Bibuti Ti Bana: Beno Tula Nzambi Na Kisika Ya Ntete!
“Banga Nzambi ya kyeleka mpi lunda bantuma na yandi.”—LONGI 12:13, NW.
MBIKUDULU mosi ya ketadila Yezu Kristu kutubaka nde: “Yandi ta monaka kiese na [kubanga, NW] Mfumu Nzambi.” (Yezaya 11:3) Kubanga na yandi kuvandaka ntetentete luzitu ya mudindu mpi kutita ya Nzambi, kubanga ya kuyinisa Nzambi sambu yandi zolaka yandi. Bibuti ti bana fwete kukuna kubanga ya Nzambi ya mutindu yai ya kufwanana na yina ya Kristu, yina tanatina bau kyese mutindu yau kunatinaka Kristu. Bau fwete kutula Nzambi na kisika ya ntete na luzingu na bau na kulemfukilaka bantuma na yandi. Na kutadila nsoniki mosi ya Biblia, “Yai kele ntuma yonso ya muntu.”—Longi 12:13, NW.
2 Ntuma ya kuluta nene ya Nsiku, mingimingi, yina ketuba nde beto fwete ‘kuzola Mfumu Nzambi . . . , na ntima na beto yonso, na luzolo na beto yonso, na mabanza na beto yonso ti na ngolo na beto yonso,’ kupesamaka ntetentete na bibuti. Yau kemonisama na bangogo ya nkaka ya Nsiku nde: “Nge fwete kulonga [bangogo yai ya metala kuzola Yehowa] na mwana na nge mpi kutubila yau ntangu nge tavanda na nzo na nge mpi ntangu nge tatambula na nzila mpi ntangu nge talala mpi ntangu nge tatelama.” (Kulonga 6:4-7, NW; Marko 12:28-30) Na yau, bibuti kupesamaka ntuma ya kutula Nzambi na kisika ya ntete na kuzolaka yandi bau mosi mpi na kulongaka bana na bau na kusala mutindu mosi.
Mukumba ya Mukristu
3 Yezu kumonisaka mfunu ya kutula dikebi ata na bana. Na okazio mosi, mfinama na nsuka ya kisalu ya Yezu na zulu ya ntoto, bantu kuyantikaka na kunatina yandi bana na bau ya fyoti. Ya kyeleka, na kuyindulaka nde Yezu kuvandaka ti kisalu mingi na kwenda kumona yandi, balongoki kumekaka na kubuyisa bantu. Kansi, Yezu kunganinaka balongoki na yandi nde: “Beno bikisa bana bo kwisa awa na mono. Beno kanga bo nzila ve.” Nkutu Yezu “[kubakaka bana na maboko na yandi, NW],” mpila yina na kumonisaka na mutindu mosi ya kusimba mfunu ya kutulaka dikebi na bana ya fyoti.—Luka 18:15-17; Marko 10:13-16.
4 Yezu kumonisaka yau mpi pwelele nde balandi na yandi kuvandaka ti mukumba ya kulonga bankaka katula bana na bau mosi. Na nima ya lufwa mpi lufutumuku na yandi, “na mbala mosi, [Yezu] kwisaka kumonika na bakristo nkama tanu”—na kati na bau batata ya nkaka kuvandaka. (1 Korinto 15:6) Yau kemonana bonso nde dyambu yai kusalamaka na ngumba mosi na Galileo kisika bantumwa 11 kuvandaka mpi ya kuvukana. Kuna Yezu kusyamisaka bau yonso nde: “Beno kwenda kukumisa bantu yonso balongoki na mono: . . . beno longa bo mpi na kulanda mambu yonso ya mono vandaka kusonga beno na kusala.” (Matayo 28:16-20) Ata Mukristu mosi ve lenda kuvanda na kikuma ya kyeleka ya kukonda kulungisa ntuma yai! Sambu batata ti bamama kulungisa yau, yau kelomba nde bau kusungimina bana na bau ye mpi bau kuvukana na kisalu ya kusamuna na bantu yonso mpi na kisalu ya kulonga.
5 Yau kele mfunu na kuzaba nde, ata nkutu bantumwa fwete kutadila na bukatikati mikumba na bau ya dibuta ti ntuma na bau ya kusamuna ye mpi ya kugungula mameme ya Nzambi. (Yoane 21:1-3, 15-17; Bisalu 1:8) Yau kele mpila yina sambu bamingi, kana ve, bau yonso kuvandaka ya kukwela. Na yau, ntumwa Polo kutendulaka nde: “Keti beto ke na nswa ve na kwenda nzila mosi ti nkento ya mukristu mutindu ke salaka bantumwa ya nkaka ti bampangi ya Mfumu Yezu ti Kefa?” (1 Korinto 9:5; Matayo 8:14) Ngatu, bantumwa ya nkaka kuvandaka ti bana. Bantu ya nkenda ya ntete, bonso Eusebius, ketuba nde Piere kuvandaka ti bana. Yau kulombamaka nde bibuti Bakristu yonso ya ntama kulunda ndongisila yai: “Ya kyeleka, kana muntu kesungimina ve bantu yina ya kele ya yandi mosi, mpi mingimingi sambu na bayina ya kele bamambere ya dibuta na yandi, yandi mebuya lukwikilu mpi yandi kele mbi kuluta muntu ya kukonda lukwikilu.”—1 Timoteo 5:8, NW.
Mukumba ya Ntetentete
6 Bakristu bankuluntu yina kele ti mabuta bubu yai kele na mvwandilu ya kufwanana na yina ya bantumwa. Bau fwete kutadila na bukatikati mukumba na bau ya kusungimina bansatu ya kimpeve ti ya kinsuni ya mabuta na bau ti kisalu na bau ya kusamuna na bantu yonso mpi ya kugungula mameme ya Nzambi. Inki kisalu fwete kubaka kisika ya ntete? Nzozulu ya Nkengi ( ya Kingelesi) ya Marisi 15, 1964, kutubaka nde: “Mukumba ya ntete [ya tata] kele na dibuta na yandi, mpi ya kyeleka, yandi lenda kusala mbotembote ve kana yandi kesungimina ve mukumba na yandi.”
7 Yau yina, batata fwete kutula Nzambi na kisika ya ntete na kulundaka ntuma ya ‘kufula na kusansa bau na ndongi mpi na ndongolo ya mabanza ya Yehowa.’ (Efezo 6:4) Mukumba yango lenda ve kupesama na muntu ya nkaka, ata nkutu tata lenda kuvanda ti kisalu ya nkaka ya kukengila bisalu na kati ya dibundu ya Bukristu. Inki mutindu bibuti ya mutindu yina lenda kusungimina mikumba na bau— na kulungisaka mpusa ya bamambere ya dibuta na kinsuni, na kimpeve, mpi na mawi— mpi na mbala mosi, na kutwadisaka mpi na kulungisaka kinkengi na kati ya dibundu?
Pesa Lusadisu yina Kele Mfunu
8 Yau kele pwelele nde, bankuluntu ya kele ti mikumba ya dibuta lenda kubaka mambote ya kekatuka na lusadisu. Nzozulu ya Nkengi ya metubilama na zulu kutubaka nde nkento ya Mukristu lenda kuvanda lusadisu sambu na bakala na yandi. Yau kutubaka nde: “Yandi (nkento) lenda kusala sambu bakala kubongisa bisalu na yandi ya mitindu na mitindu, mpi kusadisa na kulunda ntangu ya mbote sambu na yandi (bakala) mpi sambu na yandi mosi (nkento) na kuvandaka ti manaka na kati ya nzo, na kulambaka na ntangu ya mbote, na kuyilamaka sambu na kukwenda nswalu na balukutakanu ya dibundu. . . . Na nsi ya lutwadisu ya bakala, nkento ya mukristu lenda kusala mingi sambu na kulonga bana nzila ya bau fwete kutambula sambu na kuyangidika Yehowa.” (Bingana 22:6) Ee, nkento kugangamaka sambu na kuvanda “nsadisi,” mpi bakala na yandi tayamba na mayele yonso lusadisu na yandi. (Kuyantika 2:18) Lusadisu na yandi lenda kusadisa yandi na kusungimina kuluta mbote mikumba na yandi ya dibuta ti ya dibundu.
9 Kansi, bankento ya bankuluntu Bakristu kele ve bau mosi bantu lenda kuvukana na kati ya kisalu yina ya kesadisaka nkengi yina fwete “kugungula mameme ya Nzambi” mpi kusungimina dibuta na yandi mosi. (1 Piere 5:2) Nani dyaka lenda kusala yau? Ntumwa Polo kusyamisaka bampangi ya Tesalonika na kuvanda ti luzitu sambu na bayina “ke salaka na kati” na bau. Kansi, na kulandaka mpi na kutubilaka kaka bampangi—mingimingi sambu na bayina ketwadisaka ve—Polo kusonikaka nde: “Beto kesyamisa beno, bampangi, beno pesa lukebisu na bantu ya ntu-ngolo, beno kuvanda na bangogo ya ndembikilu sambu na myoyo ya kenyokwama, beno sadisa bantu ya lebakana, beno sadila ntima ya nda sambu na bantu yonso.”—1 Tesalonika 5:12-14, NW.
10 Kyese ya inki mutindu ntangu bampangi na kati ya dibundu kele na zola yina kepusa bau na kusyamisa bayina kenyokwama na mabanza, na kusadisa bantu ya lebakana, na kukebisa bayina kele ntu-ngolo, mpi na kuvanda na ntima ya nda sambu na bantu yonso! Bampangi ya Tesalonika, yina kukatukaka kuyamba kyeleka ya Biblia ata nkutu bau vandaka kumona mpasi ya mingi, kusadilaka ndongisila ya Polo sambu na kusala dyambu yai. (Bisalu 17:1-9; 1 Tesalonika 1:6; 2:14; 5:11) Yindula malanda ya mbote ya kusala na bau kumosi kuvandaka na yau sambu na kupesa kikesa mpi na kuvukisa dibundu ya mvimba! Mutindu mosi bubu yai, ntangu bampangi kesyamisana, kesadisana, mpi kekebisana bamosi ti bankaka, yau kekumisa mikumba ya kugungula ya bankuluntu, yina kevandaka mbala mingi ti mabuta ya kusungimina, petepete kibeni na kulungisa.
11 Keti bankento kukotisamaka na kati ya “bampangi” ya ntumwa Polo vandaka kutubila? Ee, bau kukotisamaka, sambu bankento mingi kukumaka bankwikidi. (Bisalu 17:1, 4; 1 Piere 2:17; 5:9) Lusadisu ya inki mutindu bankento ya mutindu yai lendaka kupesa? Ee, kuvandaka ti bana-ndumba na kati ya mabundu yina kuvandaka ti mpasi na kukengila “mawi na bau ya kuvukisa nitu” to yina kukumaka “ya kunyokwama na myoyo.” (1 Timoteo 5:11-13, NW) Bankento mingi bubu yai, kele ti makambu ya mutindu mosi. Kima ya bau kele na yau mpenza mfunu kele kaka muntu ya ketudila bau makutu to muntu ya fwete kuwidikila bau. Mbala mingi, Mukristu ya nkento ya kuyela kele muntu ya mefwana na kupesa lusadisu ya mutindu yina. Mu mbandu, yandi lenda kutubila makambu na yandi mosi ti nkento ya nkaka, makambu ya Mukristu ya bakala yandi mosi lendaka ve kubongisa mbotembote. Na kutubilaka pwelele mfunu ya lusadisu ya mutindu yina, Polo kusonikaka nde: “Longa mpi bankento yina me nunaka nde bo fweti . . . longa mambu ya mbote na bankento yina me nuna ntete ve na mpila nde bo kuzola babakala na bo ti bana na bo, [bau kuvanda na mabanza ya mbote, bau kuvanda ya longo, NW] bo kusala bisalu ya mbote na banzo na bo, bo kuvanda bankento ya mbote yina ke lemfukaka na babakala na bo; mpidina ata muntu mosi ve lenda vwenza nsangu ya Nzambi.”—Tito 2:3-5.
12 Lusakumunu ya inki mutindu bampangi ya bankento ya kudikulumusa kele na yau na kati ya dibundu ntangu bau kesala kumosi sambu na kusadisa babakala na bau ti bankuluntu! (1 Timoteo 2:11, 12; Baebreo 13:17) Mingimingi, bankuluntu ya kele ti mikumba ya dibuta kebakaka mambote ntangu bau yonso kesala sambu na kusadisana bamosi ti bankaka na mpeve mosi ya zola mpi ntangu bau yonso kelemfuka na lutwadisu ya bangungudi ya meponamaka.—1 Piere 5:1, 2.
Bibuti, Inki Beno Ketulaka na Kisika ya Ntete?
13 Bamvula mingi meluta musadi weto ya nene kutubaka nde: “Mono kemona bantu ya nene ketwadisa bakompani ti bankama ya bantu; bau kuzaba inki mutindu kubongisa konso dikambu, inki mutindu kulonga mpi kupesa nsendo na inza ya kisalu. Kansi kisalu ya ngolo ya kuluta mfunu ya bau kebebisa kele dibuta na bau mpi bau kelunga yau ve.” Sambu na inki? Keti yau kele ve sambu bau ketulaka kisalu ti bampusa ya nkaka na kisika ya ntete mpi kevilaka ndongisila ya Nzambi? Ndinga na yandi ketuba nde: “Bangogo yai ya mono ketuma na nge . . . , nge fwete kulonga yo . . . na mwana na nge.” (NW) Mpi yau kulombamaka nde yau kusalama konso kilumbu. Bibuti fwete kupesa ntangu na bumbote yonso—mpi mingimingi zola na bau mpi dikebi ya mudindu.—Kulonga 6:6-9.
14 Biblia keyibusa beto nde bana kele difwa ya kekatukaka na Yehowa. (Nkunga 127:3) Keti nge kesungiminaka bana na nge bonso kima ya Nzambi, dikabu ya yandi mepesaka nge? Mwana na nge tavutula mutindu mosi kana nge mebaka yandi na maboko na nge, mpila yina na kumonisaka lusungiminu mpi dikebi na nge ya zola. (Marko 10:16) Kansi ‘kulonga mwana mutindu yandi fweti zinga’ kelombaka mambu mingi kuluta kusimba yandi na maboko to kupesa bansila nwa kaka. Kuvanda ya kufuluka na mayele sambu na kubuya mitambu ya luzingu, mwana kele mpi na mfunu ya ndongi ya kufuluka na zola. Kibuti kemonisa zola ya kyeleka na ‘[kusosaka mwana na yandi ti ndongi, NW].’—Bingana 13:1, 24; 22:6.
15 Mfunu ya ndongisila ya bibuti lenda kumonana na ntendula ya ndongisi ya nkento ya nzo-nkanda mosi ya bana yina kukwisaka na biro na yandi: “Bau kele mawamawa, ya kunyokwama na mabanza, ya kukonda lusadisu. Bau kedila ntangu bau ketuba mutindu mambu kele mpenza. Mingi—mingi kibeni kuluta yina ya muntu lenda kuyindula—kumekaka na kudifwa, kele ve sambu kyese kulutaninaka bau; yau kele sambu bau kekudiwa ata na kyese fyoti ve, ya kukonda lusungiminu, mpi ya kunyokwama na mabanza sambu na kiteso ya bamvula ya kileke na mpila ya bau kele na ‘mukumba ya muntu’ mpi yau kele kibeni mpasi mingi na kubongisa.” Yandi kuyikaka nde: “Yau kele dyambu mosi ya kepesa boma sambu na leke na kudiwa nde yandi kele ti mukumba ya mambu.” Ya kyeleka, bana lenda kumeka na kubuya ndongi, kansi, bau kendimaka mpenza balutwadisu ya bibuti ti bandilu. Bau kevandaka na kyese nde bibuti na bau kusungimina mpenza kutudila bau bandilu. Toko mosi ya bibuti na yandi kusadilaka mutindu yina kutubaka nde: “Yau kuvandaka ndembikilu ya nene sambu na mono.”
16 Kansi, ata nkutu bau kele ti bibuti yina kezolaka bau mpi kepesaka bau ndongolo ya mbote, baleke ya nkaka, bonso mwana ya kuvilaka ya kingana ya Yezu, kelosaka lutwadisu ya bibuti mpi kevilaka nzila. (Luka 15:11-16) Kansi, yau lenda kutendula ve nde bibuti kulungisaka ve mukumba na bau ya kulonga mbote bana na bau mutindu Bingana 22:6 ketuma. Ntubilu ya ketadila ‘kulonga mwana mutindu yandi fweti zinga, ebuna ntangu yandi me kuma mbuta yandi ta vila yo ve,’ kupesamaka na kimvuka. Mawa mingi, bonso mwana ya kuvilaka, bana ya nkaka ‘[tavweza kuzitisa kibuti, NW].’—Bingana 30:17.
17 Tata mosi ya kele ti mwana ya ntu-ngolo kubokutaka nde: “Mono mekaka mbala na mbala na kusimba ntima na yandi. Mono kemona ve inki mono fwete kusala sambu mono mekaka mambu mingi kibeni. Ata kima ve kusimbaka.” Beto ketula kivuvu nde, kubika fyoti, bana ya ntu-ngolo ya mutindu yina tayibuka ndongolo ya zola ya bau kubakaka mpi tavutuka mutindu mwana ya kuvilaka kusalaka. Kansi, dyambu ya kyeleka ya mebikala kele nde bana ya nkaka kekolama mpi kesala mambu ya mansoni ya kepesa bibuti na bau mpasi mpenza. Bibuti lenda kubaka nsyamisa na kuzabaka nde ata nkutu longi ya kuluta nene ya ntangu yonso na zulu ya ntoto kumonaka longoki na yandi ya ntama Yudasi Iskarioti meyekula yandi. Mpi na ntembe ve, Yehowa yandi mosi kuwaka mpasi na ntima ntangu bana na yandi mosi ya kimpeve kulosaka ndongisila na yandi mpi kukumaka bankolami nkatu kifu na ndambu na Yandi.—Luka 22:47, 48; Kusonga 12:9.
Bana—Nani Beno Tayangidika?
18 Yehowa kesyamisa baleke nde: “Beno lemfuka na bibuti na beno na kuwakana ti Mfumu.” (Efezo 6:1, NW) Baleke ketulaka Nzambi na kisika ya ntete na kusalaka dyambu yai. Kuvanda ve zoba! Ndinga ya Nzambi ketuba nde: “Kana nge buya malongi ya tata na nge, nge kele zoba.” Nge lenda kuyindula mpi na lulendo yonso nde nge lenda kusala nkatu ndongi. Dyambu ya kele kyeleka kele nde “Kele ti mbandu mosi ya kele ya kugedila na meso na bau mosi, kansi bau kele ve ya kusukuka na mvindu na bau.” (Bingana 15:5; 30:12, American Standard Version) Ebuna, keba lutwadisu ya Nzambi—“[wa, NW]”, “[lunda, NW]”, “[kuvila ve, NW]”, “[tula dikebi, NW]”, “[landa, NW]” mpi “[kuyambula ve, NW]” bantuma mpi ndongi ya bibuti.—Bingana 1:8; 2:1; 3:1; 4:1; 6:20.
19 Nge kele ti bikuma ya ngolo ya kulemfukila Yehowa. Yandi kezolaka nge, mpi yandi mepesaka nsiku na yandi, ye mpi nsiku ya bana sambu na kulemfukila bibuti na bau, sambu na kutanina nge mpi na kusadisa nge na kusepela ti luzingu ya kyese. (Yezaya 48:17) Yandi mepesaka mpi Mwana na yandi sambu na nge na mpila nde nge lenda kuguluka na disumu ti lufwa mpi kusepela na luzingu ya mvula na mvula. (Yoane 3:16) Keti nge kele na ntonda? Nzambi ketala tuka na mazulu, na kufimpaka ntima na nge sambu na kumona kana nge kezolaka yandi mpenza mpi kesepelaka na madya na yandi. (Nkunga 14:2) Satana mpi ketala, ye yandi kesosila Nzambi, na kutubaka nde nge talemfukila Yandi ve. Nge kesepelisaka Satana mpi Yehowa “kewaka mawa” ntangu nge kekondaka kulemfukila Nzambi. (Nkunga 78:40, 41) Yehowa kebingisa nge nde: “Mwana na mono, vanda mayele, ebuna mono ta mona kiese [na kulemfukilaka mono], mpidina konso muntu yina [tasosila, NW] mono, mono ta zaba kupesa yandi mvutu.” (Bingana 27:11) Ee, ngyufula kele nde: Nani nge tayangidika, Satana to Yehowa?
20 Kusala luzolo ya Nzambi kele ve petepete na ntwala ya bampasi ya Satana ti inza na yandi kebasisaka na zulu na beno. Yau lenda kupesa boma. Toko mosi kutubaka nde: “Kuwa boma kele bonso kuwa madidi. Nge lenda kusala kima mosi sambu na yau.” Yandi kutendulaka nde: “Kana nge kewa madidi, nge talwata triko. Kana nge kewa kaka madidi, nge tayika ya nkaka. Mpi nge talanda na kulwata kima mosi tii kuma madidi tamana mpi nge tawa dyaka ve madidi. Yau yina, kusamba Yehowa ntangu nge kele na boma kele bonso kulwata triko ntangu nge kewa madidi. Kana na nima ya kisambu mono kewa kaka boma, mono kesambaka dyaka, mpi mono keyika ya nkaka, ya nkaka, mpi ya nkaka tii kuna ya mono tawa dyaka ve boma. Mpi yau kesadisaka. Yau metaninaka mono na mpasi!”
21 Kana beto kumeka mpenza na kutula Nzambi na kisika ya ntete na luzingu na beto, Yehowa tasadisa beto. Yandi tasyamisa beto, na kupesaka lusadisu ya bawanzyo ntangu yau kele mfunu, kaka mutindu yandi kusalaka sambu na Mwana na yandi. (Matayo 18:10; Luka 22:43) Beno yonso, bibuti ti bana, beno vanda kikesa. Beno vanda na kubanga bonso ya Kristu, mpi yau tanatina beno kyese. (Yezaya 11:3) Ee, “banga Nzambi ya kyeleka mpi lunda bantuma na yandi sambu yai yonso kele mukumba ya muntu.”—Longi 12:13, NW.
[Study Questions]
1. Kubanga ya inki mutindu bibuti ti bana fwete kukuna, mpi inki yau tanatina bau?
2. Inki kuvandaka ntuma ya kuluta mfunu ya Nsiku, mpi yau kupesamaka ntetentete na nani?
3. Inki mutindu Yezu kumonisaka mfunu ya kupesa dikebi na bana?
4. Nani kubakaka ntuma ya “kukumisa bantu ya mabuta yonso balongoki,” mpi yau zolaka kulomba nde bau kusala inki?
5. (a) Inki kemonisa nde bamingi bantumwa mingi, kana bau yonso ve, bau kuvandaka ya kukwela mpi ngatu bau kuvandaka ti bana? (b) Inki ndongisila bamfumu ya dibuta fwete kubaka na ntima mosi?
6. (a) Inki lukakilu bankuluntu Bakristu ya kele ti mabuta kele na yau? (b) Inki kele mukumba ya ntetentete ya nkuluntu?
7. Inki mutindu batata Bakristu ketulaka Nzambi na kisika ya ntete?
8. Inki mutindu nkento ya nkuluntu lenda kusadisa yandi?
9. Banani, na dibundu ya Tesalonika kusyamisamaka na kusadisa bamambere ya nkaka na dibundu?
10. Inki malanda ya mbote lusadisu ya zola ya bampangi yonso kele na yau na zulu ya dibundu?
11. (a) Sambu na inki yau kele mbote na kusukisa nde bankento kuvandaka na kati ya ngogo “bampangi”? (b) Inki lusadisu Mukristu ya nkento ya kuyela kepesaka na bankento ya baleke bubu yai?
12. Lutwadisu ya nani kele mfunu nde bantu yonso na kati ya dibundu kulanda?
13. Inki mutindu batata mingi kenungaka ve na mabuta na bau?
14. (a) Inki mutindu bibuti fwete kusungimina bana na bau? (b) Ndongolo ya mbote ya bana kelombaka inki?
15. Inki kemonisa mfunu ya ndongi ya bibuti?
16. (a) Inki kekuminaka bana mingi ya kusansamaka na banzo ya Bakristu? (b) Sambu na inki ntu-ngolo ya bana lenda kutendula ve ntangu yonso nde ndongolo ya bibuti kupesaka kuvandaka ve mbote?
17. Na inki mambu bibuti ya bana ya ntu-ngolo lenda kubakila nsyamisa?
18. Inki mutindu bana lenda kumonisa nde bau ketula Nzambi na kisika ya ntete?
19. (a) Inki bikuma ya ngolo bana kele na yau sambu na kulemfukila Yehowa? (b) Inki mutindu baleke lenda kumonisa nde bau kele na ntonda sambu na Nzambi?
20. Inki mutindu leke mosi kulundaka kikesa sambu na kusadila Yehowa ata nkutu ntangu yandi vandaka kuwa boma?
21. Inki mutindu Yehowa tasadisa beto kana beto meka mpenza kutula yandi na kisika ya ntete na luzingu na beto?
[Caption on page 1]
[Bangyufula]
[Caption on page 27]
[Ntendula ya Bifwanisu ya lutiti 27]
Mbala mingi nkento Mukristu ya kuyela lenda kupesa lusadisu ya kele mfunu na nkento ya leke
[Caption on page 29]
[Ntendula ya Bifwanisu ya lutiti 29]
Inki nsyamisa bibuti yina kele ti bana ya ntu-ngolo lenda kubaka na kati ya Masonuku?
[Caption on page 1]
Keti Nge Lenda Kupesa Mvutu?
◻ Inki mukumba kulombamaka nde balongoki ya Yezu ya ntete kutadila na bukatikati?
◻ Inki mukumba bibuti Bakristu fwete kulungisa?
◻ Inki lusadisu mepesama sambu na bankuluntu Bakristu yina kele ti mabuta?
◻ Inki kisalu ya mfunu bampangi ya bankento lenda kusala na kati ya dibundu?
◻ Inki ndongisila ti lutwadisu kele mfunu nde bana kulunda?