Keti Mbongo Kele Musisa ya Mambu ya Mbi ya Mitindu Yonso?

Mvutu ya Biblia

Ve. Biblia ke tubaka ve nde mbongo kele mbi mpi yo ke tubaka ve nde mbongo ke vandaka na kisina ya mambu yonso ya mbi. Bantu mingi ke tubaka nde: ‘Mbongo ke bendaka mambu ya mbi ya mutindu na mutindu.’ Bo ke salaka kifu mutindu bo ke katulaka kitini ya nkaka ya verse yai. Sambu Biblia ke tubaka nde “kuzola mbongo mingi ke bendaka mambu ya mbi ya mutindu na mutindu.”a—1 Timoteo 6:10, Bible en Kituba.

Biblia ke tubaka nki sambu na mbongo?

Biblia ke tubaka nde kana beto ke sadila mbongo mbote, yo ke vandaka mfunu mingi mpi nkutu yo lenda ‘tanina’ beto. (Longi 7:12) Diaka, Biblia ke sikisaka bantu yina ke vandaka ti kikalulu ya kukabila bantu ya nkaka mpi mbongo lenda vanda na kati ya bima yina bo lenda kabila bantu ya nkaka.—Bingana 11:25.

Kansi Biblia ke kebisaka beto na kutula ve mbongo na kisika ya ntete na luzingu na beto. Yo ke tubaka nde: “Zola ya mbongo kuyala ve mutindu na beno ya kuzinga, na ntangu beno ke sepela ti bima yina beto kele na yo.” (Baebreo 13:5) Verse yai ke longa beto nde beto fwete tula mbongo na kisika na yo mpi beto fwete sosa ve kaka na kukuma bamvwama. Kansi beto fwete sepela ti bima yina kele mpenza mfunu sambu na beto mu mbandu: madia, bilele mpi kisika ya kulala.—1 Timoteo 6:8.

**Sambu na nki Biblia ke kebisaka beto na kuzola ve mbongo?**

Bantu ya lukasi ta baka ve luzingu ya mvula na mvula. (Baefezo 5:5) Ya kieleka, lukasi kele mpi lusambu ya biteki to lusambu ya luvunu. (Bakolosai 3:5) Diaka, bantu ya lukasi ke salaka mbala mingi mambu ya mbi kibeni kaka sambu na kuzwa bima yina bo kele ti yo mfunu. Bingana 28:20 ke tuba nde: “Muntu yina ke sala mambu ntinu-ntinu sambu na kukuma mvwama ta konda ve kusala mbi.” Bankaka nkutu lenda kuma kusala mambu ya mbi, mu mbandu kupesa muntu boma sambu na kudia yandi mbongo, kubotula bantu bima, kukusa sambu na kuyiba, kukanga muntu na ngolo mpi kunata yandi na kisika ya nkaka sambu na kulomba dibuta na bo mbongo (enlèvement) to mpi nkutu kufwa bantu.

Ata zola ya mbongo me pusa ve muntu na kusala mambu ya mbi, yo lenda vanda ti malanda ya nkaka ya mbi. Biblia ke tubaka nde “bantu yina kele ti lukanu ya ngolo ya kukuma bamvwama ke bwaka na mpukumuna, na mutambu, mpi na banzala ya buzoba ti ya mbi.”—1 Timoteo 6:9.

Inki beto fwete sala sambu bandongisila yina Biblia ke pesaka sambu na mbongo kunatila beto mambote?

Kana beto ke bika ve nde mbongo kupusa beto na kusala mambu ya mbi yina ke sepedisaka ve Nzambi, beto ta vanda na ngemba mpi Nzambi ta ndima beto mpi ta sadisa beto. Nzambi ke tubaka mambu yai sambu na bantu yina ke salaka mpenza bikesa sambu na kusepedisa yandi: “Mono ta bikisa nge ve ata fioti mpi mono ta yambula nge ve ata fioti.” (Baebreo 13:5, 6) Yandi ke tubaka mpi nde “muntu ya kwikama ta baka balusakumunu mingi.”—Bingana 28:20.

Baverse ya Biblia ya Ke Tubilaka Mbongo

Longi 7:12: “Mbongo ke taninaka.”

Ntendula ya verse: Kana beto ke sadila mbongo mbote, yo ta sadisa beto mpenza sambu yo lenda tanina beto mpi.

Luka 12:15: “Ata ntangu muntu kele ti bima mingi, luzingu na yandi ke katukaka ve na bima yina yandi kele ti yo.”

Ntendula ya verse: Mbongo kele ve kima ya kuluta mfunu na luzingu mpi yo kele ve na kati ya bima yina ta sadisa beto na kuguluka.

1 Timoteo 6:10: “Zola ya mbongo kele musisa ya mambu ya mbi ya mitindu yonso, mpi sambu bantu ya nkaka me yedisaka zola yai, bo me vidisaka lukwikilu mpi bo me kuditobulaka ti bampasi mingi.”

Ntendula ya verse: Mbongo yo mosi kele ve mbi. Kansi bantu yina ke zolaka mbongo to bayina ke tulaka yo na kisika ya ntete na luzingu na bo ke kudinatilaka bampasi mingi, mu mbandu bo ke lutisaka ve ntangu mingi ti bantu ya mabuta na bo mpi bo ke bebisaka sante na bo sambu bo ke salaka kuluta ndilu sambu na kuzwa mbongo.

Baebreo 13:5: “Zola ya mbongo kuyala ve mutindu na beno ya kuzinga, na ntangu beno ke sepela ti bima yina beto kele na yo.”

Ntendula ya verse: Beto fwete vanda ve kaka ti lukanu ya kukuma bamvwama, kansi beto fwete sepela ti bima yina beto kele na yo mfunu.

Matayo 19:24: “Yo kele pete kibeni sambu shamo kukota na munoko ya sindani kansi yo kele mpasi mingi sambu mvwama kukota na Kimfumu ya Nzambi.”

Ntendula ya verse: Yezu katukaka kubingisa toko mosi ya mvwama na kulanda yandi. Toko yango buyaka sambu yandi vandaka kuzola mingi bimvwama na yandi. Yo yina Yezu tubaka mambu yai sambu na kukebisa beto nde muntu yina ke zola bimvwama mingi kuluta Nzambi lenda vidisa dibaku ya kuzinga mvula na mvula.

a Biblia ya nkaka me balulaka verse yai nde: “Zola ya mbongo kele musisa ya mambu ya mbi ya mitindu yonso.”