DILONGI 19
Keti Bambangi ya Yehowa Kele Bakristu ya Kieleka?
Beto Bambangi ya Yehowa, beto ke ndimaka nde beto kele Bakristu ya kieleka. Sambu na nki? Sambu na bikuma yai tatu: Kisika yina malongi na beto ke katukaka, zina yina ke salaka nde beto vanda ve mutindu mosi ti bantu ya nkaka mpi zola yina beto ke monisilanaka.
1. Malongi ya Bambangi ya Yehowa ke katukaka na wapi?
Yezu tubaka nde: ‘Ndinga ya Nzambi kele kieleka.’ (Yoane 17:17) Bonso Yezu, mambu yina Bambangi ya Yehowa ke longaka ke katukaka kaka na Ndinga ya Nzambi. Mu mbandu, beto tadila istware ya Bambangi ya Yehowa yina bo vandaka kubinga ntete balongoki ya Biblia. Pene-pene ya mvula 1870, balongoki yai ya Biblia yantikaka kulonguka Biblia ti dikebi ya mingi. Bo vandaka kukwikila na mambu yina bo vandaka kutanga na Biblia ata mambu yango vandaka ve mutindu mosi ti mambu yina mabundu ke longaka. Na nima, bo yantikaka kuzabisa bantu ya nkaka mambu yina bo vandaka kulonguka na Biblia.a
2. Sambu na nki beto ke kudibingaka Bambangi ya Yehowa?
Yehowa ke bingaka bansadi na yandi nde Bambangi na yandi sambu bo ke longaka bantu ya nkaka kieleka sambu na yandi. (Baebreo 11:4–12:1) Mu mbandu na ntangu ya ntama, Nzambi songaka bansadi na yandi nde: “Beno kele bambangi na mono.” (Tanga Yezaya 43:10.) Biblia ke bingaka Yezu nde “Mbangi ya Kwikama.” (Kusonga 1:5) Yo yina na 1931, beto bakaka zina Bambangi ya Yehowa. Beto ke vandaka na kiese ya kuvanda ti zina yai.
3. Inki mutindu Bambangi ya Yehowa ke landaka mbandu ya zola ya Yezu?
Yezu vandaka kuzola balongoki na yandi mingi, yo yina yandi vandaka kubaka bo bonso bampangi ya dibuta na yandi. (Tanga Marko 3:35.) Mutindu mosi mpi beto Bambangi ya Yehowa, beto ke vandaka bampangi ya dibuta ya ntoto ya mvimba ya ke zingaka na bumosi. Yo yina, beto ke binganaka bampangi. (Filemoni 1, 2) Beto ke lemfukaka mpi na mambu yai ya Biblia ke tubaka: “Beno zola kimvuka ya mvimba ya bampangi.” (1 Piere 2:17) Beto Bambangi ya Yehowa, beto ke monisaka zola yai na mitindu mingi. Mu mbandu, beto ke sadisaka bampangi na beto Bakristu ya ntoto ya mvimba ntangu bo ke vandaka na mfunu ya lusadisu.
LONGUKA MAMBU MINGI
Beto tadila mbote-mbote istware ya Bambangi ya Yehowa mpi mambu ya nkaka ya ke ndimisaka nde beto kele Bakristu ya kieleka.
Bakristu ya kieleka ke longaka mambu ya kele na Biblia
4. Mambu yina beto ke longaka ke katukaka na Biblia
Yehowa tubaka nde na bilumbu ya nsuka bantu ta bakisa mbote-mbote malongi ya Biblia. Beno tanga Daniele 12:4 mpi noti na nsi ya lutiti. Na nima beno pesa mvutu na ngiufula yai:
Inki ta “kuma mingi” mutindu bansadi ya Nzambi ta landa kulonguka Biblia?
Beto tala mutindu mpangi Charles Russell ti kimvuka mosi ya balongoki ya Biblia vandaka kulonguka Ndinga ya Nzambi. Beno tala VIDEO mpi na nima beno pesa mvutu na ngiufula ya ke landa.
Mutindu video me monisa yo, nki mutindu mpangi Charles Russell ti banduku na yandi vandaka kulonguka Biblia?
Keti nge zabaka yo?
Bantangu ya nkaka, beto ke sobaka mambu ya nkaka yina beto ke longaka. Sambu na nki? Kana ntangu me basika nsemo na yo ke monisaka bima malembe-malembe, mutindu mosi mpi Nzambi ke sadisaka beto na kubakisa Ndinga na yandi malembe-malembe. (Tanga Bingana 4:18.) Biblia ke sobaka ve. Kansi beto ke sobaka mambu ya beto ke longaka kana beto me kuma kubakisa yo diaka mbote.
5. Beto ke longaka mambu ya kieleka sambu na Yehowa
Sambu na nki beto me bakaka zina Bambangi ya Yehowa? Beno tala VIDEO mpi na nima beno pesa mvutu na ngiufula ya ke landa.
Sambu na nki zina Bambangi ya Yehowa me fwana sambu na beto?
Sambu na nki Yehowa me ponaka bantu na kuvanda Bambangi na yandi? Yandi me ponaka bo sambu bo sadisa bantu na kuzaba nde yandi kele Nzambi ya kieleka mpi kumonisa nde mambu mingi yina bantu ke tubaka sambu na yandi kele ya luvunu. Beto tubila kaka mambu zole ya luvunu yina bantu ke tubaka.
Mabundu ya nkaka ke longaka bandimi na bo nde Nzambi ke zolaka nde bo sadila biteki ntangu bo ke sambila yandi. Kansi, beno tanga Levi 26:1 mpi na nima beno pesa mvutu na bangiufula yai:
Biblia ke tubaka mpenza nki sambu na biteki? Inki mutindu Yehowa ke tadilaka kusadila biteki?
Bamfumu ya nkaka ya mabundu ke longaka nde Yezu kele Nzambi. Kansi, beno tanga Yoane 20:17 mpi na nima beno pesa mvutu na bangiufula yai:
Biblia ke tubaka mpenza nki sambu na Yezu? Keti Nzambi kele kiteso mosi ti Yezu?
Inki mutindu nge ke kudiwa mutindu nge me zaba nde Yehowa ke tindaka Bambangi na yandi na kulonga bantu kieleka sambu na yandi mpi Mwana na yandi?
6. Beto ke zolanaka
Biblia ke fwanisaka Bakristu ti bitini ya nitu ya muntu. Beno tanga 1 Bakorinto 12:25, 26 mpi na nima beno pesa mvutu na bangiufula yai:
Inki mambu Bakristu ya kieleka fwete sala ntangu bampangi na bo Bakristu ke mona mpasi?
Songa beto mambu ya nge me monaka na Bambangi ya Yehowa ya ke monisa mutindu bo ke monisilanaka zola.
Kana Bambangi ya Yehowa ya insi mosi ke mona mpasi, Bambangi ya Yehowa ya nkaka ya ntoto ya mvimba ke sadisaka bo na nswalu yonso. Sambu na kumona mbandu mosi, beno tala VIDEO. Na nima beno pesa mvutu na ngiufula ya ke landa.
Inki mutindu Bambangi ya Yehowa sadisaka bampangi na bo na nima ya mupepe yina ya ngolo?
Zola ke pusaka Bakristu ya kieleka na kusadisa bantu ya kele na mfunu ya lusadisu
BANTU YA NKAKA KE TUBAKA NDE: “Beno me monaka ve Yehowa. Ebuna sambu na nki beno me bakaka zina Bambangi ya Yehowa?”
Banda nki ntangu Yehowa ke bingaka bansadi na yandi nde Bambangi na yandi?
NA BUNKUFI
Bambangi ya Yehowa kele Bakristu ya kieleka. Beto kele bampangi ya dibuta ya ntoto ya mvimba. Mambu ya beto ke longaka ke katukaka na Biblia mpi beto ke longaka bantu mambu ya kieleka sambu na Yehowa.
Inki Nge Me Simba?
Sambu na nki beto me bakaka zina Bambangi ya Yehowa?
Inki mutindu beto ke sadilaka bampangi na beto mambu?
Keti nge ke ndima nde Bambangi ya Yehowa kele Bakristu ya kieleka?
TALA MPI
Tala filme mosi ya ke tubila istware ya Bambangi ya Yehowa.
Bambangi ya Yehowa—Lukwikilu ya Kemonana na Bisalu, Kitini 1: Kubasika na Mudidi (1:00:53)
Tala mbandu mosi ya ke monisa mutindu Bambangi ya Yehowa ke monisaka pwelele nde mambu yina mabundu mingi ke longaka kele ya luvunu.
Tala bamvutu na bangiufula yina nge lenda kudiyula sambu na Bambangi ya Yehowa.
“Bangiufula Yina Bantu Ke Yulaka Mingi Sambu na Bambangi ya Yehowa” (masolo ya kele na jw.org)
Stephen vandaka kumenga bantu ya mpusu ya nitu ya nkaka, yo yina yandi vandaka kunwanisa bo. Tala mutindu mambu yina yandi monaka na Bambangi ya Yehowa pusaka yandi na kusoba bikalulu na yandi.
“Luzingu na Mono Vandaka Kukuma Mbi Kuluta” (Nzozulu ya Nkengi, Yuli 1, 2015)
a Banda na mvula 1879, Bambangi ya Yehowa ke basisaka zulunalu Nzozulu ya Nkengi sambu na kutendula malongi ya Biblia.