Yehowa—Nzambi Yina Kelongaka
“[Yehowa, “NW”] ta longa bantu yonso.”—YOANE 6:45.
YEZU KRISTU katukaka na kusala bimpa ye ntangu yai yandi kele na kulongaka na sinagoga na Kapernaumi, na lweka ya nzadi ya Galilea. (Yoane 6:1-21, 59) Bantu mingi kumonisaka kukonda lukwikilu ntangu yandi kutubaka nde: “Mono katukaka na zulu.” Bau kubokutaka nde: “Yandi Yezu ve, mwana ya Yozefi? Beto zaba tata na yandi ti mama na yandi si. Nki mutindu yandi ke tuba nde yandi me katukaka na zulu?” (Yoane 6:38, 42) Na kunganinaka bau, Yezu tubaka nde: “Ata muntu mosi ve lenda kwisa na mono kana Tata yina tindaka mono me benda yandi ve; ebuna mono, mono ta pesa yandi diaka moyo na kilumbu ya nsuka.”—Yoane 6:44.
2 Lusilu ya kitoko ya inki mutindu—ya kufutumuka na kilumbu ya nsuka, ntangu Kimfumu ya Nzambi keyala! Beto lenda kwikila lusilu yai sambu Tata, Yehowa Nzambi, muntu mepesa yau. (Yobi 14:13-15; Yezaya 26:19) Ya kyeleka, Yehowa, ya kelonga nde bafwa tatelema, kele “longi ya nene ya kuluta bau yonso.” (Yobi 36:22, Today’s English Version) Na kulandaka kubenda dikebi na malongi ya Tata, Yezu kutubaka na nima nde: “Baprofete sonikaka mambu yai nde: ‘[Yehowa, NW] ta longa bantu yonso.’ ”—Yoane 6:45.
3 Ya kyeleka, yau fwanaka kuvanda dibaku ya mbote na kuvanda na ndonga ya bayina mbikudi Yezaya kusonikaka sambu na bau nde: “Mono mosi [Yehowa] ta longa bana na nge.” (Yezaya 54:13) Keti beto mpi lenda kuvanda? Banani kuvandaka bonso bana na yandi mpi kuzwaka malongi na yandi? Inki malongi ya moyo ya Yehowa beto fwete kuzaba mpi kusadila sambu na kubaka balusakumunu na yandi? Inki mutindu Yehowa kulongaka na ntangu ya ntama, mpi keti yandi kelongaka mutindu mosi bubu yai? Yai kele bangyufula ya beto tatadila.
Tata, Longi, Bakala
4 Yehowa kukumaka ntete Tata mpi Longi ntangu yandi kugangaka Mwana na yandi mosi kaka, Yezu ya kuzingaka na ntwala ya kukuma muntu. Yandi mebingama “Ndinga” sambu yandi kele Kinati-ndinga ya ntete ya Yehowa. (Yoane 1:1, 14; 3:16) Ndinga kusalaka “penepene na [Tata] bonso kapita ya kisalu,” mpi yandi kulongukaka mbote malongi ya Tata na yandi. (Bingana 8:22, 30) Na kutuba ya mbote, yandi kukumaka nsadi to kisadilu, ya Nzambi kusadilaka na kuganga bima ya nkaka yonso, na kati na yau, “bana ya Nzambi” ya kimpeve. Kyese ya inki mutindu bau kuvandaka na yau na kulongama na Nzambi! (Yobi 1:6; 2:1; 38:7; Kolosai 1:15-17) Na nima, muntu ya ntete, Adami, kugangamaka. Yandi mpi kuvandaka “mwana ya Nzambi,” ye Biblia kemonisa nde Yehowa kulongaka yandi.—Luka 3:38; Kuyantika 2:7, 16, 17.
5 Na mawa yonso, Adami, na nkolama na yandi ya luzolo ya mvimba, kuvidisaka dibaku na yandi ya kulanda kuvanda mwana ya Nzambi. Yau yina, bana na yandi, na lufulu ya mbutuka mpamba, lendaka ve kutuba nde bau kele ti ngwisani ya kuvanda bana ya Nzambi. Kansi, Yehowa kulongaka bantu ya konda kukuka yina kusosaka lutwadisu na yandi. Mu mbandu, Noa, kupesaka nzikisa ya kuvanda “[muntu ya lunungu, NW]” yina “kutambulaka ti Nzambi ya kyeleka,” ebuna Yehowa kulongaka Noa. (Kuyantika 6:9, 13–7:5) Na bulemfu na yandi, Abrahami kudimonisaka “nduku ya Yehowa,” yau yina yandi mpi kulongamaka na Yehowa.—Yakobo 2:23; Kuyantika 12:1-4; 15:1-8; 22:1, 2.
6 Ntangu mwa mingi na nima, na bilumbu ya Moize, Yehowa kukotaka na kinduku ya kuwakana ti kikanda ya Izraele. Bonso mbutu, kikanda yina kukumaka bantu ya kuponama na yandi mpi kutadilamaka bonso “mwana” na yandi. Nzambi kutubaka nde: “Izraele kele mwana na mono.” (Kubasika 4:22, 23; 19:3-6; Kulonga 14:1, 2) Na lufulu ya kinduku ya kuwakana yina, bantu ya Izraele lendaka kutuba, mutindu yau mesonama na mbikudi Yezaya nde: “Nge Mfumu Nzambi, nge kele [T]ata na beto.” (Yezaya 63:16) Yehowa kulungisaka mukumba na yandi ya kitata ye na zola yonso yandi kulongaka bana na yandi, Izraele. (Nkunga 71:17; Yezaya 48:17, 18) Ya kyeleka, ntangu bau kukumaka ya konda kwikama, na nkenda yonso, yandi kudodokilaka bau nde: “Beno kwisa vutuka beno bana ya mubulu.”—Yeremia 3:14.
7 Bonso malanda ya kinduku ya ngwakana ti Izraele, Yehowa kukumaka mpi, na mutindu ya kifwani, Bakala ya kikanda, ye yau kukumaka nkento na yandi ya kifwani. Sambu na yandi mbikudi Yezaya kusonikaka nde: “Muntu yina salaka nge, yandi yina muntu ta vanda bakala na nge, zina na yandi [Yehowa ya minkangu, NW].” (Yezaya 54:5; Yeremia 31:32) Ata nkutu Yehowa kulungisaka mukumba na yandi bonso Bakala na lukumu yonso, kikanda ya Izraele kukumaka nkento ya konda kwikama. Yehowa kutubaka nde: “Mutindu nkento ketinaka nduku na yandi ti ngyekula yonso, mutindu mosi nge, O nzo ya Izraele, mesadila mono ti ngyekula yonso.” (Yeremia 3:20, NW) Yehowa kulandaka kubinga bana ya nkento na yandi ya konda kwikama; yandi kulandaka na kuvanda “Longi na bau ya Nene.”—Yezaya 30:20; 2 Bansangu 36:15.
8 Ntangu Izraele kubuyaka mpi kufwaka Mwana na Yandi, Yezu Kristu, Nzambi, nsukansuka, kubuyaka yau. Yau yina, kikanda ya Bayuda kuvandaka dyaka ve nkento ya kifwani sambu na yandi, yandi mpi vandaka dyaka ve Tata ye Longi ya bana na yandi ya kuyungana. (Matayo 23:37, 38) Kansi, Izraele kuvandaka mbandu, to kifwani mpamba ya nkento. Ntumwa Polo kusonikaka ntela ya kele na Yezaya 54: 1, yina ketubila “[nkento ya mukobo, NW]” ya kele ya kuswaswana mpi ya kugambuka ti “nkento yina ke zinga na dibala,” kikanda ya Izraele ya kinsuni. Polo kutendulaka nde Bakristu ya kupakulama kele bana ya “nkento ya mukobo,” ya mebingama “Yeruzalemi ya zulu.” Nkento ya kifwani ya kyeleka yai kele organizasio ya zulu ya Nzambi ya bigangwa ya kimpeve.—Galatia 4:26, 27.
9 Yau yina, na sinagoga ya Kapernaumi, ntangu Yezu kutubilaka ntela ya mbikudulu ya Yezaya yai nde: “Mono mosi [Yehowa] ta longa bana na nge,” yandi vandaka kutuba sambu na bayina takuma “bana” ya “Yeruzalemi ya zulu,” organizasio ya zulu ya kele bonso nkento ya Nzambi. Na kundimaka malongi ya mumonisi ya Nzambi ya kukatukaka na zulu, Yezu Kristu, bawi yina ya Bayuda lendaka kukituka bana ya nkento ya zulu ya Nzambi yina kuvandaka ntete mukobo mpi kutungaka “kikanda ya santu,” “Izraele ya Nzambi” ya kimpeve. (1 Piere 2:9, 10; Galatia 6:16) Na kutendulaka dibaku ya nene ya Yezu kukangulaka na kukuma bana ya kimpeve ya Nzambi, ntumwa Yoane kusonikaka nde: “Yandi kwisaka na nsi na yandi mosi, kansi bampangi na yandi yambaka yandi ve. Kansi bantu ya nkaka yambaka yandi, bo ndimaka yandi mpi na ntima na bo. Ebuna yandi pesaka bo kiyeka ya kukituka bana ya Nzambi.”—Yoane 1:11, 12.
Malongi ya Moyo ya Yehowa
10 Yehowa, bonso Tata ya zola, kezabisaka bana na yandi balukanu na yandi. Yau yina, ntangu wanzyo mosi ya nkolama kubendaka bankwelani ya ntete na kukolama, na mbala mosi Yehowa kuzabisaka yina yandi fwanaka kusala na kulungisa lukanu na yandi ya kukumisa ntoto paladisu. Yandi tubaka nde yandi tatula kimbeni na kati ya “[nyoka ya kisina, NW],” yina kele Satana Dyabulu, “ti nkento.” Yandi kutendulaka nde “[nkuna, NW]” ya nkento tadyata Satana na kiteso ya kufwa, “na ntu.” (Kuyantika 3:1-6, 15; Kusonga 12:9; 20:9, 10) Mutindu beto metuba, nkento—ya kuzabanaka na nima bonso “Yeruzalemi ya zulu”—kele organizasio ya zulu ya Nzambi ya bigangwa ya kimpeve. Kansi “nkuna” na yandi kele nani? Yandi kele Mwana ya Nzambi, Yezu Kristu, yina kutindamaka tuka na mazulu mpi yina fwete kufwa Satana na nsuka.—Galatia 4:4; Baebreo 2:14; 1 Yoane 3:8.
11 Yehowa kutemunaka dyaka mingi dilongi ya moyo yai ya ketadila “nkuna” ntangu yandi kusilaka na Abrahami nde: “Ya kyeleka mono tabilamisa nkuna na nge bonso bambwetete ya mazulu . . . Ye na nsadisa ya nkuna na nge makanda yonso ya ntoto tabaka lusakumunu.” (Kuyantika 22:17, 18, NW) Yehowa kusadilaka ntumwa Polo sambu na kutendula nde Yezu Kristu kele Nkuna ya Abrahami ya kusilamaka; kansi yau kulombamaka nde bankaka mpi kukituka kitini ya “nkuna.” Polo kusonikaka nde: “Kana beno kele bantu ya Kristu, beno kele nkuna ya kyeleka ya Abrahami, bamvingidi-difwa sambu na lusilu mosi.”—Galatia 3:16, 29, NW.
12 Yehowa mpi kutendulaka nde Kristu, Nkuna, tabasika na kikanda ya kimfumu ya Yuda ye “bulemfu ya bantu tavanda,” na yandi. (Kuyantika 49:10, NW) Na yina metadila Ntotila Davidi ya kikanda ya Yuda, Yehowa kusilaka nde: “Mono tazingisa nkuna na yandi mvula na mvula ye kiti na yandi ya kimfumu tavanda bonso bilumbu ya zulu. Nkuna na yandi tavanda mvula na mvula, ye kiti na yandi ya kimfumu tavanda bonso ntangu na ntwala na mono.” (Nkunga 89:3, 4, 29, 36, NW) Ntangu wanzyo Gabriele kusamunaka lubutuku ya Yezu, yandi kutendulaka nde mwana kuvandaka Ntwadisi ya Nzambi kuponaka, Nkuna ya Davidi. Gabriele kutubaka nde: “Yandi ta vanda muntu ya nene. Zina na yandi ta vanda Mwana ya [Nkwa Kayenge, NW]. Mfumu Nzambi ta tula yandi ntotila bonso vandaka nkaka na yandi Davidi . . . kimfumu na yandi ta suka ve.”—Luka 1:32, 33; Yezaya 9:6, 7; Daniele 7:13, 14.
13 Sambu na kuzwa balusakumunu ya Yehowa, beto fwete kuzaba mpi kusadila dilongi ya moyo ya Yehowa yai ya metadila Kimfumu ya Nzambi. Beto fwete kukwikila nde Yezu kukatukaka na zulu, yandi kele Ntotila ya Nzambi kusolaka—Nkuna ya kimfumu ya takengila paladisu ya ntoto yina tavutulama—mpi nde yandi tafutumuna bafwa. (Luka 23:42, 43; Yoane 18:33-37) Na Kapernaumi ntangu Yezu kutubilaka lufutumuku ya bafwa, yau fwanaka kuvanda pwelele na Bayuda nde yandi tubaka kyeleka. Sambu mwa bamposo fyoti na ntwala, ziku kaka kuna na Kapernaumi, yandi futumunaka mwana-nkento ya bamvula 12 ya ofisie ya sinagoga! (Luka 8:49-56) Na ntembe ve beto mpi kele ti bikuma ya kufwana ya kukwikila mpi kusala na kuwakana ti malongi ya Yehowa, ya kepesaka kivuvu, yina metadila Kimfumu na yandi!
14 Yezu kutambikaka luzingu na yandi ya ntoto sambu na kulongaka mambu metadila Kimfumu ya Yehowa. Yandi kukumisaka yau ntu-dyambu ya kisalu na yandi, nkutu mpi yandi kulongaka balandi na yandi na kusamba sambu na yau. (Matayo 6:9, 10; Luka 4:43) Bayuda ya kinsuni vandaka na nzila ya kukuma “bana ya kimfumu,” kansi sambu na kukonda lukwikilu, ntalu ya mingi na kati na bau kuvidisaka dibaku yina. (Matayo 8:12; 21:43) Yezu kutendulaka nde kaka “kibuka ya fyoti” kezwa dibaku ya kukituka “bana ya kimfumu.” “Bana” yina kekituka “[bamvingidi-difwa ti Kristu, NW]” na Kimfumu na yandi ya zulu.—Luka 12:32; Matayo 13:38; Roma 8:14-17; Yakobo 2:5, NW.
15 Bamvingidi-difwa ya kimfumu ikwa Kristu kenata na zulu sambu na kuyala ntoto ti yandi? Na kutadilaka Biblia, kaka 144000. (Yoane 14:2, 3; 2 Timoteo 2:12; Kusonga 5:10; 14:1-3; 20:4) Kansi Yezu kutubaka nde yandi vandaka ti “mameme ya nkaka,” ya tavanda bantu ya ntoto ya luyalu ya Kimfumu yina. Bayai tasepela na mavimpi mpi ngemba ya kukuka mvula na mvula na paladisu ya ntoto. (Yoane 10:16; Nkunga 37:29; Kusonga 21:3, 4) Beto kele na mfunu ya kubakisa mpi kuvanda ya kukuka na kutendula dilongi ya Yehowa ya metadila Kimfumu.
16 Ntumwa Polo kumonisaka dilongi ya moyo ya nkaka ya Yehowa. Yandi tubaka nde: “Nzambi [melongaka, NW] beno mosi nki mutindu beno fweti kuzolana beno na beno.” (1 Tesalonika 4:9) Sambu na kuyangidika Yehowa beto fwete kumonisa zola ya mutindu yina. Biblia ketuba nde “Nzambi kele zola,” ye beto fwete kufulula mbandu na yandi na kumonisa zola. (1 Yoane 4:8; Efezo 5:1, 2) Na mawa yonso, bantu mingi menungaka ve na kumonisa zola na bampangi na bau mutindu Nzambi kelonga beto na kusala. Ebuna beto mosi? Keti beto mendimaka dilongi yai ya Yehowa?
17 Yau kele dyambu ya moyo nde beto kuyamba malongi yonso ya Yehowa. Bika nkadilu na beto kuvanda yina ya muyimbi Bankunga ya Biblia ya kusonikaka nde: “Mfumu, songa mono nzila ya nge zola nde mono kulanda, longa mono mutindu ya nge zola. Longa mono na kulanda na banzila na nge ya kieleka.” “Longa mono bansiku na nge. [Longa mono mambote, mawi mpi nzayilu, NW] . . . Longa mono bansiku na nge.” (Nkunga 25:4, 5; 119:12, 66, 108) Kana mawi na nge kele bonso yina ya muyimbi Bankunga, nge lenda kuvanda na kati ya kibuka ya nene ya kele na kulongama na Yehowa.
Kibuka ya Nene ya Bantu ya Melongama
18 Mbikudi Yezaya kutubaka na ntwala mambu ya fwanaka kubwa na ntangu na beto: “[Na ndambu ya nsuka ya bilumbu, NW] ngumba yina ya kele Nzo-Nzambi ta kuma ngumba mosi ya nda mpenza, yo ta luta bangumba yonso na nda. Bantu mingi ta kwisa kufuluka kuna, bo ta tuba nde: ‘beto tombuka na ngumba ya Mfumu Nzambi, beto kwenda na nzo ya Nzambi ya Yakobi, yandi muntu ta longa beto mambu ya yandi ke zola nde beto sala.’ ” (Yezaya 2:2, 3; Mishe 4:2, beto bantu metengimisa bisono.) Bantu yai ya melongama na Yehowa kele banani?
19 Bau kele bankaka na lweka ya bayina tayala na zulu ti Kristu. Bonso yau kutubamaka ntete, Yezu kutubaka nde yandi kele ti “mameme ya nkaka”—bantu ya Kimfumu tayala na ntoto—ngika na zulu ya “kibuka ya fyoti” ya bamvingidi-difwa ya Kimfumu. (Yoane 10:16; Luka 12:32) “Kibuka ya nene,” yina keguluka na “mpasi ya nene,” kele na kalasi ya mameme ya nkaka, ye bau kesepela na kutelema ya kundimama na ntwala ya Yehowa na lufulu ya lukwikilu na bau na menga ya Yezu ya kutyamukaka. (Kusonga 7:9, 14) Ata nkutu mameme ya nkaka kele ve mbala mosi na kati ya “bana” ya metubilama na Yezaya 54:13, bau mesakumunama na kulongama na Yehowa. Yau yina, bau kele na nswa ya kubinga Nzambi nde “Tata” sambu, na kutuba ya mbote, yandi tavanda Nkaka na bau na nzila ya “Tata ya Mvula na Mvula,” Yezu Kristu.—Matayo 6:9; Yezaya 9:6.
Yehowa Kelongaka Inki Mutindu
20 Yehowa kelongaka na mitindu mingi. Mu mbandu yandi kesalaka yau na nsadisa ya bisalu ya lugangu na yandi, ya kepesa nzikisa nde yandi kele mpi ya mayele na yandi ya mingi. (Yobi 12:7-9; Nkunga 19:1, 2; Roma 1:20) Dyaka, yandi kelongaka na disolo ya mbala mosi, mutindu yandi kusalaka na kulongaka Yezu ya kuzingaka na ntwala kukuma muntu. Mutindu mosi, na baokazio tatu ya kusonamaka, yandi kutubaka mbala mosi na bantu na zulu ya ntoto tuka zulu.—Matayo 3:17; 17:5; Yoane 12:28.
21 Yehowa mpi kusadilaka bawanzyo bonso bamonisi sambu na kulonga, kumosi ti Mwana na yandi ya ntete, “Ndinga.” (Yoane 1:1-3) Ata Yehowa lendaka kutuba mbala mosi na mwana na yandi ya muntu ya kukuka, Adami, na masamba ya Edeni, yau fwete kuvanda nde yandi kusadilaka Yezu ya kuzingaka na ntwala kukuma muntu na kutuba sambu na Yandi. (Kuyantika 2:16, 17) Ziku yandi kuvandaka “Wanzio ya Nzambi yina ya vandaka kwenda na ntwala ya bantu ya Israele” mpi na yina metadila yandi Yehowa kutumaka nde: “Beno wila yandi.” (Kubasika 14:19; 23:20, 21) Mbefula kele ve nde Yezu ya kuzingaka na ntwala kukuma muntu kuvandaka mpi “mfumu ya basoda ya Mfumu Nzambi” ya kumonanaka na ntwala ya Yozue sambu na kusyamisa yandi. (Yozue 5:14, 15) Yehowa mpi kusadilaka bawanzyo ya nkaka na kunata malongi na yandi, bonso bayina ya yandi kusadilaka na kupesa Nsiku na yandi na Moize.—Kubasika 20:1; Galatia 3:19; Baebreo 2:2, 3.
22 Na ngika, Yehowa Nzambi kusadilaka bantu bonso bamonisi na kulonga. Bibuti na Izraele kuvandaka na ntuma ya kulonga bana na bau; bambikudi, banganga-Nzambi, bana ya bantotila, ti Balevi kulongaka Nsiku ya Yehowa na kikanda. (Kulonga 11:18-21; 1 Samuele 12:20-25; 2 Bansangu 17:7-9) Yezu kuvandaka Kinati-ndinga ya ntete ya Yehowa na zulu ya ntoto. (Baebreo 1:1, 2) Yezu kutubaka mbala mingi nde mambu ya yandi vandaka kutuba kuvandaka kibeni yina yandi kulongukaka na Tata, yau yina, na kutuba ya mbote, bawi na yandi vandaka kulongama na Yehowa. (Yoane 7:16; 8:28; 12:49; 14:9, 10) Yehowa kusonikisaka ndinga na yandi, ye na bilumbu na beto yandi kelongaka bantu ntetentete na nsadisa ya Masonuku ya kupemama yina.—Roma 15:4; 2 Timoteo 3:16.
23 Beto kele na kuzinga na bantangu ya mfunu, sambu Masonuku kesila nde ‘na ndambu ya nsuka ya bilumbu [yai ya beto kezinga] bantu mingi talongama na yina metala banzila ya Yehowa.’ (Yezaya 2:2, 3, NW) Inki mutindu malongi yai kepesamaka? Inki beto fwete kusala sambu na kubaka mambote, ti kubaka mpi kabu, ya manaka ya ndongolo ya nene ya Yehowa yina kele na kuyela ntangu yai? Beto tatadila bangyufula ya mutindu yai na disolo ya kelanda.
[Study Questions]
1. Na wapi Yezu kusalaka bimpa, mpi inki yandi kele na kusalaka kuna ntangu yai?
2. Na inki lufulu beto lenda kukwikila lusilu ya Yezu yina ketadila lufutumuku?
3. Inki bangyufula beto tatadila?
4. Nani na kati ya bana ya Nzambi kuzwaka ntete malongi na yandi?
5. Inki dibaku ya kitoko Adami kuvidisaka, kansi nani Yehowa kulongaka, mpi sambu na inki?
6. Nani Yehowa kwisaka kumona bonso “mwana” na yandi, ye longi ya inki mutindu yandi kuvandaka sambu na bau?
7. Inki kinduku Yehowa kuvandaka na yau ti Izraele?
8. Ata nkutu Izraele, bonso kikanda, kubuyamaka na Yehowa, inki nkento ya kifwani ya kyeleka yandi mebakaka?
9. (a) Yezu vandaka kutubila banani ntangu yandi tubaka nde ‘[Yehowa] ta longa bana na nge’? (b) Na inki lufulu bantu kekituka bana ya kimpeve ya Nzambi?
10. Inki Yehowa kulongaka na mbala mosi na nima ya nkolama ya Edeni, yina metadila “nkuna,” ye Nkuna yango kwisaka kumonana nani?
11, 12. Inki mutindu Yehowa kutemunaka dyaka mingi dilongi na yandi ya moyo ya metadila “Nkuna”?
13. Sambu na kubaka balusakumunu ya Yehowa, inki mutindu beto fwete kutadila malongi na yandi?
14, 15. (a) Kimfumu ya Yehowa kele na mfunu ya inki mutindu na meso ya Yezu? (b) Inki beto kele na yau mfunu sambu na kubakisa mpi kukuka na kutendula mambu ya metadila Kimfumu ya Yehowa?
16. Inki dilongi ya mfunu ya Yehowa ya beto fwete kulonguka mpi kusadila?
17. Nkadilu ya nani beto fwete kufulula?
18. Inki mbikudi Yezaya yitaka kutuba yina tabwa na ntangu na beto?
19. Banani bubu yai kele na kati ya bayina kelongama na Yehowa?
20. Na inki mitindu Yehowa kelongaka?
21. Inki wanzyo Yehowa kusadilaka na kingenga bonso mumonisi na yandi, kansi inki mutindu beto kezaba nde bankaka mpi kusadilamaka?
22. (a) Banani na zulu ya ntoto Yehowa kusadilaka sambu na kulonga? (b) Na nsadisa ya inki ntetentete Yehowa kelongilaka bantu bubu yai?
23. Inki bangyufula tatadilama na disola ya kelanda?
[Caption on page 1]
[Bangyufula]
[Caption on page 21]
[Ntendula ya Bifwanisu ya lutiti 21]
Lufutumuku ya mwana-nkento ya Dairusi pesaka lufulu sambu na kukwikila lusilu ya Yezu ya lufutumuku
[Caption on page 1]
Inki Mutindu Nge Tapesa Mvutu?
◻ Inki mutindu Yehowa kukumaka Tata, Longi, mpi Bakala?
◻ Inki Yehowa kelonga na yina metadila “nkuna”?
◻ Inki dilongi ya moyo ya Nzambi beto fwete kutadila?
◻ Inki mutindu Yehowa kelongaka?