Sadisa Balongoki ya Biblia na Kukuma Bansamuni ya Nsangu ya Mbote ya Kimfumu
1 Kisalu yina Yezu kupesaka balongoki na yandi, mutindu Matayo 28:19, 20 kemonisa yo, zolaka kumwangana na ntoto ya mvimba. Kristu kusongaka bo na kukumisa bantu mingi balongoki, ebuna bantu yango mpi zolaka kusala kisalu yina mosi ya kukumisa bantu balongoki. Balongoki ya Yezu kuyantikisaka kisalu ya kuzabisa nsangu ya mbote ya Kimfumu ya Nzambi na ntoto ya mvimba, kisalu yina zolaka kusalama na ntangu ya nsuka yai ya beto kezinga.—Mat. 24:14.
2 Bantu ya beto kekumisaka balongoki lenda vanda bana na beto to bantu yankaka yina kezola kulonguka Biblia ti beto. Beto kezola kusadisa bo na kuzaba mpi na kulungisa mukumba na bo ya kusadisa bantu yankaka na kukuma balongoki ya Yezu Kristu.—Luka 6:40.
3 Longa Bo na Kuta Kimbangi: Syamisa bantu ya nge kelonguka ti bo Biblia na kuzabisa bantu yankaka mambu ya bo kelonguka. Tela bo ba eksperiansi ya kepesa kikesa yina nge kebakaka na kisalu ya bilanga. Longa bana na nge banda bumwana na kusala kisalu ya kusamuna na mutindu mosi ya mbote mpi na kiteso ya ngolo na bo. (Nk. 148:12, 13) Monisa na kutuba ti na mbandu na nge nde nge kezolaka kisalu ya kusamuna.—1 Tim. 1:12.
4 Yehowa kesadilaka kaka bantu yina kendimaka bansiku na yandi ya lunungu mpi kezingaka na kuwakana ti yo. Ya kyeleka, bansamuni ya mpa kezabaka ve mambu mingi bonso bansamuni yina ke ti eksperiansi, yina mekudipesaka mpi mebakaka mbotika tuka ntama. Ata mpidina, bo fwete kwikila na malongi ya mfunu ya Biblia mpi kukuka kutendula yo. (Tala mukanda Beto Mevukana, bal. 79-82.) Sambu bo mekabwanaka mpenza na ‘Babilone ya Nene’ mpi kekudikotisaka ve na mambu ya politiki, bo fwete kwendaka mbala na mbala na balukutakanu ya dibundu.—Kus. 18:2, 4; Yoa. 17:16; Baeb. 10:24, 25.
5 Kana nge mona nde longoki na nge mosi ya Biblia mefwana na kukuma nsamuni, nge fwete zabisa nkengi-ntwadisi. Yandi tasala manaka na mpila nde bankuluntu zole kukutana ti nge mpi longoki na nge ya Biblia, sambu na kutala kana yandi mefwana na kukuma nsamuni ya nsangu ya mbote ya Kimfumu kumosi ti bansamuni yankaka ya dibundu. Na nima, nge tavanda na mukumba ya kubasika mingi ti yandi na kisalu ya bilanga sambu na kulanda na kulonga yandi.