Ndima Kiyeka ya Kristu na Organizasio ya Nzambi

“NA LUYANTIKU Nzambi gangaka zulu ti ntoto” mpi bima yonso yina yandi salaka vandaka “mbote kibeni.” (Kuy. 1:1, 31) Yehowa gangaka bantu ti kivuvu ya kuzinga na kiese mvula na mvula. Kansi, kukolama ya Edeni katulaka sambu na ntangu fioti luzingu ya kiese yina bantu vandaka na yo. Ata mpidina, lukanu ya Yehowa sambu na ntoto mpi bantu sobaka ve. Nzambi tubaka nde yandi ta gulusa bana ya Adami yina ta lemfukila yandi; yandi ta vutula lusambu ya kieleka mpi ta fwa muntu ya mbi ti bisalu na yandi yonso ya mbi. (Kuy. 3:15) Na mbala yai mpi mambu ta vanda diaka “mbote kibeni.” Yehowa ta lungisa mambu yai na nzila ya Mwana na yandi, Yezu Kristu. (1 Yoa. 3:8) Yo yina, beto fwete ndima kiyeka yina Kristu kele na yo na organizasio ya Nzambi.—Bis. 4:12; Bafil. 2:9, 11.

KIYEKA YA KRISTU

² Kana beto ke yindula kiyeka yina Kristu kele ti yo na organizasio ya Nzambi, beto ta bakisa mambu mingi ya ke tadila kiyeka na yandi. Yezu kele Ngulunsi ya bantu, Nganga-Nzambi ya Nene, Mfumu ya dibundu ya Bukristu mpi bubu yai yandi kele Ntotila ya Kimfumu ya Nzambi. Kana beto ke yindula mingi biyeka yai ya Yezu, beto ta kuma ti ntonda mingi sambu na organizasio ya Nzambi mpi beto ta kuma kuzola Yezu Kristu mingi. Biblia ke tendula biyeka ya nkaka ya Yezu.

³ Ntangu Kristu vandaka kusamuna na ntoto, yo monanaka pwelele nde bantu ya bulemfu zolaka kuwakana diaka ti Nzambi na nzila ya Yezu. (Yoa. 14:6) Sambu Yezu kele Ngulusi ya bantu, yandi pesaka kimenga na yandi sambu na bantu mingi. (Mat. 20:28) Yo yina, Yezu kele kaka ve muntu yina pesaka mbandu ya bikalulu ya mbote. Kansi, yandi kele muntu ya kuluta mfunu na kulungana ya lukanu ya Yehowa sambu na bantu. Nzambi lenda ndima beto diaka kaka na nzila na yandi. (Bis. 5:31; 2 Bak. 5:18, 19) Kimenga ya Yezu mpi lufutumuku na yandi me kangudilaka bantu ya bulemfu nzila ya kubaka balusakumunu ya kukonda nsuka na luyalu ya Kimfumu ya Nzambi yina kele na zulu.

⁴ Sambu Yezu kele Nganga-Nzambi ya Nene, yandi lenda “wila beto mawa sambu na bifu na beto” mpi yandi lenda lolula masumu ya balongoki na yandi yina me kudipesaka na Nzambi awa na ntoto. Ntumwa Polo tubaka nde: “Beto kele ve ti nganga-nzambi ya nene yina lenda wila beto ve mawa sambu na bifu na beto, kansi beto kele ti nganga-nzambi ya nene yina bo mekaka na mambu yonso mutindu bo me mekaka beto, kansi yandi salaka ve disumu.” Na nima, Polo siamisaka bantu yina ke kwikilaka na Yezu Kristu na kubaka mambote na mambu yina Nzambi me yidikaka sambu beto wakana diaka ti yandi. Yandi tubaka nde: “Yo yina, beto pusana ti masonga pene-pene ya kiti ya kimfumu ya ntima ya mbote ya nene, sambu Nzambi kuwila beto mawa mpi kumonisila beto ntima ya mbote ya nene sambu na kusadisa beto na ntangu ya mbote.”—Baeb. 4:14-16; 1 Yoa. 2:2.

⁵ Yezu kele mpi Mfumu ya dibundu ya Bukristu. Bonso balongoki ya Yezu ya mvu-nkama ya ntete, bubu yai beto kele ve ti mfunu nde muntu kutwadisa beto. Yezu ke twadisaka dibundu na nzila ya mpeve santu mpi ya bankuluntu yina me fwana mpi yina yandi ti Tata na yandi ya zulu ta sambisa na mutindu bo ke kebaka mameme ya Nzambi. (Baeb. 13:17; 1 Pie. 5:2, 3) Na mbikudulu mosi, Yehowa tubaka mambu yai sambu na Yezu: “Tala! Mono me tula yandi mbangi sambu na makanda, ntwadisi mpi komanda sambu na makanda.” (Yez. 55:4) Yezu monisaka kulungana ya mbikudulu yai ntangu yandi songaka balongoki na yandi nde: “Beno bika mpi ve nde bantu kubinga beno bantwadisi, sambu beno kele kaka na Ntwadisi mosi, Kristu.”—Mat. 23:10.

⁶ Yezu kele ti luzolo ya mbote ya kusadisa beto, yo yina yandi ke songa beto nde: “Beno kwisa na mono, beno yonso ya ke mona mpasi mpi ya ke nata kilo ya mingi, ebuna mono ta pesa beno kikesa. Beno baka vangu na mono na mapeka na beno, mpi beno longuka na mono, sambu mono kele mawete mpi ya kudikulumusa na ntima, ebuna beno ta baka kikesa sambu na beno mosi. Sambu vangu na mono kele mpasi ve na kunata mpi kizitu na mono kele kilo ve.” (Mat. 11:28-30) Yezu Kristu me monisaka nde yandi kele “ngungudi ya mbote” bonso Yehowa Nzambi, Tata na yandi ya zulu sambu yandi ke twadisaka mambu ya dibundu ya Bukristu na mawete mpi na mutindu yina ke pesaka beto kikesa.—Yoa. 10:11; Yez. 40:11.

⁷ Na mukanda ya ntete yina Polo sonikilaka Bakristu ya Korinto, yandi tubilaka mpi diambu ya nkaka sambu na kiyeka ya Yezu Kristu, yandi tubaka nde: “Yandi fwete yala bonso ntotila tii kuna Nzambi ta tula bambeni yonso na nsi ya makulu na yandi. Kansi ntangu Nzambi ta tula bima yonso na nsi na yandi, Mwana yandi mosi mpi ta kuditula na nsi ya Muntu yina tulaka bima yonso na nsi na yandi, sambu Nzambi kuvanda bima yonso sambu na bantu yonso.” (1 Bak. 15:25, 28) Yezu vandaka “kapita ya kisalu” ya Nzambi na ntwala ya kukwisa na ntoto; yandi vandaka muntu ya ntete yina Nzambi gangaka. (Bing. 8:22-31) Ntangu Nzambi tindaka Yezu na ntoto, yandi vandaka kusala luzolo ya Nzambi ntangu yonso. Yandi kangaka ntima na kumekama ya kuluta ngolo mpi yandi fwaka ya kwikama na Tata na yandi. (Yoa. 4:34; 15:10) Nzambi futumunaka Mwana na yandi sambu na kuzinga na zulu mpi pesaka yandi kiyeka ya kuvanda Ntotila ya Kimfumu ya zulu sambu yandi bikalaka ya kwikama tii na lufwa (Bis. 2:32-36) Sambu Kristu Yezu kele Ntotila, Nzambi me pesaka yandi kisalu ya nene ya kutwadisa bamilio ya bigangwa ya kimpeve ya ngolo sambu na kukatula luyalu ya bantu mpi mambu yonso ya mbi na ntoto. (Bing. 2:21, 22; 2 Bate. 1:6-9; Kus. 19:11-21; 20:1-3) Na nima, kaka Kimfumu ya Nzambi yina Kristu ta twadisa ta yala ntoto ya mvimba.—Kus. 11:15.

KUNDIMA KIYEKA NA YANDI KE TENDULA INKI?

⁸ Yezu Kristu, Mbandu na beto, kele muntu ya kukuka. Nzambi me pesaka yandi mukumba ya kutanina beto. Sambu na kubaka mambote ya lutaninu na yandi ya zola, beto fwete bikala ya kwikama na Yehowa mpi kulanda kutambula ti organizasio na yandi yina ke kwenda na ntwala.

⁹ Balongoki ya Yezu ya mvu-nkama ya ntete ndimaka kibeni kiyeka ya Kristu na organizasio ya Nzambi. Bo monisaka yo mutindu bo vandaka kusala na bumosi na lutwadisu ya Kristu; bo vandaka kulemfuka na lutwadisu yina yandi vandaka kupesa na nzila ya mpeve santu. (Bis. 15:12-21) Ntumwa Polo tubilaka bumosi ya dibundu ya Bakristu yina bo me tulaka mafuta ntangu yandi sonikaka nde: “Beto tuba kieleka, mpi beto yela na zola na mambu yonso na kuwakana ti muntu yina kele ntu, disongidila Kristu. Bo me vukisaka nitu ya mvimba mbote-mbote na yandi mpi konso kitini ke sadisaka kitini ya nkaka na kupesa konso kima yina kele mfunu. Kana konso kitini ke sala mbote-mbote, yo ke sadisaka nitu na kuyela ntangu yo ke kuditunga na zola.”—Baef. 4:15, 16.

¹⁰ Kana bampangi yonso ke wakana mbote mpi ke sala na bumosi na lutwadisu ya Kristu, dibundu ta yela mpi beto ta monisa zola, yina “ke vukisaka beto na mutindu ya kukuka.”—Yoa. 10:16; Bakol. 3:14; 1 Bak. 12:14-26.

¹¹ Mambu ya ke salama na nsi-ntoto ke lungisa bambikudulu ya Biblia mpi yo ke monisa pwelele nde banda na 1914, Nzambi me pesaka Yezu Kristu Kimfumu. Yandi ke yala ntangu yai na kati ya bambeni na yandi. (Nk. 2:1-12; 110:1, 2) Yo ke tendula nki sambu na bantu yina ke zinga na ntoto bubu yai? Ntama mingi ve, Yezu ta monisa nde yandi kele Ntotila ya bantotila mpi Mfumu ya bamfumu ntangu yandi ta fwa bambeni na yandi. (Kus. 11:15; 12:10; 19:16) Na nima, Yehowa ta lungisa mambu yina yandi silaka ntangu Adami kolamaka disongidila yandi ta gulusa bantu yina kele na diboko ya kitata ya Kristu, bantu yina yandi me ndimaka. (Mat. 25:34) Beto kele na kiese kibeni mutindu beto me ndimaka kiyeka ya Kristu na organizasio ya Nzambi! Yo yina, bika beto landa kuvanda na bumosi sambu na kusamuna na ntoto ya mvimba na bilumbu yai ya nsuka na lutwadisu ya Kristu.