Bau Salaka Luzolo ya Yehowa

Lukwikilu ya Bibuti Bakaka Nsendo

NA BANTU ya Izraele, lubutuku ya mwana-bakala vandaka kikuma ya kyese mingi. Yau vandaka kusonga nde kikanda talanda mpi nde difwa ya ntoto tabikala kaka na kati ya dikanda. Kansi, mfinama na mvu 1593 N.T.B., kubuta mwana-bakala monanaka bonso lusingu kansi lusakumunu ve na Baebreo. Sambu na inki? Sambu, ntangu Farao ntotila ya Ezipte kumonaka kubilama ya Bayuda na kati ya teritware na yandi, yandi pesaka ntuma nde bau kufwa bana-babakala ya Bayuda yonso yina vandaka kubutuka.​—⁠Kubasika 1:​12, 15-22.

Na ntangu yina ya bau vandaka kufwa bana na kimpala, Amrami ti Yokebedi, bankwelani zole na kati ya Baebreo, kubutaka mwana ya bakala ya kitoko. Nge lenda yindula nkatu mpasi mutindu kyese na bau kumaka mawa ntangu bau yibukaka nsiku ya Farao. Kansi, ntangu Amrami ti Yokebedi talaka mwana na bau, bau bakaka lukanu ya ngolo ya kubuya yandi ve, nkatu kubanga malanda.​—⁠Kubasika 2:​1, 2; 6:⁠20.

Kusala na Lukwikilu

Amrami ti Yokebedi bumbaka mwana na bau bangonda tatu. (Kubasika 2:⁠2) Kansi, yau vandaka kima ya kigonsa sambu Baebreo vandaka kuzinga mfinama ti bantu ya Ezipte. Muntu yonso yina bo vandaka kuzwa kemeka kufwa nsiku ya Farao vandaka na ndola ya lufwa​—⁠yandi ti mwana. Ebuna, inki bibuti ya vumi yai lendaka kusala sambu na kubikala na luzingu, bau ti mwana na bau?

Yokebedi bakaka bipesi ya papirisi. Papirisi kele bonso lunzomfi mosi ya nene, ya kufwanana ti lubanzi, yau kele ti mikongo tatu ya nene bonso musapi. Yau lenda kuma nda kiteso ya bametre 6. Bantu ya Ezipte vandaka sadila yau bapapie, batapi, bapakapaka, basandale, ti babwatu ya pepele.

Yokebedi bakaka mikongo ya Papirisi mpi salaka kitunga mosi na nene ya mwana lenda kota. Na nima yandi pakulaka yau gudro sambu kitunga kukuma ngolo mpi masa kukota ve. Na nima Yokebedi tulaka mwana na yandi na kati ya kitunga mpi tululaka yau na kati ya matiti na lweka ya Nzadi Nile.​—⁠Kubasika 2:⁠3.

Bau Mezwa Mwana

Miriami, mwana ya Yokebedi ya nkento telamaka ntama mingi ve sambu na kutala inki lendaka kusalama na nima. Na nima, mwana-nkento ya Farao kwisaka na Nile sambu na kuyobila.a Ziku Yokebedi zabaka nde mwana ya ntotila vandaka tambula mingi na ndambu yina ya Nile mpi na luzolo ya mvimba yandi tulaka kitunga kisika muntu lenda mona nkatu mpasi. Beto kezaba kaka nde, mwana-nkento ya Farao monaka kitunga ya kutulula bonso buyambu na kati ya matiti, mpi yandi bingaka nsadi na yandi mosi na kubenda yau. Ntangu yandi monaka mwana na kati kedila, mawa simbaka yandi. Yandi bakisaka nde kuvandaka mwana ya Baebreo. Kansi, inki mutindu yandi lendaka kubika bau kufwa mwana ya kitoko mutindu yina? Katula mawa ya bumuntu na yandi, mbala yankaka kima ya kupusaka mwana ya Farao vandaka lukwikilu yai ya bantu ya Ezipte nde, na kukwenda na zulu, muntu fwete sala mambote mingi na ntangu yandi kezinga.b​—⁠Kubasika 2:​5, 6.

Miriami yina vandaka ketala, finamaka na mwana ya Farao mpi yulaka nde: “Pardo, keti nge zola mono kwenda kubingila nge nkento mosi ya Ba-Ebreo sambu na kwisa kupesa mwana yai mabele?” Mwana ya ntotila vutulaka nde: “Kwenda.” Miriami kwendaka ntinu na mama na yandi. Ntama mingi ve, Yokebedi monanaka na ntwala ya mwana ya Farao. Mwana ya ntotila songaka yandi nde: “Baka mwana yai, sansila mono yandi, ebuna mono ta futa nge.” Yau lenda vanda mpi nde na ntangu yina, mwana ya Farao kuzabaka nde Yokebedi vandaka mama ya mwana.​—⁠Kubasika 2:​7-9.

Yokebedi sansaka mwana na yandi tii ya yandi katulaka yandi na mabele.c Yau pesaka yandi mabaku ya kuluta mbote ya kulonga mwana mambu ya Nzambi ya kyeleka, Yehowa. Na nima, Yokebedi kwendaka kuvutula yandi na mwana-nkento ya Farao, yina pesaka mwana yango zina ya Moize, disongidila “yandi gulukaka na masa.”​—⁠Kubasika 2:​10, NW.

Dilongi Sambu na Beto

Amrami ti Yokebedi sadilaka dibaku ya ntangu fyoti ya bau vandaka na yau sambu na kulonga mwana na bau minsiku ya lusambu ya kugedila. Bubu bibuti fwete sala mutindu mosi. Ya kyeleka, bau fwete sala mutindu yina. Satana Dyabulu kele na “kuzieta bonso ntambu yina ke dila; yandi ke sosa muntu ya kudia.” (1 Piere 5:⁠8) Bantu ya yandi tazola kukanga kele baleke ya mbalu​—⁠ya babakala ti ya bankento​—⁠yina kele ti kivuvu ya kukuma bansadi ya mbote ya Yehowa. Bamvula na bau ya kindendi kesalaka yandi mawa ve! Sambu na mambu ya mutindu yai, bibuti ya mayele kelongaka bana na bau ya ndendi na kubanga Nzambi ya kyeleka, Yehowa.​—⁠Bingana 22:6; 2 Timoteo 3:​14, 15.

Na Baebreo 11:​23, kikesa ya Amrami ti Yokebedi na kubumbaka mwana na bau na bangonda ya ntete tatu ya luzingu na yandi metangama bonso kisalu ya lukwikilu. Bibuti yai yonso zole ya vandaka kubanga Nzambi monisaka kutula ntima na kiyeka ya lugulusu ya Yehowa na kubuyaka kuyambula mwana na bau, mpi bau bakilaka yau lusakumunu. Beto mpi fwete monisa kukangama ngolo na bansiku mpi minsiku ya Yehowa. Beto fwete tula ntima nde mambu yonso ya Yehowa kepesa nzila nde yau kubwila beto, yau tasadisa nsukansuka sambu na mambote mpi kyese na beto ya mvula na mvula.​—⁠Roma 8:⁠28.

[Banoti na nsi ya lutiti]