2 Timoteo 1:7—“Mpeve Yina ya Nzambi Pesaka Beto Ke Katulaka Kikesa na Beto Ve”

“Sambu Nzambi pesaka beto ve mpeve ya kukonda kikesa, kansi yandi pesaka beto mpeve ya ngolo, ya zola, mpi ya mabanza ya mbote.”—2 Timoteo 1:7, Mbalula ya Nsi-Ntoto ya Mpa.

“Sambu Mpeve yina ya Nzambi pesaka beto ke katulaka kikesa na beto ve; kansi Mpeve na yandi ke pesaka beto ngolo, yandi ke sadisaka beto na kuzolana, yandi ke songaka beto mpi mutindu beto fweti kudiyala.”—2 Timoteo 1:7, Bible en Kituba.

Ntendula ya 2 Timoteo 1:7

Nzambi lenda sadisa muntu na kusala mambu ya mbote na kikesa yonso. Nzambi ke zolaka ve nde bantu kubwa na mutambu ya “kukonda kikesa,” disongidila boma ya mbi yina lenda kanga bo nzila ya kusala mambu yina ke pesaka Nzambi kiese.

Beto tadila bikalulu tatu ya Nzambi me pesaka beto ya kele na verse yai, yina ke sadisaka beto na kununga boma to kukonda kikesa.

“Ngolo.” Bakristu me sadilaka Nzambi na kikesa yonso ata bo me kutanaka ti bambeni mpi bampasi mingi ya ngolo. Bo ke vutukaka ve nima sambu na boma. (2 Bakorinto 11:23-27) Inki mutindu bo ke salaka yo? Ntumwa Polo ke pesa mvutu yai: “Sambu na mambu yonso, mono kele ti ngolo na nzila ya muntu yina ke pesaka mono ngolo.” (Bafilipi 4:13) Nzambi lenda pesa bansadi na yandi “ngolo yina me luta ngolo ya bantu” sambu bo nunga konso diambu ya mpasi.—2 Bakorinto 4:7.

“Zola.” Zola ya ngolo sambu na Nzambi ke sadisaka Mukristu na kunwanina mambu ya mbote na kikesa yonso. Mutindu mosi, zola sambu na bantu ya nkaka ke pusaka Mukristu na kutula bampusa ya bantu ya nkaka na ntwala ya bampusa na yandi, ata ntangu yandi ke kutana ti mbangika to yandi kele na kigonsa.—Yoane 13:34; 15:13.

“Mabanza ya mbote.” Na Biblia, mbala mingi mabanza ya mbote ke tadilaka makuki yina Mukristu kele ti yo ya kubaka badesizio ya me simbama na Biblia. Muntu yina kele ti mabanza ya mbote lenda kudiyala ata ntangu yandi ke kutana ti bampasi. Yandi ke bakaka badesizio yina ke wakana ti mutindu Nzambi ke tadilaka mambu, sambu yandi ke zabaka nde kinduku na yandi ti Nzambi kele mfunu mingi kuluta bangindu ya bantu.

Mambu ya Bo Ke Tubila na Baverse ya Kele na Ntwala mpi na Nima ya 2 Timoteo 1:7

Ntumwa Polo muntu sonikaka mukanda ya Zole ya Timoteo; yandi sonikilaka yo Timoteo yina vandaka nduku na yandi ya ngolo ya kisalu. Na mukanda yai, Polo siamisaka Timoteo, yina vandaka leke, na kulanda kusala ngolo na kisalu ya kulonga. (2 Timoteo 1:1, 2) Mbala ya nkaka, Timoteo vandaka nsoni-nsoni to madidi-madidi, yo yina yo lendaka kukanga yandi nzila na kuvukana na mutindu ya me fwana na bisalu ya dibundu ya Bukristu. (1 Timoteo 4:12) Kansi Polo yibusaka Timoteo nde Nzambi pesaka yandi dikabu, disongidila kisalu ya mfunu na kati ya dibundu. Yandi siamisaka Timoteo na kuvanda ve ti badute ntangu yandi ke sadila kiyeka na yandi bonso nkengi na dibundu, ntangu yandi ke longa nsangu ya mbote mpi ntangu yandi ke kanga ntima na bampasi sambu na lukwikilu na yandi.—2 Timoteo 1:6-8.

Ata Polo sonikaka mambu yina ntete-ntete sambu na Timoteo, yo ke bwisa ntima ya bantu yonso yina ke zola kusadila Nzambi bubu yai nde Nzambi ta pesa bo lusadisu ya me fwana sambu bo nunga na kusala yo, ata bo kutana ti konso diambu ya mpasi.