. Bamvula kiteso ya 40 me luta banda bo tungaka Betele ya ntete ya nene mpi bo me yidikaka yo ntete ve. Bampangi ke salaka ngolo sambu na kutanina yo. Beto me sadilaka yo bamvula mingi. Ata mpidina, bamvula yina yo lombaka nde banzo yai kusala me lutaka dezia. Yo yina sesepi, beto ke sala bisalu ya nene ya kuvutula yo ya mpa.

Mambu ke landa kusoba na Betele. Na ntwala ya 2015, bo vandaka kulamba madia yonso kisika mosi sambu na dibuta ya mvimba ya Betele. Yo yina, bashambre mingi na Betele vandaka kaka ti kwizine mosi ya fioti. Bubu yai, bampangi ya dibuta ya Betele me kumaka kulamba madia mingi bo mosi. Yo yina na ntangu bo vandaka kuyidika Betele, bo kumisaka bakwizine na konso chambre ya Betele mwa nene na mpila nde bampangi kuyantika kulamba kukonda mpasi. Mpangi-nkento Kumiko yina kele na Betele ya Japon ke tuba nde: “Kisika ya kulamba yina bo tulaka sadisaka mono na kudiwa bonso na nzo mpi mono lenda pesa kibeni mbote-mbote maboko na bangidika ya mpa ya Betele”.

Kisalu yina salamaka na Betele ya Japon kele mfunu mingi sambu na kisalu ya ke salamaka na ntoto ya mvimba. (Matayo 28:19, 20) Betele ya Japon kele na kati ya Babetele zole yina ke niemaka Biblia ya mvimba. Yo yina mosi na kati ya bisalu ya mfunu ya kisalu ya kutunga yina bo ke sala na Betele yai, kele ya kutula bima yina ta kongulaka bitini ya bapapie ya ke bwa mpi bapusiere sambu na kutanina bantu yina ke salaka na Kisika Yina Bo Ke Niemaka Mikanda. Bo sadilaka mbongo pene-pene ya milio mosi ya badolare sambu na kusumba bima yina mpi kutula yo, kansi yo ke ndimisa nde Betele ta landa kuniema mikanda yina ke sadisaka beto na kulanda kuvanda ti lukwikilu ya ngolo, mingi-mingi Babablia mpi kutindila yo mabundu.

Kisalu ya kulanda kuniema Babiblia vandaka kusalama ata na ntangu yina bisalu ya kutunga vandaka kusalama. Mpangi Trey yina kele na komite ya filiale ya Japon ke tuba nde: “Ntangu kisalu ya kutunga vandaka kusalama, organizasio na beto vandaka kubasisa Babiblia mingi yina bo me balulaka mpi bantu mingi na ntoto ya mvimba vandaka ti mfunu ya Babiblia. Yo lombaka kuwakana ya mbote na kati ya babiro mingi ti bantu yina yo lombaka nde bo sala kisalu sambu na kuzaba na nki ntangu bo fwete tula bisadilu yina ya mpa mpi nki ntangu beto lendaka kuyantika kuniema mikanda.” Ata bo kutanaka ti bampasi, bo vandaka kuniema Babiblia kiteso ya 220 000 konso ngonda banda na mars tii na août 2023—na ntangu yina bo vandaka kusala bisalu ya nene ya kutunga na Kisika Yina Bo Ke Niemaka Mikanda. Bisalu yai yonso salamaka kukonda kulomba nde bo yika mbongo sambu na bisalu yina ya kutunga.

Kima ya nkaka ya mfunu mingi ya me salama na kisalu yai ya kutunga kele mutindu bo me sala mambu sambu na kusadila kura mbote. Beto ta tula bapano ya mpa. Yo ta sadisa beto na kubumba mbongo kiteso ya badolare 120 000 yina ke kwisaka konso mvula sambu na faktire ya kura. Bo ta tula bafenetre yina kele ti bavitre tatu mpi yo ta salaka nde beto sadila ve kura mingi mpi yo ta sadisa beto na kubumba mbongo kiteso ya badolare 10 000 ya beto ke basisaka konso mvula sambu na kura. Bisadilu yai ya ta sala nde beto sadila ve kura mingi ke sala nde beto sadila mbongo ya nkaka na zulu ya mbongo yina bo zengaka sambu na bisalu ya kuyidika Babetele. Ata mpidina, bisadilu yina ta sala nde beto bumba mbongo ya badolare kulkuta 3 milio ti ndambu bamvula yonso yina bapano ti bafenetre yina ta sala. Yo ta sadisa mpi na mambu ya me tala mupepe, ntangu mpi buna na buna (impact environnemental) ya banzo yina.

“Mambu ya Kusala Kele Kaka Mingi”

Babetele zole yina bo me yidika ke monisa mambu yonso yina bo fwete sala na Babetele na beto sambu na kulungisa mpusa ya kele na teritware na beto. Kansi imene ve pana. Aaron yina kele na Biro ya Ke Talaka Kisalu ya Kutunga na Ntoto ya Mvimba ke tuba nde: “Ata bampangi me sala kisalu ya nene, mambu ya kusala kele kaka mingi.” Inki yo ta lomba sambu kisalu yango kusalama? Yandi ke tuba diaka nde: “Katula makabu ya luzolo yina bampangi ke pesaka sambu na bisalu ya nene ya mutindu yai, beto ke sepelaka ti kikalulu ya kudipesa ya bampangi yina me kudipesa bonso bavolontere mpi ya bampangi yina ke yidika mambu ya luzingu na bo sambu na kusala kisalu yai na bilumbu ya ke kwisa. Mutindu bampangi na beto ke kudipesaka mpi ke pesaka makabu, ke monisaka nde Yehowa ke sakumuna beto.”​—Nkunga 110:3.

Bisalu yonso ya kutunga ya beto ke salaka ke simbamaka na makabu ya luzolo. Bantu ke pesaka makabu yango na nzila ya site donate.jw.org. Matondo mingi sambu na kikalulu na beno ya kukaba mbala na mbala.